ມິເດຍລາວແຂວງໄຊສົມບູນ ຂ່າວ: ຈິນລະວອນ ວໍລະສົມບູນ ພິທີ ຮັບຮອງແຜນການກໍ່ສ້າງໜ່ວຍພັກປອດໃສ, ເຂັ້ມແຂງ ແລະ ໜັກແໜ້ນ ຂອງ 3 ໜ່ວຍພັກ ທີ່ຂຶ້ນກັບຄະນະພັກຮາກຖານພະແນກການເງິນ ແຂວງໄຊສົມບູນ ຄື: ໜ່ວຍພັກພະແນກການເງິນ ແຂວງ, ໜ່ວຍພັກສ່ວຍສາອາກອນ ປະຈຳແຂວງ ແລະ ໜ່ວຍພັກຄັງເງິນແຫ່ງຊາດ ປະຈຳແຂວງ ໄດ້ຈັດຂຶ້ນໃນຕອນເຊົ້າຂອງວັນທີ 3 ມີນາ 2021 ນີ້ ທີ່ຫ້ອງປະຊຸມພະແນກການເງິນ ແຂວງ ພາຍໃຕ້ການເປັນປະທານຂອງສະຫາຍ ປອ ທອງປະເສີດ ໄຊຍະລາດ, ກຳມະການພັກແຂວງ, ຮອງເລຂາຄະນະພັກຮາກຖານພະແນກການເງິນ ແຂວງ ໂດຍການໃຫ້ກຽດເຂົ້າຮ່ວມ ຂອງສະຫາຍ ພອຍຄຳ ຮຸ່ງບຸນຍວງ, ຮອງເລຂາພັກແຂວງ ພ້ອມດ້ວຍ ເລຂາ-ຮອງເລຂາໜ່ວຍພັກ ກຸ່ມເສດຖະກິດ ແລະ ພະນັກງານສະມາຊິກພັກ ພາຍໃນ 3 ໜ່ວຍ ທີ່ຂຶ້ນກັບຄະນະພັກຮາກຖານພະແນກການເງິນ ແຂວງ ເຂົ້າຮ່ວມ.

ໂອກາດນີ້ ສະຫາຍເລຂາໜ່ວຍພັກ ທັງ 3 ໜ່ວຍພັກ ທີ່ຂຶ້ນກັບຄະນະພັກຮາກຖານພະແນກການເງິນ ແຂວງ ໄດ້ຜັດປ່ຽນກັນຂຶ້ນຜ່ານບົດສະຫຼຸບ ແລະ ແຜນການ ສ້າງໜ່ວຍພັກປອດໃສ, ເຂັ້ມແຂງແລະ ໜັກແໜ້ນ ຊຶ່ງຕະຫຼອດໄລຍະຜ່ານມາ ຄະນະໜ່ວຍພັກ ທັງ 3 ໜ່ວຍ ໄດ້ຖືເອົາການສຶກສາອົບຮົມການເມືອງ-ແນວຄິດ ໃຫ້ສະມາຊິກພັກ, ພະນັກງານ-ລັດຖະກອນ ເປັນບັນຫາກົກ ໂດຍການເຊື່ອມຊຶມແນວທາງນະໂຍບາຍ, ມະຕິ, ຄຳສັ່ງ, ຂໍ້ກຳນົດ, ກົດລະບຽບຂອງພັກ ແລະ ກົດໝາຍຕ່າງໆ ທີ່ພັກ-ລັດ ວາງອອກແຕ່ລະໄລຍະ ໃຫ້ສະມາຊິກພັກ-ພະນັກງານ ໃນຄວາມຮັບຜິດຊອບຂອງຕົນ ຢ່າງເປັນປົກກະຕິ ເຮັດໃຫ້ເຂົາເຈົ້າມີຄວາມເຊື່ອໝັ້ນ ຕໍ່ການນຳພາຂອງພັກ ດ້ວຍຄວາມອຸ່ນອຽນທຸ່ນທ່ຽງ, ມີສະຕິຕໍ່ການຈັດຕັ້ງ, ມີລະບຽບວິໄນ ທັງເປັນເຈົ້າການປະຕິບັດໜ້າທີ່ການເມືອງ ແລະ ບັນດາຄາດໝາຍມະຕິກອງປະຊຸມ ທີ່ໄດ້ກຳນົດໄວ້ ໄດ້ເປັນຢ່າງດີ, ສາມາດຕີຖອຍປະກົດການຫຍໍ້ທໍ້ຕ່າງໆ ໃຫ້ຫຼຸດລົງ ແລະ ໝົດໄປ ເທື່ອລະກ້າວ ພ້ອມທັງຍົກສູງສະຕິຕື່ນຕົວ ຕໍ່ການປະກອບສ່ວນເຂົ້າໃນທຸກຂົງເຂດວຽກງານ ຢ່າງຕັ້ງໜ້າ. ໂອກາດດຽວກັນນີ້ ສະຫາຍ ສົມພອນ ທຳມະວົງສາ, ປະທານກວດກາຄະນະພັກຮາກຖານ ໄດ້ຂຶ້ນຜ່ານມະຕິລົງ ວ່າດ້ວຍການຮັບຮອງແຜນການສ້າງໜ່ວຍພັກປອດໃສ, ເຂັ້ມແຂງ ແລະ ໜັກແໜ້ນ ຂອງ 3 ໜ່ວຍພັກ. ຈາກນັ້ນ ຜູ້ຕາງໜ້າຄະນະໜ່ວຍພັກ ທັງ 3 ໜ່ວຍ ໄດ້ຂຶ້ນຈັບມືແຂ່ງຂັນກັນ ຢ່າງເປັນທາງການ. ໃນໂອກາດທີ່ມີຄວາມໝາຍ-ຄວາມສຳຄັນ ນີ້ ສະຫາຍຮອງເລຂາພັກ ແຂວງ ໄດ້ມີຄຳເຫັນໂອ້ລົມຕໍ່ພິທີ ຊຶ່ງສະຫາຍໄດ້ເນັ້ນໜັກ ໃຫ້ຄະນະໜ່ວຍພັກທັງ 3 ໜ່ວຍ ຈົ່ງສືບຕໍ່ຊີ້ນຳ-ນຳພາ ດ້ານວຽກງານການເມືອງ-ແນວຄິດ ໃຫ້ພະນັກງານສະມາຊິກພັກ, ພະນັກງານ-ລັດຖະກອນ ດ້ວຍຄວາມຮັບຜິດຊອບສູງ, ຕັ້ງໜ້າຕີຖອຍທຸກໜໍ່ແໜງທີ່ກໍ່ໃຫ້ເກີດປະກົດການຫຍໍ້ທໍ້ພາຍໃນພັກ ໃຫ້ທັນເວລາ ໄປພ້ອມກັນກັບການເຕົ້າໂຮມຄວາມສາມັກຄີພາຍໃນໃຫ້ເປັນປຶກແຜ່ນ. ພ້ອມນີ້ ສະມາຊິກພັກ-ພະນັກງານ ແຕ່ລະສະຫາຍ ຕ້ອງມີສະຕິເຄົາລົບຕໍ່ການຈັດຕັ້ງ, ມີລະບຽບວິໄນຢ່າງເຂັ້ມງວດ, ມີແບບແຜນການດຳລົງຊີວິດທີ່ປອດໃສຂາວສະອາດ, ມີແບບແຜນວິທີເຮັດວຽກ ຕາມຫຼັກການລວມສູນປະຊາທິປະໄຕ-ນຳພາເປັນໝູ່ຄະນະ ໂດຍແບ່ງງານໃຫ້ບຸກຄົນຮັບຜິດຊອບ ຢ່າງລະອຽດຈະແຈ້ງ ແລະ ພ້ອມກັນແຂ່ງຂັນກັນ ກໍ່ສ້າງໜ່ວຍພັກປອດໃສ, ເຂັ້ມແຂງ ແລະ ໜັກແໜ້ນ ໃຫ້ປະກົດຜົນເປັນຈິງ.