ມີເດຍລາວແຂວງໄຊສົມບູນ ຂ່າວ: ນາງ ຕູດ ຄໍາພໍໃຈ ພະແນກແຮງງານ ແລະ ສະຫວັດດີການສັງຄົມ ແຂວງໄຊສົມບູນ ໄດ້ຈັດພິທີປະກາດຮັບຮອງການຈັດຕັ້ງປະຕິບັດ ເນື້ອໃນຂໍແຂ່ງຂັນ 3 ດີ, 4 ບຸກ ແລະ 5 ເປັນເຈົ້າ ຂອງສາມອົງການຈັດຕັ້ງມະຫາຊົນ ຂອງພະແນກ ໃນວັນທີ 1 ເມສາ 2021 ນີ້ ທີ່ຫ້ອງປະຊຸມພະແນກຖະແຫຼງຂ່າວ, ວັດທະນະທໍາ ແລະ ທ່ອງທ່ຽວ ແຂວງ ໂດຍການເປັນປະທານຮ່ວມ ຂອງສະຫາຍ ວັນຄໍາເກັງ ຢ່າຊົ່ງກົວ, ກໍາມະການພັກແຂວງ ຫົວໜ້າພະແນກແຮງງານ ແລະ ສະຫວັດດີການສັງຄົມ ແຂວງ, ມີທ່ານ ເນັ່ງຢ່າງ ໃຈຫວັງໝັ້ນ, ປະທານສະຫະພັນກໍາມະບານ ແຂວງ ແລະ ທ່ານ ນາງ ສຸກຊົງ ຕົ່ງສື, ຮອງປະທານສະຫະພັນແມ່ຍິງ ແຂວງ, ມີປະທານຮາກຖານກໍາມະບານ, ເລຂາໜ່ວຍຊາວໜຸ່ມ ແລະ ປະທານສະຫະພັນແມ່ຍິງ ກຸ່ມວັດທະນະສັງຄົມ ພ້ອມດ້ວຍສະມາຊິກ 3 ອົງການຈັດຕັ້ງມະຫາຊົນ ພາຍໃນພະແນກ ເຂົ້າຮ່ວມ.

ໂອກາດນີ້ ຜູ້ເຂົ້າຮ່ວມໄດ້ຮັບຟັງການຜ່ານບົດສະຫລຸບ ການເຄື່ອນໄຫວວຽກງານ ປະຈຳປີ 2020 ແລະ ທິດທາງແຜນການ ປະຈຳປີ 2021 ຂອງ 3 ອົງການຈັດຕັ້ງມະຫາຊົນ ພະແນກແຮງງານ ແລະ ສະຫວັດດີການສັງຄົມ ແຂວງ ຕະຫຼອດໄລຍະຜ່ານມາ ກໍາມະບານຮາກຖານ ຂອງພະແນກ ໄດ້ເອົາໃຈໃສ່ປະຕິບັດພັນທະເສຍເງິນບໍາລຸງສະຖິຕິ ແລະ ເງິນກອງທຶນ ກໍາມະບານ ຢ່າງປົກກະຕິ ຊຶ່ງສາມາດເກັບເງິນບໍາລຸງ-ສະຖິຕິກໍາມະບານ ໄດ້ຈໍານວນ 876.000 ກີບ, ມອບໃຫ້ກໍາມະບານແຂວງຈໍານວນ 350.000 ກີບ, ເງິນກອງທຶນໄດ້ຈໍານວນ 1.380.000 ກີບ,ມອບໃຫ້ສະຫະພັນກໍາມະບານ ແຂວງ 1.380.000 ກີບ.

ພ້ອມນີ້ວຽກງານຈັດຕັ້ງຂໍ້ແຂ່ງຂັນ 4 ບຸກ ຂອງໜ່ວຍຊາວໜຸ່ມ ກໍໄດ້ເອົາໃຈໃສ່ສຶກສາອົບຮົມ-ການເມືອງ-ແນວຄິດ ໃຫ້ບັນດາສະມາຊິກພາຍໃນໜ່ວຍ ໂດຍຖືເອົາການຮ່ວມຊີວິດປະຈໍາເດືອນ ເປັນການສ່ອງແສງ, ຕໍານິສົ່ງຂ່າວ ເຊິ່ງກັນ ແລະ ກັນ ພ້ອມທັງເສຍເງິນສະຖິຕິ ຜູ້ລະ 5000 ກີບ ຕໍ່ເດືອນ ແລະ ສາມາດເກັບເງິນກອງທຶນຂອງໜ່ວຍ ໄດ້ທັງໝົດ 2,230,000 ກີບ ນອກນີ້ຍັງໄດ້ຕີລາຄາການຈັດແບ່ງປະເພດສະມາຊິກຊາວໜຸ່ມ ພາຍໃນໜ່ວຍ ເຊິ່ງສະມາຊິກຊາວໜຸ່ມ ທີ່ດີເດັ່ນຮອບດ້ານມີ 20 ສະຫາຍ, ຍິງ 10 ສະຫາຍ, ສະມາຊິກຊາວໜຸ່ມ ທີ່ຈັດຢູ່ປະເພດກາງມີ 1 ສະຫາຍ, ຍິງ 1 ສະຫາຍ ແລະ ສະມາຊິກຊາວໜຸ່ມທີ່ຈັດໃນປະເພດອ່ອນມີ 1 ສະຫາຍ. ສໍາລັບການຈັດຕັ້ງປະຕິບັດຂໍ້ແຂ່ງຂັນ 3 ດີ ຂອງໜ່ວຍສະຫະພັນແມ່ຍິງ ກໍໄດ້ມີການຕິດຕາມ, ກວດກາ-ປະເມີນການຈັດຕັ້ງປະຕິບັດຂໍ້ແຂ່ງຂັນ 3 ດີ ຕາມເນື້ອໃນແຂ່ງຂັນທີ່ກໍານົດໄວ້ ຢ່າງຖືກຕ້ອງຕາມຂັ້ນຕອນ ແລະ ວິທີການ ໂດຍໄດ້ສຶບຕໍ່ຂະບວນການແຂ່ງຂັນ 3 ດີ ເປັນຄັ້ງທີ່ 3 ເຊິ່ງມີສະມາຊິກສະຫະພັນແມ່ຍິງ ເຂົ້າຮ່ວມແຂ່ງຂັນຈໍານວນ 10 ສະຫາຍ ກວມເອົາ 100% ຂອງສະມາຊິກທັງໝົດ ແລະ ສາມາດຕີລາຄາຜົນໄດ້ຮັບດັ້ງນີ້: ພົນລະເມືອງດີ, ພັດທະນາດີ ແລະ ສ້າງຄອບຄົວດີ ໄດ້ສໍາເລັດຕາມຄາດໝາຍທີ່ວ່າງໄວ້. ຈາກນັ້ນໃນພິທີຍັງໄດ້ມອບໃບຍ້ອງຍໍສະມາຊິກກໍາມະບານ 5 ເປັນເຈົ້າ,ໃບຍ້ອງຍໍສະມາຊິກຊາວໜຸ່ມ 4 ບຸກ ປະຈໍາປີ 2020 ແລະ ໃບຍ້ອງຍໍເອື້ອຍນ້ອງແມ່ຍິງ 3 ດີ ໂດຍການກ່າວມອບຂອງສະຫາຍ ເນັ່ງຢ່າງ ໃຈຫວັງໝັ້ນ, ປະທານສະຫະພັນກໍາມະບານ ແຂວງ, ສະຫາຍ ວັນຄໍາເກັງ ຢ່າຊົ່ງກົວ, ກໍາມະການພັກແຂວງ ຫົວໜ້າພະແນກແຮງງານ ແລະ ສະຫວັດດີການສັງຄົມ ແຂວງ ແລະ ສະຫາຍ ນາງ ສຸກຊົງ ຕົ່ງສື, ຮອງປະທານສະຫະພັນແມ່ຍິງ ແຂວງ ຕື່ມອີກພ້ອມນັ້ນ 3 ອົງການຈັດຕັ້ງມະຫາຊົນຂອງພະແນກແຮງງານ ແລະ ສະຫວັດດີການສັງຄົມ ແຂວງ ໄດ້ຂື້ນຈັບມືແຂ່ງຂັນກັນ ເພື່ອພ້ອມກັນນໍາເອົາບັນດາເນື້ອໃນຂອງ 3 ອົງການຈັດຕັ້ງໄປຜັນຂະຫຍາຍ ແລະ ຈັດຕັ້ງປະຕິບັດ ໃຫ້ສໍາເລັດຕາມແຜນທີ່ໄດ້ວ່າງໄວ້.


ໃນໂອກາດທີ່ມີຄວາມໝາຍ-ຄວາມສໍາຄັນນີ້ ສະຫາຍ ເນັ່ງຢ່າງ ໃຈຫວັງໝັ້ນ,ສະຫາຍ ວັນຄໍາເກັງ ຢ່າຊົ່ງກົວ ແລະ ສະຫາຍ ນາງ ສຸກຊົງ ຕົ່ງສື ໄດ້ຜັດປ່ຽນກັນຂຶ້ນມີຄໍາເຫັນ ແລະ ໂອ້ລົມຕໍ່ພິທີ ເຊິ່ງທັງສາມສະຫາຍໄດ້ຮຽກຮ້ອງມາຍັງຄະນະ 3 ອົງການຈັດຕັ້ງມະຫາຊົນຂອງພະແນກ ຈົ່ງພ້ອມກັນສຶກສາອົບຮົມການເມືອງ-ແນວຄິດໃຫ້ເປັນປົກກະຕິ, ເປັນເຈົ້າການຝຶກຝົນຫຼໍຫຼອມຕົ້ນເອງ, ມີຄວາມຫ້າວຫັນ ໃນການຈັດຕັ້ງປະຕິບັດວຽກງານວິຊາສະເພາະ ໃຫ້ມີຄວາມຮັບຜິດຊອບສູງ, ໃນການສືບຕໍ່ຈັດຕັ້ງປະຕິບັດວຽກງານ 5 ເປັນເຈົ້າ ຂອງກະມະບານລາວ, ຈັດຕັ້ງປະຕິບັດຂໍ້ແຂ່ງຂັນ 4 ບຸກ ຂອງຊາວໜຸ່ມປະຕິວັດລາວ ແລະ ຂະບວນການແຂ່ງຂັນ 3 ດີ ຂອງສະຫະພັນແມ່ຍິງລາວ ໃຫ້ປະກົດຜົນເປັນຈິງ.
ບັນນາທິການ