ມີເດຍລາວແຂວງໄຊສົມບູນ ຂ່າວ: ນາງ ຕູດຄໍາພໍໃຈ
ໜ່ວຍພັກພະແນກສຶກສາທິການ ແລະ ກິລາ ແຂວງໄຊສົມບູນ ຈັດພິທີ ເຊື່ອມຊຶມມະຕິກອງປະຊຸມໃຫຍ່ ຄັ້ງທີ XI ຂອງພັກ ແລະ ມະຕິກອງປະຊຸມໃຫຍ່ ຄັ້ງທີ I ຂອງແຂວງໄຊສົມບູນ ແລະ ຜັນຂະຫຍາຍແຜນການສ້າງໜ່ວຍພັກປອດໃສ, ເຂັ້ມ ແຂງ ແລະ ໜັກແໜ້ນ ໄດ້ຈັດຂຶ້ນໃນຕອນເຊົ້າ ຂອງວັນທີ 28 ມິຖຸນາ 2021 ນີ້ ທີ່ຫ້ອງປະຊຸມຂອງຕົນ ໂດຍການ ເປັນປະທານ ຂອງ ສະຫາຍ ຢົງຢີ ລີເຍ່ຍວື, ເລຂາໜວ່ຍພັກພະແນກສຶກສາທິການ ແລະ ກິລາ ແຂວງ, ມີຮອງເລຂາໜ່ວຍພັກ, ມີຕ່າງຫນ້າ ສະ ພາ ປະຊາຊົນແຂວງ, ຄະນະໂຄສະນາອົບຮົມແຂວງ, ໂຮງຮຽນວິຊາຊີບ, ໂຮງຮຽນຊົນເຜົ່າ ພ້ອມດ້ວຍສະມາຊິກສົມບູນ-ສໍາຮອງ ຕະຫລອດຮອດພະນັກງານພາຍໃນພະແນກ ເຂົ້າຮ່ວມ.

ກ່ອນຈະໄປເຊື່ອມຊຶມບັນດາເອກະສານຕ່າງໆ ສະຫາຍ ຢົງຢີ ລີເຍ່ຍວື ໄດ້ຍົກໃຫ້ເຫັນເຖິງຄວາມໝາຍ-ຄວາມສຳຄັນ ໃນການເຊື່ອມຊຶມມະຕິກອງປະຊຸມໃຫຍ່ ຄັ້ງທີ XI ຂອງພັກ ແລະ ມະຕິກອງປະຊຸມໃຫຍ່ ຄັ້ງທີ I ຂອງອົງຄະນະພັກ ແຂວງໄຊສົມ ບູນ ໃນຄັ້ງນີ້ ກໍເພື່ອເຮັດໃຫ້ບັນດາສະຫາຍສະມາຊິກພັກ-ພະນັກງານຫຼັກແຫຼ່ງ ຂອງພະແນກ ແລະ ບັນດາໂຮງຮຽນ ກໍາໄດ້ເນື້ອ ໃນຄາດໝາຍ ຂອງພັກຢ່າງຈະແຈ້ງ ສະນັ້ນ ສະຫາຍຈຶ່ງໄດ້ຮຽກຮ້ອງ ໃຫ້ພະນັກງານຫຼັກແຫຼ່ງພາຍໃນພະແນກ ແລະ ໂຮງຮຽນ ຂອງຕົນ ຈົ່ງກຳແໜ້ນເນື້ອໃນກອງປະຊຸມຂອງພັກ ດ້ວຍຄວາມເອົາໃຈໃສ່ ເພື່ອນຳໄປຈັດຕັ້ງປະຕິບັດ ຢູ່ວຽກງານຂອງຕົນ ໃຫ້ມີ ປະສິດທິພາບ ແລະ ປະສິດທິພົນ ດີຂຶ້ນເລື້ອຍໆ.

ຈາກນັ້ນ ສະຫາຍໄດ້ເຜີຍແຜ່ມະຕິກອງປະຊຸມໃຫຍ່ ຜູ້ແທນທົ່ວປະເທດ ຄັ້ງທີ XI ຂອງພັກ ແລະ ມະຕິກອງປະຊຸມໃຫຍ່ ຄັ້ງທີ 1 ຂອງອົງຄະນະພັກ ແຂວງໄຊສົມບູນ. ໂດຍສະເພາະແມ່ນເນື້ອໃນທີ່ສຳຄັນຕົ້ນຕໍ່ ແລະ ວຽກງານຈຸດສຸມ ທີ່ຕ້ອງເອົາໃຈໃສ່ນຳພາ-ຊີ້ນຳ ໃນແຕ່ລະຂົງ ເຂດວຽກງານ ຕາມຄວາມຮັບຜິດຊອບ ຂອງຕົນ ໃນການຫັນ ມະຕິກອງປະຊຸມໃຫຍ່ ຄັ້ງທີ 1 ຂອງອົງຄະນະພັກ ແຂວງໄຊສົມບູນ ໃຫ້ເປັນແຜນງານ, ໂຄງການ ແລະ ກິດຈະການລະອຽດ ຂອງຕົນ ເພື່ອຈັດຕັ້ງປະຕິບັດໃຫ້ເກີດໝາກຜົນຕົວຈິງ.

ດັ່ງພາຍໃຕ້ຄໍາ ຂັວນທີ່ວ່າ : ເພີ່ມທະວີຄວາມສາມັກຄີປອງດອງທົ່ວແຂວງ ໃຫ້ເປັນປຶກແຜນ, ສ້າງແຂວງໄຊສົມບູນ ໃຫ້ມີຄວາມສະຫງົບ, ມີຄວາມເປັນລະບຽບຮຽບຮ້ອຍ ຢ່າງໝັກແໜັ້ນ, ໄດ້ຮັບການພັດ ທະນາ ໃນ 5 ທ່າແຮງ, ຕາມທິດສີຂຽວ, ສະອາດ ແລະ ຢືນຍົງ, ປັບປຸງຊີວິດການເປັນຢູ່ຂອງປະຊາຊົນໃຫ້ດີຂຶ້ນ ແລະ ຫລຸດພົ້ນ ອອກຈາກຄວາມທຸກຍາກເທື່ອລະກ້າວ.

ພ້ອມນີ້ ໃນພິທີ ຍັງໄດ້ຮັບຟັ້ງ ການເຜີຍແຜນການສ້າງໜ່ວຍພັກປອດໃສ, ເຂັ້ມແຂງ, ໜັກແໜ້ນ ຂອງໜ່ວຍພັກພະແນກສຶກສາທິການ ແລະ ກິລາ ແຂວງ ປະຈໍາປີ 2021. ຊຶ່ງແຜນການດັ່ງກ່າວ ໄດ້ກໍານົດມາດຖານ ເງື່ອນໄຂ ຂອງການສ້າງໜ່ວຍພັກ ໃຫ້ກາຍເປັນ ໜ່ວຍພັກປອດໃສ, ເຂັ້ມແຂງ, ໜັກແໜ້ນ. ໂດຍຄະນະພັກ-ຕະຫລອດຮອດ ສະມາຊິກພັກ ຕ້ອງເພີ່ມທະວີຄວາມເປັນເຈົ້າການສຶກສາ, ຄົ້ນຄ້ວາ, ຮໍ່າຮຽນ ແລະ ເຊື່ອມຊຶມບັນດາແນວທາງນະໂຍບາຍ, ມະຕິ, ຄໍາສັ່ງ, ລະບຽບຂອງພັກ ແລະ ກົດໝາຍຂອງລັດ ໃຫ້ເລິກເຊິ່ງກວ່າເກົ່າ ພ້ອມທັງຫັນມາເປັນແຜນງານລະອຽດ ເພື່ອຈັດຕັ້ງປະ ຕິບັດໃຫ້ໄດ້ຮັບຜົນດີ.

ຄຽງຄູ່ກັນນີ້ ກໍຕ້ອງຢຶດໝັ້ນ ການກໍ່ສ້າງໜ່ວຍພັກໄປຕາມ 5 ຫຼັກການ 3 ທິດນໍາ ແລະ 9 ຂໍ້ຫ້າມ ຂອງສະມາຊິກພັກ ເພື່ອສູ້ຊົນໃຫ້ສະມາຊິກພັກປອດໃສ່, ເຂັ້ມແຂງ ແລະ ໜັກແໜັ້ນ ໃຫ້ບັນລຸ 9,8 ຄະແນນ ໂດຍປະຕິບັດ ຕາມແນວຄວາມຄິດ ຂອງປະທານໄກສອນ ພົມວິຫານ. ໃນນີ້ ຄະນະພັກ ແລະ ສະມາຊິກພັກພາຍໃນໜ່ວຍພັກ ຕ້ອງສູ້ຊົນ ໃຫ້ໄດ້ສະມາຊິກພັກແຂງ ກວມເອົາ 90% ຂຶ້ນໄປ. ຊຶ່ງໃຫ້ຮັບປະກັນບໍ່ໃຫ້ມີສະມາຊິກພັກອ່ອນ ແລະ ເສຍທາດຂາດຄຸນ. ທັງນີ້ ກໍເພື່ອໃຫ້ການ ຈັດຕັ້ງປະຕິບັດແຜນການກໍ່ສ້າງໜ່ວຍພັກປອດໃສ, ເຂັ້ມແຂງ, ໜັກແໜ້ນ ຂອງໜ່ວຍພັກສຶກສາທິການ ແລະ ກິລາ ແຂວງ ສາມາດບັນລຸຕາມຄາດໝາຍ ແລະ ກາຍເປັນໜ່ວຍພັກ ປອດໃສ, ເຂັ້ມແຂງ, ໜັກແໜ້ນ ໃນອະນາຄົດ.