ມີເດຍລາວແຂວງສາລະວັນ ໂດຍທິດລານີໂດຍ ໂຄດໂຍທາ ວັນທີ28ເມສາ2021 ທີ່ຫ້ອງວ່າການແຂວງສາລະວັນ, ໄດ້ມີພິທີມອບ-ຮັບ ການຊ່ວຍເຫຼືອເຄື່ອງບໍລິໂພກ-ອຸປະໂພກ ແລະ ເງິນສົດຈໍານວນໜຶ່ງ, ຈາກພາກລັດ ແລະ ເອກະຊົນ. ເພື່ອປະກອບສ່ວນເຂົ້າໃນວຽກງານປ້ອງກັນ ແລະ ສະກັດກັ້ນການລະບາດຂອງພະຍາດໂຄວິດ-19 ທີ່ ແຂວງສາລະວັນ. ເຊິ່ງປະກອບມີ 8 ພາກສ່ວນຄື: ພະແນກຊັບພະຍາກອນ ແລະ ສິ່ງແວດລ້ອມ ມອບເງິນສົດ 3 ລ້ານກີບ, ພະແນກວິທະຍາສາດ ແລະ ເຕັກໂນໂລຊີ 1 ລ້ານກີບ, ບໍລິສັດອາລີກໍ່ສ້າງ ແຂວງສາລະວັນ 10 ລ້ານກີບ, ບໍລິສັດ ດວງຖາວອນ ພັດທະນາກໍ່ສ້າງຈໍາກັດຜູ້ດຽວ 3 ລ້ານກີບ, ບໍລິສັດກະເສດ ວີນາ ສາລະວັນຂາອອກ-ຂາເຂົ້າ ຈໍາກັດຜູ້ດຽວ 3 ລ້ານກີບ, ໂຮງງານຜະລິດຖ່ານຂ່າວລາວສົ່ງອອກ 5 ແສນກີບ, ກຸ່ມບໍລິສັດຖ່ານຂ່າວອຸດົມສັກມອບ ນໍ້າດື່ມ 200 ແພັກ, ຜ້າອັດປາກ-ອັດດັງ 1 ແກັດ, ເຈວລ້າງມື 1 ແກັດ ລວມມູນຄ່າທັງໝົດ 3 ລ້ານກວ່າກີບ ແລະ ວັດສຸຣິຍາພາໂວມັງຂະຣາມ ບ້ານນາເຫຼັກ-ນາກົກໂພ ມອບຕຽງໄມ້ 17 ຊຸດ, ນໍ້າດື່ມ 12 ແພັກ ລວມມູນຄ່າທັງໝົດ 8 ລ້ານກວ່າກີບ. ໂດຍການຮັບຂອງ ທ່ານ ນາງ ບຸນທະວີ ດວງລາສີ ຮອງເລຂາພັກແຂວງ ແລະ ທ່ານ ສົມໃຈ ອຸ່ນຈິດ ຮອງເຈົ້າແຂວງ ຫົວໜ້າປະທານຄະນະສະເພາະກິດໂຄວິດ-19 ຂັ້ນແຂວງ ແລະ ພາກສ່ວນທີ່ກ່ຽວຂ້ອງເຂົ້າຮ່ວມ.