ມີເດຍລາວແຂວງເຊກອງ ຂ່າວ: ຫຼານປູ່ ໃນວັນທີ 21 ພຶດສະພາ 2021 ທ່ານ ນ ວັນວິໄລ ສີວິໄລ ພັນລະຍາທ່ານ ເຈົ້າແຂວງເຊກອງ ພ້ອມພັນລະຍາການນຳຂັ້ນແຂວງ ແລະ ເມືອງຈຳນວນໜຶ່ງນຳໂດຍ ທ່ານນາງ ອອນສະຫວັນ ມິດສຸວັນ ພັນລະຍາ ທ່ານເຈົ້າເມືອງດາກຈຶງ , ຮ່ວມ​ກັບຫ້ອງການສະຫະພັນແມ່ຍິງເມືອງ ໄດ້ນຳເອົາເຄື່ອງຊ່ວຍເຫລືອລວມມູນຄ່າ:9ລ້ານກີບປະກອບມີ: ເຂົ້າສານ,ໝີ່,ສະບູຝຸ່ນ,ຢາຖູແຂ້ວ,ໝາກເຜັດ,ໄຂ່,ເກືອ,ແປ້ງນົວ ແລະ ເຄື່ອງບໍລິໂພກອື່ນໆ ລົງມອບ ແລະ ແຈກຢາຍ ໃຫ້ປະຊາຊົນຈຳນວນ 40 ຄອບຄົວ,ຢູ່ບ້ານດາກປຳ ເມືອງດາກຈຶງ ​ແຂວງ​ ເຊກອງ ທີ່ຍັງມີຄວາມທຸກຍາກຂາດເຂີນ.

ທ່ານນາງ ວັນວິໄລ ສີວິໄລ ກ່າວວ່າ: ການນຳເອົາເຄື່ອງມາມອບໃຫ້ປະຊາຊົນໃນຄັ້ງນີ້ ເພື່ອເປັນການຊ່ວຍເຫລືອ ບັນເທົາທຸກສ່ວນໃດສ່ວນໜຶ່ງໃຫ້ແກ່ບັນດາ ຄອບຄົວທີ່ທຸກຍາກຂາດເຂີນ,ພ້ອມທັງລົງມາຢື້ຢາມຖາມຂ່າວພໍ່ແມ່ປະຊາຊົນ, ອັນສຳຄັນແມ່ນ ຍ້ອນຄວາມເປັນຫ່ວງເປັນໃຍ ຂອງການນຳພັກ-ລັດ ທີ່ມີຕໍ່ປະຊາຊົນເຊິ່ງຍາມໃດ ກໍໄດ້ເປັນຫ່ວງຕໍ່ຄວາມສຸກທຸກຂອງປະຊາຊົນມາຕະຫລອດ

ໂອກາດດັ່ງກ່າວທ່ານ ນາງ ກູດ ຊາວວົງຍືນ ກຳມະການພັກເມືອງ ປະທານສະຫະພັນແມ່ຍິງເມືອງ ກໍ່ໄດ້ຕ່າງໜ້າໃຫ້ອຳນາດການປົກຄອງເມືອງມອບໃບກຽດຕິຄຸນໃຫ້ຄອບຄົວການນຳຂັ້ນແຂວງພ້ອມທັງສະແດງຄວາມຂອບໃຈໃນການເສຍສະຫລະເວລາ ແລະ ທຶນຮອນປະກອບສ່ວນເຂົ້າໃນການຊ່ວຍເຫລືອປະຊາຊົນໃນຄັ້ງນີ້