ກະຊວງ ປ້ອງກັນຄວາມສະຫງົບໄດ້ຈັດພິທີໂຮມຊຸມໜຸມສະເຫຼີມສະຫຼອງ ວັນສ້າງຕັ້ງກຳລັງ ປ້ອງກັນຄວາມປະຊົນ ຄົບຮອບ 60 ປີ( 5ເມສາ1961-5ເມສາ 2021) ທີ່ສະໂມສອນກະຊວງ ປ້ອງກັນຄວາມສະຫງົບ ໃນວັນທີ 5 ເມສາ 2021, ເປັນກຽດເຂົ້າຮ່ວມໂດຍ ສະຫາຍ ທອງລຸນສີສຸລິດ ເລຂາທິການໃຫຍ່ ຄະນະບໍລິຫານງານສູນກາງພັກ ປະທານປະເທດແຫ່ງ ສປປ ລາວ, ສະຫາຍ ພັນຄຳ ວິພາວັນ ກຳມະການກົມການເມືອງສູນກາງພັກນາຍົກລັດຖະມົນຕີ, ມີບັນດາທ່ານການນໍາພັກ-ລັດຂັ້ນສູງ, ພະນັກງານອາວຸໂສບຳນານ, ແຂກຮັບເຊີນ ແລະ ນາຍແລະພົນຕຳຫຼວດ ເຂົ້າຮ່ວມ.

ສະຫາຍ ທອງລຸນສີສຸລິດ ເລຂາທິການໃຫຍ່ ຄະນະບໍລິຫານງານສູນກາງພັກ ປະທານປະເທດແຫ່ງ ສປປ ລາວ

ສະຫາຍ ພົທ ວິໄລ ຫຼ້າຄຳຟອງ ກຳມະການກົມການເມືອງສູນກາງພັກ ລັດຖະມົນຕີກະຊວງປ້ອງກັນຄວາມສະຫງົບ  ໄດ້ກ່າວຄຳເຫັນຕໍ່ພິທີສະເຫຼີມສະຫຼອງວ່າ: ປະຫວັດສາດແຫ່ງການກຳເນີດ ແລະ ຄວາມເປັນມາຂອງກໍາລັງປ້ອງກັນຄວາມສະຫງົບປະຊາຊົນແມ່ນຕິດພັນສະໜິດແໜ້ນກັບມູນເຊື້ອອັນສະຫງ່າງາມຂອງຊາດ, ມູນເຊື້ອແຫ່ງການນຳພາອັນປີຊາສາມາດສະຫຼາດສ່ອງໃສຂອງພັກເຮົາ ໃນພາລະກິດການປະຕິວັດປົດປ່ອຍຊາດໃນເມື່ອກ່ອນ, ກໍ່ຄືພາລະກິດປົກປັກຮັກສາ ແລະ ສ້າງສາພັດທະນາປະເທດຊາດໃນປະຈຸບັນ.

ການກຳເນີດເກີດຂຶ້ນ ຂອງກໍາລັງປ້ອງກັນຄວາມສະຫງົບປະຊາຊົນ ແມ່ນເພື່ອຕອບສະໜອງຄວາມຮຽກຮ້ອງຕ້ອງການຂອງພາລະກິດຕໍ່ສູ້ປົດປ່ອຍຊາດ ກໍ່ຄືພາລະກິດປົກປັກຮັກສາ, ສ້າງສາພັດທະນາປະເທດຊາດໃນປະຈຸບັນ; ພໍແຕ່ໄດ້ຮັບການສ້າງຕັ້ງຂຶ້ນ, ກຳລັງປ້ອງກັນຄວາມສະຫງົບປະຊາຊົນ ກໍ່ໄດ້ປະເຊີນໜ້າໂດຍກົງກັບກຸ່ມຄົນບໍ່ດີ ທີ່ມີກໍາລັງເໜືອກວ່າຕັ້ງຫຼາຍເທົ່າທາງດ້ານເສດຖະກິດ, ດ້ານກຳລັງພົນ ແລະ ອາວຸດຍຸດໂທປະກອນທີ່ທັນສະໄໝ; ຜ່ານການຝຶກຝົນທົດສອບໃນແປວໄຟແຫ່ງການຕໍ່ສູ້ປະຕິວັດ ໃນເງື່ອນໄຂທີ່ຫຍຸ້ງຍາກລໍາບາກກັນດານນັ້ນ ກໍາລັງປ້ອງກັນຄວາມສະຫງົບ ພ້ອມກັນກັບກອງທັບປະຊາຊົນລາວ ໄດ້ສ້າງວິລະກໍາອັນລໍ້າເລີດຈາລຶກໄວ້ໃນປຶ້ມຄຳປະຫວັດສາດ ຂອງຊາດ ແລະ ຂອງກຳລັງປ້ອງກັນຄວາມສະຫງົບປະຊາຊົນເຮົາ .

ສະຫາຍ ພົທ ວິໄລ ຫຼ້າຄຳຟອງ ກຳມະການກົມການເມືອງສູນກາງພັກ ລັດຖະມົນຕີກະຊວງປ້ອງກັນຄວາມສະຫງົບ

ຕະຫຼອດໄລຍະ 60 ປີ ແຫ່ງການກຳເນີດ ແລະ ເຕີບໃຫຍ່ຂະຫຍາຍຕົວ ຂອງກຳລັງປ້ອງກັນ ຄວາມສະຫງົບປະຊາຊົນ ມັນແມ່ນຂະບວນວິວັດແຫ່ງການທົດສອບອັນໃຫຍ່ຫຼວງ ໃນການຕໍ່ສູ້ຍືດເຍື້ອຍາວນານ, ລະອິດລະອ້ຽວ, ດຸເດືອດຂ້ຽວຂາດ, ຫຍຸ້ງຍາກລໍາບາກນາໆປະການ, ດ້ວຍນ້ຳໃຈປະຕິວັດອັນສູງສົ່ງ ຂອງກໍາລັງປ້ອງກັນຄວາມສະຫງົບປະຊາຊົນ ໄດ້ເສີມຂະຫຍາຍມູນເຊື້ອຕໍ່ສູ້ອັນເດັດດ່ຽວອາດຫານ, ບໍ່ຍອມຈຳນົນ ຍາດໄດ້ຜົນງານໄຊຊະນະອັນໃຫຍ່ຫຼວງ, ພ້ອມກັນນັ້ນ, ກຳລັງປ້ອງກັນຄວາມສະຫງົບປະຊາຊົນ ໄດ້ຮັບການປັບປຸງ-ກໍ່ສ້າງ ແລະ ເຕີບໃຫຍ່ຂະຫຍາຍຕົວທາງດ້ານຈຳນວນ ແລະ ຄຸນນະພາບ, ມີຄວາມໜັກແໜ້ນທາງດ້ານການເມືອງ-ແນວຄິດ, ເຂັ້ມແຂງທາງດ້ານການຈັດຕັ້ງ, ມີລະບຽບວິໄນເຂັ້ມງວດ, ມີຄວາມຊຳນິຊຳນານທາງດ້ານວິຊາສະເພາະ ແລະ ມີແບບແຜນທັນສະໄໝເປັນກ້າວໆ.

ໂອກາດທີ່ມີຄວາມໝາວຍຄວາມສໍາຄັນນີ້້້, ສະຫາຍ ທອງລຸນສີ ສຸລິດ ໄດ້ກ່າວສູນທອນພົດຕໍ່ພິທີ ໂດຍມີເນື້ອໃນບາງຕອນທີ່ສໍາຄັນວ່າ: ພາລະກິດຂອງກໍາລັງປ້ອງກັນຄວາມສະຫງົບໃນຍຸກ         ໃໝ່ແມ່ນ: ຕ້ານກັບກົນອຸບາຍຂອງກຸ່ມຄົນບໍ່ດີທີ່ມີເຈດຕະນາອັນບໍ່ດີຕໍ່ປະເທດຊາດ ແມ່ນໜ້າທີ່ຂອງກໍາລັງ ປກຊ-ປກສ ເປັນຜູ້ແບກຫາບໜັກກວ່າໝູ່, ເປັນຜູ້ປະເຊີນໜ້າຫຼາຍກວ່າໝູ່, ນອກຈາກຕ້ານກຸ່ມຄົນບໍ່ດີແລ້ວ ຍັງຕ້ອງສ້າງສັງຄົມໃຫ້ມີຄວາມສະຫງົບປອດໄພ, ສ້າງສະພາບແວດລ້ອມໃຫ້ປະຊາຊົນລາວໃນທົົ່ວປະເທດມີຄວາມອຸ່ນອ່ຽງໃຈ ໃນການດຳລົງຊີວິດ, ການທໍາມາຫາກິນຢ່າງສະຫງົບສັນຕິ; ປົກປ້ອງກົດໝາຍ ເຮັດໃຫ້ປະຊາຊົນມີທີີ່ເພິີ່ງ, ໃຫ້ປະຊາຊົນເຊືີ່ອໝັັ້ນ ໃນຄວາມເປັນທຳ, ຍຸຕິທໍາຂອງກໍາລັງປ້ອງກັນຄວາມສະຫງົບ, ຕ້ານອາຊະຍາກໍາທຸກຮູບແບບຂອງສັງຄົມ, ຕ້ານການກໍ່ການຮ້າຍອາຊະຍາກໍາຂ້າມຊາດ, ຕ້ານ ແລະ ສະກັດກັ້ນໄພສັງຄົມ ເປັນຕົ້ນ ບັນຫາຢາເສບຕິດ, ອຸປະຕິເຫດຕາມທ້ອງຖະໜົນ, ປຸ້ນຈີ້ຊິງຊັບ, ຂີ້ລັກງັດແງະ ແລະ ການກໍ່ອາຊະຍາກໍາປະເພດອື່ນໆ.

ດັ່ງນັ້ນ, ກໍາລັງປ້ອງກັນຄວາມສະຫງົບປະຊາຊົນ ຈະຕ້ອງໄດ້ສືບຕໍ່ປະຕິບັດໜ້າທີ່ຂອງຕົນ ດ້ວຍຄວາມຮັບຜິດຊອບອັນໃຫຍ່ຫຼວງ, ຄວາມມານະອົດທົນສູງ ແລະ ຄວາມກ້າຫານປະດິດສ້າງ, ສະດຸ້ງໄວ ເພື່ອຮັບມືກັບສິ່ງທ້າທາຍທົດສອບ ທີ່ອາດຈະເກີດຂື້ນ, ປັບປຸງແບບແຜນວິທີຄົ້ນຄິດ, ວິທີເຮັດວຽກ ຂອງຖັນແຖວພະນັກງານ ໃນຂົງເຂດວຽກງານປ້ອງກັນຄວາມສະຫງົບ ໃຫ້ຖວງທັນກັບສະພາບການໃນປະຈຸບັນ, ເສີມຂະຫຍາຍມູນເຊື້ອກໍາລັງປ້ອງກັນຄວາມສະຫງົບ ທົ່ວປວງຊົນຮອບດ້ານ ດ້ວຍການສືບຕໍ່ລົງກໍ່ສ້າງຮາກຖານຢູ່ທ້ອງຖິ່ນ ໃຫ້ມີຕາໜ່າງປ້ອງກັນຄວາມສະຫງົບທີ່ເຂັ້ມແຂງໜັກແໜ້ນ, ພະນັກງານ-ນັກຮົບ ຕ້ອງເປັນແບບຢ່າງສ້າງຄວາມເຊື່ອໝັ້ນໃຫ້ປະຊາຊົນ ເປັນທີ່ເພີງຂອງປະຊາຊົນ, ຮ່ວມທຸກຮ່ວມສຸກກັບປະຊາຊົນ ປະຕິບັດຕາມຄໍາຂັວນທີ່ວ່າ: ຕໍາຫຼວດ ແລະ ປະຊາຊົນ ໃຫ້ຄືປາກັບນໍ້າ, ຕໍາຫຼວດຕ້ອງມີຈິດໃຈຮັບໃຊ້ປະຊາຊົນ ຖືປະຊາຊົນເປັນກົກ, ຕ້ອງເຄັງຂັດຕໍ່ລະບຽບກົດໝາຍ, ມີຈັນຍາບັນ-ຈັນທໍາ ທີ່ແທ້ຈິງ, ກໍາລັງປ້ອງກັນຄວາມສະຫງົບໃນຍຸກໃໝ່ ຕ້ອງພະຍາຍາມກ້າວເຂົ້າສູ່ທັນສະໄໝ ນໍາໃຊ້ເຕັກໂນໂລຊີໃໝ່, ວິທະຍາສາດໃໝ່ ທີ່ສາມາດສື່ສານໄດ້ຢ່າງທັນການ ເພື່ອພັດທະນາໃຫ້ກໍາລັງປ້ອງກັນຄວາມສະຫງົບ ເຕີບຝຫຍ່ເຂັ້ມແຂງກ້າວຂື້ນຢ່າງບໍ່ຢຸດຢັ້ງ.

Medialaos MMD (ແຫຼ່ງຂໍ້ມູນຈາກ: ກະຊວງ ປກສ)