ມິເດລາວແຂວງໄຊສົມບູນ ຂ່າວ: ຈິນລະວອນ ວໍລະສົມບູນ ພິທີ ວາງສີລາລຶກໂຄງການກໍ່ສ້າງໂຮງໝໍ ແຂວງໄຊສົມບູນ ໄດ້ຈັດຂຶ້ນໃນຕອນເຊົ້າຂອງວັນທີ 27 ກຸມພາ 2021 ນີ້ ທີ່ີເດີ່ນໂຮງໝໍ ແຂວງ ໂດຍການເຂົ້າຮ່ວມຂອງທ່ານ ຕົ່ງມົວ ຊົວໂກ້, ຮອງເຈົ້າແຂວງໄຊສົມບູນ, ມີທ່ານ ເລັ່ງຊົ່ງ ຕົ່ງສີ, ປະທານແນວລາວສ້າງຊາດ ແຂວງ, ທ່ານ ດຣ ຢ່າງຮື ຊາວາ, ອຳນວຍການໂຮງໝໍ ແຂວງ, ມີຕາງໜ້າຈາກພະແນກສາທາລະນະສຸກ ແຂວງ, ທ່ານ ຫງວຽນ ວັນເຫືອງ, ຮອງຜູ້ອຳນວຍການບໍລິສັດກໍ່ສ້າງ ໂກເອກໂກລາວ ຈຳກັດ ຜູ້ດຽວ ພ້ອມດ້ວຍທຸກພາກສ່ວນທີ່ກ່ຽວຂ້ອງ ເຂົ້າຮ່ວມ.
ໂອກາດດັ່ງກ່າວ ທ່ານ ຕົ່ງມົວ ຊົວໂກ້, ຮອງເຈົ້າແຂວງໄຊສົມບູນ ໄດ້ມີຄຳເຫັນຕໍ່ພິທີ ຊຶ່ງທ່ານໄດ້ຍົກໃຫ້ເຫັນເຖິງຄວາມໝາຍ-ຄວາມສຳຄັນ ກ່ຽວກັບການປຸກສ້າງໂຮງໝໍ ເນື່ອງຈາກວ່າ ໂຮງໝໍ ເປັນບ່ອນຮັກສາສຸຂະພາບ, ຮັກສາຊີວິດອິນຊີຂອງໝົດທຸກຄົນ ກ່ອນຄົນເຮົາຈະມີໃບໜ້າຍິ້ມແຍ້ມແຈ່ມໃສໄດ້ ກໍຕໍ່ເມື່ອມີສຸຂະພາບແຂງແຮງດີ, ນັ້ນແມ່ນໄດ້ມາຈາກການທີ່ມີໂຮງໝໍ ໄວ້ຄອຍບໍລິການສຸຂະພາບ.

ຊຶ່ງການປຸກສ້າງໂຮງໝໍ ແຂວງໄຊສົມບູນ ແຫ່ງນີ້ ຈະເປັນສະຖານທີ່ເຮັດວຽກຂອງແພດໝໍ ແລະ ສາມາດຮອງຮັບຄົນເຈັບ ທີ່ມາປິ່ນປົວ ແລະ ນອນໂຮງໝໍ ໃຫ້ມີຄວາມສະດວກສະບາຍ ໃນການປິ່ນປົວສຸຂະພາບຍິ່ງໆ ຂຶ້ນ ໃນຕໍ່ໜ້າ. ພ້ອມນີ້ ປະຊາຊົນບັນດາເຜົ່າ ຊາວແຂວງໄຊສົມບູນ ຈະໄດ້ຮັບການບໍລິການປິ່ນປົວ, ດູແລ ແລະ ຮັກສາສຸຂະພາບເປັນຢ່າງດີ ຈາກການບໍລິການຂອງແພດໝໍ ທີ່ເຮັດໜ້າທີ່ແນວໜ້າ ເພື່ອຕໍ່ສູ້ຕ້ານສັດຕູທາງສຸຂະພາບ ໃຫ້ຊາວແຂວງໄຊສົມບູນ ໄດ້ມີສຸຂະພາບທີ່ແຂງແຮງ ແລະ ປາສະຈາກໂລກໄພໄຂ້ເຈັບຕ່າງໆ. ສຳລັບໂຄງການກໍ່ສ້າງໂຮງໝໍ ແຂວງໄຊສົມບູນ ເປັນໂຄງການໜຶ່ງ ທີ່ໄດ້ຮັບການຊ່ວຍເຫຼືອລ້າ ຈາກປະເທດ ສ.ສ ຫວຽດນາມ ຕາມການຕົກໃນຄັ້ງວັນທີ 14 ຕຸລາ 2019 ຊຶ່ງລວມມູນຄ່າການກໍ່ສ້າງທັງໝົດ ຈຳນວນ 159 ຕື້ດົງ ແລະ ທຶນສົມທົບ ຂອງລັດຖະບານລາວ 2%. ໂດຍແມ່ນບໍລິສັດ ໂກເອກໂກ ຈຳກັດ ເປັນຜູ້ຮັບເໝົາກໍ່ສ້າງ. ທັງໝົດນັ້ນ ໄດ້ສະແດງໃຫ້ເຫັນເຖິງມິດຕະພາບອັນຍິ່ງໃຫຍ່, ຄວາມສາມັກຄີແບບພິເສດ ແລະ ການຮ່ວມມືຮອບດ້ານ ລະຫວ່າງສອງພັກ, ສອງລັດ ແລະ ປະຊາຊົນ ສອງຊາດລາວ-ຫວຽດນາມ ທີ່ມີມາແຕ່ດົນນານ ຊຶ່ງນັບມື້ນັບແໜ້ນແຟ້ນ, ສວຍສົດງົດງາມ, ໝັ້ນຄົງທະນົງແກ່ນຈົນເຖິງປັດຈຸບັນ ແລະ ຊົ່ວກາລະນານ.