ມີເດຍລາວແຂວງໄຊສົມບູນ ຂ່າວ: ສີລິພອນ ສົງຄຳ
ໜ່ວຍພັກພະແນກໄປສະນີ, ໂທລະຄົມມະນາຄົມ ແລະ ການສື່ສານ ແຂວງໄຊສົມບູນ ໄດ້ຈັດພິທີຮັບໃບຢັ້ງຢືນ ໜ່ວຍພັກປອດໃສ, ເຂັ້ມແຂງ, ໜັກແໜ້ນຂຶ້ນ ໃນຕອນເຊົ້າຂອງວັນທີ 21 ເມສາ 2021 ນີ້ ທີ່ຫ້ອງປະຊຸມ ບໍລິສັດລາວໂທລະຄົມມະຫາຊົນ ສາຂາແຂວງໄຊສົມບູນ ພາຍໃຕ້ການເປັນປະທານຂອງສະຫາຍ ພູແກ້ວ ອິນທະວົງ, ກຳມະການພັກແຂວງ, ເລຂາໜ່ວຍພັກ ພະແນກໄປສະນີ, ໂທລະຄົມມະນາຄົມ ແລະ ການສື່ສານ ແຂວງ ໂດຍການເຂົ້າຮ່ວມ ຂອງສະຫາຍ ທອງວັນ ທຳມະວົງ, ຄະນະປະຈຳພັກແຂວງ, ຫົວໜ້າຄະນະຈັດຕັ້ງ ແຂວງ, ພ້ອມດ້ວຍເລຂາ-ຮອງເລຂາໜ່ວຍພັກ ກຸ່ມເສດຖະກິດ ແລະ ສະມາຊິກພັກພາຍໃນ ພະແນກໄປສະນີ, ໂທລະຄົມມະນາຄົມ ແລະ ການສື່ສານ ເຂົ້າຮ່ວມ.

ໃນພິທີ ທ່ານ ບຸນຜອງ ຄຳມະນີວົງ, ຮອງປະທານກວດກາພັກ-ລັດ ແຂວງ ໄດ້ຂຶ້ນຜ່ານບົດສະຫຼຸບການກວດກາ ເພື່ອຢັ້ງຢືນເປັນໜ່ວຍພັກປອດໃສ, ເຂັ້ມແຂງ, ໜັກແໜ້ນ ພ້ອມທັງຮັບຟັງການຜ່ານມະຕິຕົກລົງ ວ່າດ້ວຍການຮັບຮອງໜ່ວຍພັກປອດໃສ, ເຂັ້ມແຂງ, ໜັກແໜ້ນ. ຊຶ່ງໄລຍະຜ່ານມາ ໄດ້ຖືເອົາການສຶກສາອົບຮົມການເມືອງ-ແນວຄິດ ໃຫ້ສະມາຊິກພັກ, ພະນັກງານ-ລັດຖະກອນ ເປັນບັນຫາກົກ ໂດຍການເຊື່ອມຊຶມແນວທາງນະໂຍບາຍ, ມະຕິ, ຄຳສັ່ງ, ກົດລະບຽບຂອງພັກ ແລະ ກົດໝາຍຕ່າງໆ ທີ່ພັກ-ລັດ ວາງອອກ ໃຫ້ສະມາຊິກພັກ-ພະນັກງານ ໃນຄວາມຮັບຜິດຊອບຂອງຕົນ ຢ່າງເປັນປົກກະຕິ ເຮັດໃຫ້ເຂົາເຈົ້າມີຄວາມເຊື່ອໝັ້ນ ຕໍ່ການນຳພາຂອງພັກ ດ້ວຍຄວາມອຸ່ນອຽນທຸ່ນທ່ຽງ, ມີສະຕິຕໍ່ການຈັດຕັ້ງ, ມີລະບຽບວິໄນເຂັ້ມງວດ ແລະ ເປັນເຈົ້າການປະຕິບັດໜ້າທີ່ການເມືອງ ພ້ອມທັງຍົກສູງສະຕິຕື່ນຕົວ ຕໍ່ການປະກອບສ່ວນ ເຂົ້າໃນທຸກຂົງເຂດວຽກງານ ຢ່າງຕັ້ງໜ້າ. ຈາກນັ້ນໄດ້ມີພິທີ ມອບ-ຮັບໃບຢັ້ງຢືນໜ່ວຍພັກປອດໃສ, ເຂັ້ມແຂງ, ໜັກແໜ້ນ ໃຫ້ແກ່ໜ່ວຍພັກພະແນກໄປສະນີ, ໂທລະຄົມມະນາຄົມ ແລະ ການສື່ສານ ຢ່າງເປັນທາງການ.


ໂອກາດນີ້ ສະຫາຍ ທອງວັນ ທຳມະວົງ ໄດ້ມີຄຳເຫັນໂອ້ລົມ ຕໍ່ພິທີ ຊຶ່ງສະຫາຍ ໄດ້ເນັ້ນໜັັກໃຫ້ເອົາໃຈໃສ່ຊີ້ນຳ-ນຳພາ ຈັດຕັ້ງປະຕິບັດວຽກງານຮອບດ້ານ ຂອງສະມາຊິກພັກ ຕະຫຼອດຮອດພະນັກງານ-ລັດຖະກອນ ດ້ວຍຄວາມຮັບຜິດຊອບສູງ, ຕັ້ງໜ້າຕີຖອຍທຸກໜໍ່ແໜງທີ່ກໍ່ໃຫ້ເກີດປະກົດການຫຍໍ້ທໍ້ ພາຍໃນພັກ ໃຫ້ທັນເວລາ ໄປພ້ອມກັນກັບການເຕົ້າໂຮມຄວາມສາມັກຄີພາຍໃນ ໃຫ້ເປັນປຶກແຜ່ນ. ພ້ອມນີ້ ສະມາຊິກພັກ-ພະນັກງານ ແຕ່ລະສະຫາຍ ຕ້ອງມີສະຕິເຄົາລົບຕໍ່ການຈັດຕັ້ງ, ມີລະບຽບວິໄນນຢ່າງເຂັ້ມງວດ, ມີແບບແຜນວິທີເຮັດວຽກ ຕາມຫຼັກການລວມສູນປະຊາທິປະໄຕ-ນຳພາເປັນໝູ່ຄະນະ ແລະ ພ້ອມກັນແຂ່ງຂັນ ກໍ່ສ້າງໜ່ວຍພັກປອດໃສ, ເຂັ້ມແຂງ ແລະ ໜັກແໜ້ນ ໃຫ້ປະກົດຜົນເປັນຈິງ.