ມີເດຍລາວແຂວງໄຊຍະບູລີ ຂ່າວ: ບຸນທີ.
ມາຮອດປະຈຸບັນທັງພາກລັດ, ບໍລິສັດ, ນັກທຸລະກິດຜູ້ປະກອບການດ້ານຕ່າງໆໄດ້ສືບຕໍ່ມອບເຄື່ອງຊ່ວຍເຫຼືອແຂວງໄຊຍະບູລີຢ່າງຕໍ່ເນື່ອງ ເວົ້າລວມ, ເວົ້າສະເພາະກໍ່ຄືພະແນກ ຖວທ ແຂວງໄຊຍະບູລີ. ໃນວັນທີ 26 ມິຖຸນາ 2021 ນີ້ ກຸ່ມວັງນໍ້າໃຈສູ່ຊົນນະບົດ ໄດ້ນໍາເອົາເຄື່ອງນຸ່ງຫົ່ມ ເຊັ່ນ: ຜ້າຫົ່ມ 30 ຜືນ, ມຸ້ງ 30 ດາງ, ສາດ 30 ຜືນ ແລະ ເຂົ້າສານໜຽວ, ແປ້ງນົວ 30 ຖົງ ມູນຄ່າ 7 ລ້ານກວ່າກີບ ມາມອບໃຫ້ພະນັກງານທີ່ຖືກຜົນກະທົບຈາກໄພນໍ້າຖ້ວມທີ່ຜ່ານມາ. ພິທີດັ່ງກ່າວໄດ້ຈັດຂຶ້ນທີ່ພະແນກ ຖວທ ແຂວງໄຊຍະບູລີ ໂດຍໃຫ້ກຽດມອບຂອງ ທ່ານ ແພວເພັດ ເພັດທອງໃສ ປະທານກຸ່ມວັງນໍ້າໃຈສູ່ຊົນນະບົດ ແລະ ໃຫ້ກຽດຮັບຂອງ ທ່ານ ກອງໄລ ວິໄລພອນ ຮອງຫົວໜ້າພະແນກ ຖວທ ແຂວງ ຕາງໜ້າໃຫ້ພະແນກ ຖວທ ມີສະມາຊິກພັກ-ພະນັກງານທີ່ໄດ້ຮັບຜົນກະທົບເຂົ້າຮ່ວມເປັນສັກຂີພິຍານ.

ນອກຈາກທີ່ກຸ່ມວັງນໍ້າໃຈສູ່ຊົນນະບົດ ໄດ້ມອບເຄື່ອງຊ່ວຍເຫຼືອບັນເທົາທຸກທີ່ພະແນກ ຖວທ ແລ້ວ ກຸ່ມວັງນໍ້າໃຈສູ່ຊົນນະບົດຍັງໄດ້ມອບເຄື່ອງນຸ່ງຫົ່ມໃຫ້ແຂວງໄຊຍະບູລີ ທີ່ຫ້ອງວ່າການປົກຄອງແຂວງ ແລະ ລົງມອບຢູ່ບັນດາບ້ານໃນເທດສະບານເມືອງໄຊຍະບູລີ ເຊັ່ນ: ບ້ານປົ່ງ, ບ້ານສີມຸງຄຸນ, ບ້ານນາຍາວ ລວມມູນຄ່າເຄື່ອງຂອງທີ່ມາມອບຄັ້ງນີ້ທັງໝົດ 50 ລ້ານກວ່າກີບ.

ໃນໂອກາດນີ້ ທ່ານ ກອງໄລ ວິໄລພອນ ຮອງຫົວໜ້າພະແນກ ຖວທ ແຂວງ ໄດ້ສະແດງຄວາມຂອບໃຈນໍາກຸ່ມວັງນໍ້າໃຈສູ່ຊົນນະບົດ ຄົນລາວບໍ່ຖິ້ມກັນ, ຊ່ວຍເຫຼືອກັນໃນຍາມສຸກເສີນ, ໄດ້ບິແບ່ງກໍາລັງຊັບ, ກໍາລັງໃຈມາຊ່ວຍເຫຼືອ ແຂວງໄຊຍະບູລີ ກໍ່ຄືພະແນກ ຖວທ ແລະ ເຊື້ອໝັ້ນວ່າ ການຊ່ວຍເຫຼືອໃນຄັ້ງນີ້ກໍ່ຈະບໍ່ແມ່ນຄັ້ງສຸດທ້າຍ ແລະ ຈະມີຄັ້ງຕໍ່ໆໄປ. ດັ່ງນັ້ນ ເຄື່ອງຂອງທີ່ມາມອບໃຫ້ໃນມື້ນີ້ ຈະໄດ້ມອບຕໍ່ໃຫ້ພະນັກງານສະມາຊິກພັກ ທີ່ໄດ້ຮັບຜົນກະທົບ ຈໍານວນ 24 ຄົນ ພາຍໃນພະແນກ ຖວທ ໃຫ້ຄົບຖ້ວນທົ່ວເຖິງ ເພື່ອເປັນການບັນເທົາທຸກໃນເບື້ອງຕົ້ນ.