ມີເດຍລາວແຂວງວຽງຈັນ ພາບ-ຂ່າວ:ນັກຂ່າວເມືອງວັງວຽງ. ເພື່ອປະຕິບັດຕາມນະໂຍບາຍຂອງພັກ-ລັດທີ່ມີຕໍ່ພະນັກງານຜູ້ທີ່ມີຜົນງານຄຸນງາມຄວາມດີໃນພາລະກິດຮັບໃຊ້ການປະຕິວັດຊາດປະຊາທິປະໄຕຜ່ານມາ. ໃນວັນທີ 24 ມີຖຸນາ 2021 ນີ້ຢູ່ທີຫ້ອງປະຊຸມຊັ້ນ 3 ຂອງຫ້ອງວ່າການປົກຄອງເມືອງວັງວຽງ ແຂວງວຽງຈັນ ຫ້ອງການແຮງງານ ແລະ ສະຫວັດດີການສັງຄົມເມືອງວັງວຽງ,ເມືອງ ກາສີ ແລະ ເມືອງ ແມດ ໄດ້ຈັດພິທີມອບ-ຮັບເງີນອຸດໜູນເທື່ອດຽວ ຕາມດຳລັດ272/ລບ ງວດ IV ປະຈໍາປີ 2020 ຈໍານວນ 27 ທ່ານ ຍິງ 5 ທ່ານ, ເປັນເງີນທັງໝົດ 615,462,000 ກີບ ໃນນີ້ມີເມືອງວັງວຽງ 10 ທ່ານ, ຍິງ 3 ທ່ານ, ເມືອງກາສີ 7 ທ່ານ, ຍິງ 1 ທ່ານ ແລະ ເມືອງ ແມດ ມີ 10 ທ່ານ, ຍິງ 1 ທ່ານ

ໂດຍເປັນກຽດເຂົ້າຮ່ວມຂອງ ທ່ານ ສຸວຽງທອງ ວົງຈຳປາ ຮອງເລຂາພັກເມືອງວັງວຽງ, ມີ ທ່ານ ຍົມສອນ ຄຳມາສີ ຫົວໜ້າພະແນກແຮງງານ ແລະ ສະຫວັດດີການສັງຄົມແຂວງວຽງຈັນ, ມີພະນັກງານຫ້ອງການແຮງງານ ແລະ ສະຫວັດດີການສັງຄົມເມືອງວັງວຽງ, ເມືອງການສີ ແລະ ເມືອງ ແມດ ມີຄະນະກຳມະການຄົ້ນຄວ້ານະໂຍບາຍຂັ້ນເມືອງ ແລະ ພາກສ່ວນທີ່ກ່ຽວຂ້ອງເຂົ້າຮ່ວມ.

ເປັນກຽດກ່າວມອບເງີນໂດຍທ່ານ ຍົມສອນ ຄຳມາສີ ຫົວໜ້າພະແນກແຮງງານ ແລະ ສະຫວັດດີການສັງຄົມແຂວງວຽງຈັນກ່າວຮັບໂດຍທ່ານ ສຸວຽງທອງ ວົງຈຳປາ ຮອງເລຂາພັກເມືອງວັງວຽງ ຫລັງຈາກນັ້ນທ່ານຮອງເລຂາພັກເມືອງກໍ່ໄດ້ມອບເງີນຈຳນວນດັ່ງກ່າວໃຫ້ກັບຫົວໜ້າຫ້ອງການແຮງງານງານສະຫວັດດີການ ທັງ 3 ເມືອງ . ເພື່ອມອບໃຫ້ກັບຄອບຄົວບັນດາທ່ານທີ່ໄດ້ຮັບເງີນອຸດໜູນທັງ 3 ເມືອງ ໂດຍຊ່ອງໜ້າຂອງຄະນະກຳມະການຄົ້ນຄວ້ານະໂຍບາຍຂັ້ນເມືອງ ແລະ ພາກສ່ວນທີ່ກ່ຽວຂ້ອງເປັນສັກຄີພິຍານ.
ໃນຕອນທ້າຍກອງປະຊຸມທ່ານຮອງເລຂາພັກເມືອງໄດ້ໃຫ້ກຽດໂອ້ລົມເຊີ່ງທ່ານໄດ້ເນັ້ນໃຫ້ບັນດາເປົ້າໝາຍທີ່ໄດ້ຮັບອຸດໜູນນະໂຍບາຍຈົ່ງນໍາໃຊ້ເງີນທີ່ໄດ້ຮັບໃນຄັ້ງນີ້ໄປໜູນໃຊ້ເຂົ້າພັດທະນາສ້າງສາເສດຖະກິດຄອບຄົວຂອງຕົນໃຫ້ເກີດຜົນປະໂຫຍດອັນສູງສຸດ.