ມີເດຍລາວແຂວງເຊກອງ ຂ່າວ: ບູ້ສຸວັນ.
ເພື່ອຈັດຕັ້ງປະຕິບັດຄໍາສັ່ງຂອງກົມການເມືອງສູນກາງພັກ ວ່າດ້ວຍການເພີ່ມທະວີການສ້າງໜ່ວຍພັກປອດໃສ, ເຂັ້ມແຂງ, ໜັກແໜ້ນໃຫ້ປະກົດຜົນເປັນຈິງ, ໃນວັນທີ 16 ມິຖຸນາ 2021 ໜ່ວຍພັກຮາກຖານທະນາຄານພົງສະຫວັນສາຂາແຂວງເຊກອງ, ໄດ້ຈັດພິທີປະກາດຮັບຮອງ ແລະມອບໃບຢັ້ງຢືນເປັນໜ່ວຍພັກປອດໃສ, ເຂັ້ມແຂງ, ໜັກແໜ້ນປະຈໍາປີ 2020 ແລະຮັບຮອງທິດທາງແຜນການກໍ່ສ້າງພັກປອດໃສ,ເຂັ້ມແຂງ,ໜັກແໜ້ນປະຈໍາປີ 2021 ເຊິ່ງໄດ້ໄຂຂື້ນຢ່າງເປັນທາງການ, ໂດຍການເປັນປະທານຂອງທ່ານ ບຸນຫຼາຍ ບຸດທິດ ຄະນະປະຈໍາພັກແຂວງ, ຫົວໜ້າຈັດຕັ້ງແຂວງເຊກອງ, ມີທ່ານ ຄໍາແດງ ກົມມະດໍາ ເລຂາໜ່ວຍພັກຮາກຖານທະນາຄານພົງສະຫວັນ ສາຂາແຂວງເຊກອງ, ມີບັນດາຄະນະໜ່ວຍພັກ, ສະມາຊິກພັກສົມບູນ, ສໍາຮອງ ແລະແຂກຖຶກເຊີນເຂົ້າຮ່ວມ.

ທ່ານ ກາວີນ ແກ້ວຈັນທະວົງ ຫົວໜ້າຂະແໜງກໍ່ສ້າງພັກ, ກໍ່ໄດ້ຂື້ນຜ່ານມະຕິຕົກລົງຂອງຄະນະປະຈໍາພັກແຂວງ, ສະບັບເລກທີ 59/ຄຈພຂ, ລົງວັນທີ 17 ກຸມພາ 2021 ວ່າດ້ວຍຮັບຮອງໜ່ວຍພັກຮາກຖານທະນາຄານພົງສະຫວັນ ສາຂາ ແຂວງເຊກອງ ເປັນໜ່ວຍພັກປອດໃສ, ເຂັ້ມແຂງ, ໜັກແໜ້ນປະຈໍາປີ 2020.
ໃນພິທີຄັ້ງນີ້; ທ່ານ ຄໍາແດງ ກົມມະດໍາ ເລຂາໜ່ວຍ ພັກຮາກຖານທະນາຄານພົງສະຫວັນ ສາຂາ ແຂວງເຊກອງ, ກໍ່ໄດ້ຂື້ນຜ່ານບົດສະຫຼຸບປະເມີນຜົນການກໍ່ສ້າງໜ່ວຍພັກປອດໃສ, ເຂັ້ມແຂງ, ໜັກແໜ້ນປະຈໍາປີ 2020 ເຊິ່ງໄດ້ໃຫ້ຮູ້ວ່າ: ໃນປະຈຸບັນໜ່ວຍພັກຂອງຕົນມີພະນັກງານທັງໝົດ 12 ສະຫາຍ, ຍິງ 5 ສະຫາຍ; ໃນນັ້ນມີສະມາຊິກພັກ 7 ສະຫາຍ, ຍິງ 2 ສະຫາຍ ແລະມີສະມາຊິກພັກສໍາຮອງ 2 ສະຫາຍ,

ເຊິ່ງຕະຫຼອດໄລຍະຜ່ານມາຄະນະໜ່ວຍພັກຍາມໃດກໍ່ໄດ້ເອົາໃຈໃສ່ໃນການຈັດຕັ້ງປະຕິບັດວຽກງານ, ນຳພາ-ຊີ້ນຳໃນແຕ່ລະດ້ານໄດ້ເປັນຢ່າງດີ ເຊິ່ງສະແດງອອກໃຫ້ເຫັນເປັນຕົ້ນ: ດ້ານວຽກງານການເມືອງ ແມ່ນໄດ້ເອົາໃຈໃສ່ສຶກສາອົບຮົມໃຫ້ແກ່ສະມາຊິກພັຫ-ພະນັກງານຍຶດໝັ້ນໃນອຸດົມການຂອງພັກ, ມີທັດສະນະຫຼັກໝັ້ນຊົນຊັ້ນ, ໃຫ້ຮູ້ຈໍາແນກອັນຜິດ-ອັນຖື, ຮູ້ຈໍາແນກມິດ ແລະສັດຕູໄດ້ຢ່າງຈະແຈ້ງ, ມີຄວາມຈົ່ງຮັກພັກດີຕໍ່ພັກ, ຕໍ່ປະເທດຊາດ, ສາມາດຕີລາຄາໃຫ້ຄະແນນໄດ້ 2 ຄະແນນ, ດ້ານວຽກງານແນວຄິດແມ່ນໄດ້ມີຄວາມເປັນເອກະພາບຕໍ່ແນວທາງປ່ຽນແປງໃໝ່ຂອງພັກ, ເປັນເຈົ້າການໃນການປະຕິບັດໜ້າທີ່ວຽກງານທີ່ໄດ້ຮັບການມອບໝາຍຢ່າງມີຜົນສໍາເລັດສາມາດຕີລາຄາໃຫ້ຄະແນນໄດ້ 1,5 ຄະແນນ, ດ້ານການຈັດຕັ້ງຄະນະໜ່ວຍພັກໄດ້ນໍາພາສະມາຊິກພັກຮ່ວມຊີວິດໜ່ວຍຢ່າງເປັນປົກກະຕິ ແລະຈ່າຍເງິນສະຕິພັກທຸກເດືອນຕີລາຄາໄດ້ 1 ຄະແນນ, ດ້ານແບບແຜນການນໍາພາ-ວິທີການເຮັດວຽກຕີລາຄາໄດ້ 2 ຄະແນນ ແລະດ້ານຄວາມຮັບຜິດຊອບຕໍ່ໜ້າທີ່ການເມືອງສາມາດຕີລາຄາໄດ້ 2,5 ຄະແນນ; ທັງໝົດນີ້, ແມ່ນເປັນການຢັ້ງຢືນເຖິງມາດຖານເງືອນໄຂຕ່າງໆ ແລະສາມາດສະຫຼຸບຕີລາເປັນໜ່ວຍພັກປອດໃສ, ເຂັ້ມແຂງ, ໜັກແໜ້ນໄດ້ຢ່າງແທ້ຈິງ.

ນອກຈາກນັ້ນ: ທ່ານຍັງໃຫ້ຮູ້ຕຶ່ມອີກວ່າ: ສໍາລັບທິດທາງແຜນການປະຈໍາປີ 2021 ຈະສູ້ຊົນສ້າງສະມາຊິກພັກປອດໃສ, ເຂັ້ມແຂງ, ໜັກແໜ້ນໃຫ້ໄດ້ 95% ແລະ ສ້າງໜ່ວຍພັກປອດໃສ, ເຂັ້ມແຂງ, ໜັກແໜ້ນໃຫ້ໄດ້ 9-10 ຄະແນນ, ເພື່ອຮັກສານາມມະຍົດດັ່ງກ່າວໃວ້.

ໂອກາດນີ້: ທ່ານ ບຸນຫຼາຍ ບຸດທິ ຄະນະປະຈໍາພັກແຂວງ, ຫົວໜ້າຈັດຕັ້ງແຂວງ, ກ່ອນອື່ນໝົດກໍ່ໄດ້ສະແດງຄວາມຊົມເຊີຍຕໍ່ຄະນະໜ່ວຍພັກດັ່ງກ່າວທີ່ສາມາດຍາດແຫຍ່ງຜົນງານຕ່າງໆໄດ້ຫຼາຍດ້ານ, ພ້ອມທັງໄດ້ຮຽກຮ້ອງມາຍັງຄະນະໜ່ວຍພັກກໍ່ຄືສະມາຊິກພັກທຸກສະຫາຍ, ຈົ່ງພ້ອມກັນຮັດແໜ້ນຄວາມສາມັກຄີພາຍໃນໃຫ້ແໜ້ນແຟ້ນ, ພາຍນອກໃຫ້ກວ້າງຂວາງ, ມີຄວາມຊ່ວຍເຫຼື່ອເຊິ່ງກັນ ແລະກັນດ້ວຍຄວາມຈິງໃຈ ແລະສຶບຕໍ່ຮັກສາມູນເຊື້ອນາມມະຍົດຂອງໜ່ວຍພັກໃວ້ໃຫ້ຄົງຢູ່ຕະຫຼອດໄປ.