ມີເດຍລາວແຂວງວຽງຈັນ (ພາບ-ຂ່າວ: ອຳພອນ ນັກຂ່າວເມືອງກາສີ) ເພື່ອເປັນການສານຝັນໃຫ້ນ້ອງນ້ອຍນັກຮຽນ ທີ່ຢູ່ເຂດຫ່າງໄກສອກຫຼີກ ໄດ້ມີອາຄານສະຖານທີ່ຮ່ຳຮຽນທີ່ແໜ້ນໜາຖາວອນໝັ້ນຄົງ ແລະ ໄດ້ຮັບຄວາມຮູ້ ທີ່ຫຼາກຫຼາຍຂື້ນ, ຍ້ອນເຫັນໄດ້ຄືແນວນັ້ນ ທາງທີມງານນັກທຸລະກິດຜູ້ໃຈບຸນ ຈຶ່ງໄດ້ ຮ່ວມກັນຈັດຕັ້ງໂຄງການໜຶ່ງຂື້ນມາ ເພື່ອໃຫ້ການຊ່ວຍເຫຼືອສ້າງໂຮງຮຽນຫຼັງໃໝ່ ໃຫ້ນ້ອງນ້ອຍນັກຮຽນ ບ້ານຫ້ວຍຕັ້ງນາຍ ເມືອງກາສີ ແຂວງວຽງຈັນ ໂດຍມີຊື່ໂຄງ ການວ່າ: ໂຄງການຮ່ວມປັນຮັກ Better together ອາສາກູ້ໄພນະຄອນຫຼວງວຽງຈັນ 1624

ເຊີ່ງໂຄງການດັ່ງກ່າວໄດ້ຮັບການຊ່ວຍເຫຼືອຈາກຫຼາຍກວ່າ 52 ພາກສ່ວນ ແລະ ພາຍຫຼັງທີ່ການກໍ່ສ້າງໂຮງຮຽນສຳເລັດ 100% ທາງອຳນາດການປົກຄອງເມືອງ ຮ່ວມກັບໂຄງການຮ່ວມປັນຮັກ ກໍ່ໄດ້ມີພິທີມອບ-ຮັບ ຂື້ນຢ່າງເປັນທາງການໃນວັນທີ 18 ມິຖຸນາ 2021ຜ່ານມານີ້ ຢູ່ທີ່ບ້ານຫ້ວຍຕັ້ງນາຍ ເມືອງກາສີ ແຂວງວຽງຈັນ, ໂດຍການເປັນກຽດເຂົ້າຮ່ວມຂອງ ທ່ານ ສີທົນ ແສງພະຈັນ ກຳມະການພັກແຂວງ ເລຂາພັກເມືອງ ເຈົ້າເມືອງໆກາສີ, ມີທ່ານ ນາງ ວົງຈັນ ບົວແພງ ປະທານໂຄງການ ຮ່ວມປັນຮັກ Better together ອາສາກູ້ໄພນະຄອນຫຼວງວຽງຈັນ 1624 ພ້ອມດ້ວຍ ທີມງານ, ມີທ່ານ ລາຢູ ແສນໃຈວຸດ ກຳມະການພັກເມືອງ ຫົວໜ້າຫ້ອງການ ສຶກສາທິ ການ ແລະ ກິລາເມືອງກາສີ, ມີພໍ່ແມ່ປະຊາຊົນ ແລະ ນ້ອງໆນັກຮຽນເຂົ້າຮ່ວມ.

ສຳລັບການກໍ່ສ້າງໂຮງຮຽນດັ່ງກ່າວ ແມ່ນໄດ້ລົງມືກໍ່ສ້າງມາແຕ່ວັນທີ 28 ທັນວາ 2020 ແລະ ສຳເລັດ ໃນວັນທີ 9 ເມສາ 2021 ເຊີ່ງເປັນອາຄານຄອນກີດຊັ້ນດຽວ ຂະໜາດ (8 ແມັດ ຄູນ 32 ແມັດ) ມີທັງໝົດ 04ຫ້ອງ ລວມມູນຄ່າການກໍ່ສ້າງທັງໝົດແມ່ນ 180 ລ້ານກີບ ໂດຍແມ່ນບໍລິສັດປັນຍາທິລາດກໍ່ສ້າງຂົວທາງເຄຫາສະຖານ ຈຳກັດ ເປັນຜູ້ຮັບເໝົາກໍ່ສ້າງ.

ໃນໂອກາດນີ້ ທ່ານ ນາງ ວົງຈັນ ບົວແພງ ປະທານໂຄງການ ຮ່ວມປັນຮັກ ໄດ້ໃຫ້ກຽດກ່າວມອບອາຄານຮຽນ ໃຫ້ອຳນາດການປົກຄອງເມືອງກາສີ ເຊີ່ງໃຫ້ກຽດຂື້ນຮັບໂດຍແມ່ນ ທ່ານ ລາຢູ ແສນໃຈວຸດ ຫົວໜ້າຫ້ອງການສຶກສາທິການ ແລະ ກິລາເມືອງກາສີ ແລະ ທ່ານກໍ່ໄດ້ກ່າວມອບຕໍ່ໃຫ້ຜູ້ອຳນວຍການໂຮງຮຽນ ພ້ອມດ້ວຍ ອຳນາດການປົກຄອງບ້ານຫ້ວຍຕັ້ງນາຍ ເປັນຜູ້ປົກປັກຮັກສາ ແລະ ນຳໃຊ້. ພ້ອມນີ້ທີມງານໂຄງການຮ່ວມປັນຮັກຍັງໄດ້ ມອບອຸປະກອນເຄື່ອງໃຊ້ໄຟຟ້າ ໃຫ້ຜູ້ ອຳນວຍການໂຮງຮຽນ ພ້ອມທັງ ມອບອຸປະກອນການສຶກສາໃຫ້ແກ່ນ້ອງນ້ອຍ ນັກຮຽນ ຕື່ມອີກ. ເພື່ອເປັນການສະແດງຄວາມຮູ້ບຸນຄຸນ ແລະ ຈາລຶກຄຸນງາມຄວາມດີ ຕໍ່ ທີມງານໂຄງການຮ່ວມປັນຮັກ ທ່ານເຈົ້າເມືອງໆກາສີ ກໍ່ໄດ້ໃຫ້ກຽດມອບໃບກຽດຕິຄຸນ ຂອງທ່ານເຈົ້າແຂວງໆວຽງຈັນ ໃຫ້ທີມງານໂຄງການຮ່ວມປັນຮັກ.

ໃນໂອກາດນີ້ ທ່ານເຈົ້າເມືອງໆກາສີ ຍັງໄດ້ກ່າວສະແດງຄວາມຍ້ອງຍໍຊົມເຊີຍ ແລະ ຂອບອົກ ຂອບໃຈຕໍ່ທີມງານໂຄງການຮ່ວມປັນຮັກ ທີ່ໄດ້ມີນ້ຳໃຈເອື້ອເຟື້ອເພື່ອແຜ່ ເປັນຫ່ວງ ເປັນໃຍໃຫ້ການຊ່ວຍເຫຼືອດ້ານພື້ນຖານໂຄ່ງລ່າງ ໃນວຽກງານການສຶກສາ ຢູ່ເມືອງກາສີ ໃນຄັ້ງນີ້ ເຮັດໃຫ້ນ້ອງນ້ອຍນັກຮຽນຢູ່ເຂດຫ່າງໄກສອກຫຼີກ ໄດ້ມີອາຄານຫຼັງໃໝ່ ທີ່ແໜ້ນໜາຖາວອນ ມີຄວາມສະດວກໃນການສຶກສາຮ່ຳຮຽນ ແລະ ໃນໂອກາດໜ້າ ກໍຫວັງວ່າທີມງານໂຄງການຮ່ວມປັນຮັກ ຈະສືບຕໍ່ໃຫ້ການສະໜັບສະໜູນຊ່ວຍເຫຼືອ ເມືອງກາສີຕື່ມອີກ.

ພ້ອມນັ້ນທ່ານຍັງໄດ້ຮຽກຮ້ອງໃຫ້ອຳນາດການປົກຄອງບ້ານ ພ້ອມດ້ວຍຄູອາຈານ ຕະຫຼອດຮອດພໍ່ແມ່ປະຊາຊົນ ແລະ ນ້ອງນ້ອຍນັກຮຽນ ຈົ່ງພ້ອມກັນເປັນເຈົ້າການບົວລະບັດປົກປັກຮັກສາໂຮງຮຽນຫຼັງນີ້ ໃຫ້ໄດ້ນຳໃຊ້ຍາວນານ ເພື່ອກໍ່ໃຫ້ເກີດຜົນປະໂຫຍດອັນສູງສຸດ. ພ້ອມດຽວກັນນີ້ ເພື່ອເຮັດໃຫ້ໂຮງຮຽນ ບ້ານຫ້ວຍຕັ້ງນາຍ ກາຍເປັນໂຮງຮຽນສີຂຽວ ທາງຄະນະນຳຂອງເມືອງ ພ້ອມດ້ວຍທີມງານໂຄງການຮ່ວມປັນຮັກ ແລະ ນ້ອງນອ້ຍນັກຮຽນ ໄດ້ພ້ອມກັນ ປູກຕົ້ນໄມ້ອ້ອມເດີ່ນໂຮງຮຽນ ເຊີ່ງເຮັດໃຫ້ບັນຍາກາດເຕັມໄປດ້ວຍຄວາມຄຶກຄື້ນ.