ພິທີເປີດການກໍ່ສ້າງຟື້ນຟູຊົນລະປະທານໂຄງການຍ່ອຍໄລຍະ III ນ້ຳງາດ ເມືອງຮຸນ ແຂວງອຸດົມໄຊ ໄດ້ຈັດຂື້ນໃນວັນທີ 7 ເມສາ 2021 ນີ້ ທີ່ສະໂມສອນບ້ານສົມໄຊ ເມືອງຮຸນ ໂດຍການເຂົ້າຮ່ວມຂອງ ທ່ານ  ບຸນທັນ ສຸພັດທອນ ຮອງເຈົ້າເມືອງໆຮຸນ, ມີ ທ່ານ ບຸນເກີດ ສະຫນອງໄຊ ຮອງຫົວຫນ້າພະແນກກະສິກຳ ແລະ ປ່າໄມ້ແຂວງ ມີຕາງຫນ້າຈາກໂຄງການພັດທະນາໂຄງລ່າງພື້ນຖານຊົນນະບົດພາກເໜືອ-ທືນເພີ່ມ ຫລື (NRI-AF) ມີບໍລິສັດທີ່ປຶກສາໂຄງການ, ຄະນະຄຸ້ມຄອງການນຳໃຊ້ນຳ, ອົງການປົກຄອງບ້ານນາສົມໄຊ ແລະປະຊາຊົນພາຍໃນບ້ານເຂົ້າຮ່ວມ.

ໂຄງການພັດທະນາໂຄງລ່າງຊົນນະບົດພາກເໜືອ-ທຶນເພີ່ມ (NRI-AF) ໄດ້ຮັບການອານຸມັດຈາກທະນາຄານພັດທະນາອາຊີ (ADB) ໃນວັນທີ 31 ພືດສະພາ 2017 ແລະ ໄດ້ຮັບສິດນໍາໃຊ້ໄດ້ໃນວັນທີ 26 ກໍລະກົດ  2017 ໄດ້ຈັດຕັ້ງປະຕິບັດຢູ່ 4 ແຂວງຄື: ແຂວງອຸດົມໄຊ, ຜົ້ງສາລີ, ຫຼວງນໍ້າທາ ແລະ ແຂວງບໍ່ແກ້ວ. ສໍາລັບແຂວງອຸດົມໄຊ ໄດ້ຈັດຕັ້ງປະຕິບັດຢູ່ 2 ​ເມືອງເປົ້າໝາຍຂອງໂຄງການຄື: ​ເມືອງແບງ ແລະ ເມືອງຮຸນ, ຈໍານວນ 4 ໂຄງການຍ່ອຍ, ຈໍານວນ 16 ຫົວງານ, ເນື້ອທີ 1,572 ເຮັກຕາ, ບ້ານທີ່ໄດ້ຮັບຜົນປະໂຫຍດ ມີ 24 ບ້ານ, 3,734 ຄອບຄົວ, ພົນລະເມືອງ 15,863 ຄົນ. ສຳລັບໂຄງຍ່ອຍໄລຍະ III ຊົນລະປະທານນໍ້າງາດ ເມືອງຮຸນ ກວມເອົາ 6 ຫົວງານ, ເນື້ອທີ່ 390 ເຮັກຕາ, ບ້ານທີ່ໄດ້ຮັບຜົນປະໂຫຍດ ມີ 6 ບ້ານ, 1.097 ຄອບຄົວ, ຄອງເໝຶອງຍາວ 16,541 ແມັດ ໃນນີ້ຄອງເໝືອງເບຕົງເສີມເຫຼັກຍາວ 12,258 ແມັດ, ຄອງເໝືອງດິນ ຍາວ 4,283 ແມັດ ແລະ ຄານຄອງເໝືອງມີ 232 ຈຸດ,  ປະຈຸບັນ ຢູ່ໃນຂັ້ນຕອນກະກຽມ ແລະ ກໍ່ສ້າງບາງຈຸດ ກຳນົດການກໍ່ສ້າງ 12 ເດືອນ ເລີ້ມແຕ່ 12 ກຸມພາ 2021 ຫາ 31 ມັງກອນ 2022  ໂດຍແມ່ນບໍລິສັດວິໄລກໍ່ສ້າງສ້ອມແປງເຄຫາສະຖານ, ຂົວ-ທາງ ແລະ ຊົນລະປະທານ ຈຳກັດຜູ້ດຽວ ເປັນຜູ້ຮັບເໝົາກໍ່ສ້າງ ໃນມູນຄ່າ 1 ລ້ານ 1 ແສນ ກວ່າໂດລາສະຫະລັດ.

ສຳລັບໂຄງການຍ່ອຍໄລຍະ I  ສໍາເລັດ 2 ໂຄງການ, ໃນນີ້ມີໂຄງການຊົນລະປະທານ ນໍ້າແບງ ເມືອງແບງ ແລະ ໂຄງການຊົນລະປະທານ ນໍ້າອຸ່ນ ເມືອງຮຸນ ເຊີ່ງກວມເອົາ 4 ຫົວງານ, ເນື້ອທີ່ 610 ເຮັກຕາ ບ້ານທີ່ໄດ້ຮັບຜົນປະໂຫຍດ ມີ 10 ບ້ານ, 1.576 ຄອບຄົວ ສໍາເລັດປີ 2019 ໄດ້ຟື້ນຟູໂຄງການຍ່ອຍໄລຍະ II ຊົນລະປະທານນໍ້າຫາວ ເມືອງແບງ ເຊີ່ງກວມເອົາ 6 ຫົວງານ, ເນື້ອທີ່ 572 ເຮັກຕາ ບ້ານທີ່ໄດ້ຮັບຜົນປະໂຫຍດ ມີ 9 ບ້ານ, 1.061 ຄອບຄົວ ເຊີ່ງເລີມລົງມືກໍ່ສ້າງແຕ່ຕົ້ນເດືອນ ເມສາ 2020 ເປັນຕົ້ນມາ ຄວມຄືບໜ້າການກໍ່ສ້າງມາຮອດປະຈຸບັນສໍາເລັດ 11.25%.

ພາບ-ຂ່າວ: ແສງອາທິດ