ມີເດຍລາວແຂວງສາລະວັນ ພາບ-ຂ່າວ ໂດຍ: ວຽງສະຫວັນ ແສນຄຳ.
ຕອນເຊົ້າຂອງວັນທີ 17-18 ມີຖຸນາ 2021 ເມືອງຕຸ້ມລານ ໄດ້ຈັດກອງປະຊຸມເຊື່ອມຊຶມ ແລະ ຜັນຂະຫຍາຍມະຕິກອງປະຊຸມໃຫຍ່ ຄັ້ງທີ XI ຂອງພັກປະຊາຊົນລາວ, ມະຕິກອງປະຊຸມໃຫຍ່ ຄັ້ງທີ IX ຂອງອົງຄະນະພັກແຂວງສາລະວັນ ແລະ ມະຕິກອງປະຊຸມເປີດກວ້າງ ຄັ້ງທີ 6 ສະໄໝທີ X ຂອງອົງຄະນະພັກເມືອງຕຸ້ມລານ, ເຊິ່ງຈັດຂຶ້ນຢູ່ທີ່ສະໂມສອນຂອງເມືອງ, ໃຫ້ກຽດເຂົ້າຮ່ວມຂອງ ສະຫາຍ ຈັນສະໝອນ ພົມມະແສງ ຄະນະປະຈຳພັກແຂວງ ຫົວໜ້າຄະນະໂຄສະນາອົບຮົມແຂວງ ທັງເປັນຜູ້ຊີ້ນຳວຽກງານຮອບດ້ານຂອງເມືອງຕຸ້ມລານ, ພາຍໃຕ້ການເປັນປະທານຂອງ ສະຫາຍ ທອງໃສ ເພັດລາສີ ກຳມະການພັກແຂວງ ເລຂາພັກເມືອງ ເຈົ້າເມືອງຕຸ້ມລານ, ມີບັນດາສະຫາຍຮອງເລຂາພັກເມືອງ, ຄະນະປະຈຳພັກເມືອງ, ກຳມະການພັກເມືອງ, ຫົວໜ້າຫ້ອງການ, ຮອງຫ້ອງການ ຕະຫຼອດຮອດເລຂາໜ່ວຍພັກອ້ອມຂ້າງເຂົ້າຮ່ວມທັງໝົດ 60 ສະຫາຍ, ຍິງ 13 ສະຫາຍ.

ຜູ້ເຂົ້າຮ່ວມຍັງໄດ້ຮັບຟັງການຜັດປ່ຽນກັນຂຶ້ນຜ່ານ 8 ເອກະສານທີສໍາຄັນ ເປັນຕົ້ນແມ່ນ: ເອກະສານເຊື່ອມຊຶມ ແລະ ຜັນຂະຫຍາຍມະຕິກອງປະຊຸມໃຫຍ່ ຄັ້ງທີ XI ຂອງພັກປະຊາຊົນລາວ, ເອກະສານມະຕິວ່າດ້ວຍການເພີ້ມທະວີການນຳພາຂອງພັກຕໍ່ວຽກງານວັດທະນະທຳໃນໄລຍະໃໝ່, ເອກະສານວ່າດ້ວຍຍົກສູງຄຸນນະພາບວຽກງານການເມືອງ-ແນວຄິດໃນໄລຍະໃໝ່, ເອກະສານຜົນສຳເລັດການຈັດຕັ້ງປະຕິບັດມະຕິກອງປະຊຸມໃຫຍ່ ຄັ້ງທີ VIII ຂອງອົງຄະນະພັກແຂວງສາລະວັນ, ເອກະສານທິດທາງລວມ ແລະ ໜ້າທີຕົ້ນຕໍ 5 ປີ (2021-2025), ເອກະສານທິດທາງວຽກງານຈຸດສຸມ ສຳລັບໄລຍະແຕ່ປີ (2021-2025) ເພື່ອນໍາພາແຂວງສາລະວັນ ພົ້ນອອກຈາກຄວາມທຸກຍາກ, ເອກະສານມະຕິກອງປະຊຸມເປີດກວ້າງ ຄັ້ງທີ 6 ສະໄໝທີ X ຂອງອົງຄະນະພັກເມືອງຕຸ້ມລານ ແລະ ເອກະສານຈຸດສຸມແຜນພັດທະນາເສດຖະກິດ-ສັງຄົມ 5 ປີຂອງເມືອງ (2019-2024). ແນວຄິດຊີ້ນໍາລວມໃນການເຊືອມຊຶມ ແລະ ຜັນຂະຫຍາຍມະຕິກອງປະຊຸມໃຫຍ່ ຄັ້ງທີ XI ຂອງພັກ, ຈຸດປະສົ່ງກໍ່ເພື່ອສ້າງການຫັນປ່ຽນໃໝ່ໃຫ້ແຂງແຮງ ເລີກເຊິງ ແລະ ຮອບດ້ານໃນການຜັນຂະຫຍາຍມະຕິກອງປະຊຸມໃຫຍ່ ຄັ້ງທີ XI ຂອງພັກ ເຂົ້າສູ່ຊີວິດຕົວຈິງ, ແນໃສ່ໃຫ້ການນຳແຕ່ລະຂັ້ນຮັບຮູ້ ແລະ ເຂົ້າໃຈຢ່າງເລິກເຊິ່ງ, ກຳແໜ້ນເນື້ອໃນມະຕິ XI ຂອງພັກ, ໂດຍສະເພາະແມ່ນເນື້ອໃນທີສຳຄັນຕົ້ນຕໍ ແລະ ວຽກງານຈຸດສຸມທີຕ້ອງເອົາໃຈໃສ່ການຊີ້ນຳ-ນຳພາໃນແຕ່ລະຂົງເຂດວຽກງານຕາມຄວາມຮັບຜິດຊອບຂອງຕົນ, ຕິດພັນກັບການເສີມຂະຫຍາຍຄວາມເປັນເຈົ້າການຂອງບັນດາກະຊວງ-ອົງການ, ບັນດາແຂວງ, ນະຄອນຫຼວງ ກໍຄືຂະແໜງການ ແລະ ທ້ອງຖິ່ນຕ່າງໆ

ໃນການຫັນມະຕິກອງປະຊຸມໃຫຍ່ ຄັ້ງທີ XI ຂອງພັກ ໃຫ້ເປັນແຜນງານ, ໂຄງການ ແລະ ກິດຈະກໍາລະອຽດຂອງຕົນ ເພື່ອຈັດຕັ້ງປະຕິບັດໃຫ້ເກີດໝາກຜົນຕົວຈິງ. ພາຍໃຕ້ຄຳຂວັນທີ່ວ່າ: ຍົກສູງຄວາມສາມາດນຳພາຂອງພັກ, ເພີ້ມທະວີຄວາມສາມັກຄີເປັນປຶກແຜ່ນຂອງປະຊາຊົນພາຍໃນຊາດ, ຮັບປະກັນສະຖຽນລະພາບດ້ານການເມືອງຢ່າງໜັກແໜ້ນ, ຜັນຂະຫຍາຍແນວທາງປ່ຽນແປງໃໝ່ສູ່ລວງເລິກ, ສ້າງການຫັນປ່ຽນການພັດທະນາເສດຖະກິດ-ສັງຄົມໄປສູ່ຄຸນນະພາບໃໝ່ຢ່າງແຂງແຮງ, ຍົກລະດັບຄຸນນະພາບຊີວິດຂອງປະຊາຊົນໃຫ້ສູງຂຶ້ນ, ສືບຕໍ່ນຳພາປະເທດຊາດພົ້ນຈາກສະຖານະພາບດ້ອຍພັດທະນາ ແລະ ກ້າວເຂົ້າສູ່ສັງຄົມນິຍົມ. ພ້ອມດຽວກັນນີ້ຍັງໄດ້ມີການແບ່ງຈຸໜ່ວຍເພື່ອເປັນການສົນທະນາ, ແລກປ່ຽນ – ຄົ້ນຄວ້າໃນຄໍາຖາມເຈາະຈິ້ມ, ແລ້ວລາຍງານໃຫ້ຄະນະປະທານຮັບຊາບ, ທັງນີ້ກໍ່ເພື່ອເປັນການຫາທາງອອກ ແລະ ແກ້ໄຂບາງບັນຫາທີຍັງຄົງຄ້າງໃຫ້ດີຂຶ້ນກວ່າເກົ່າ.

ໃນຕອນທ້າຍຂອງກອງປະຊຸມຍັງໄດ້ຮັບຟັງການມີຄຳເຫັນໂອ້ລົມຂອງ ສະຫາຍ ຈັນສະໝອນ ພົມມະແສງ ຄະນະປະຈຳພັກແຂວງ ຫົວໜ້າຄະນະໂຄສະນາອົບຮົມແຂວງ ກ່ອນອຶ່ນສະຫາຍກໍ່ໄດ້ຍ້ອງຍໍຊົມເຊີຍຕໍ່ຄະນະພັກ-ຄະນະນຳເມືອງຕຸ້ມລານທີໄດ້ເອົາໃຈໃສ່ໃນການຈັດຕັ້ງປະຕິບັດວຽກງານຕ່າງໆຜ່ານມາແມ່ນມີຜົນສຳເລັດຫຼາຍດ້ານ ແລະ ພ້ອມດຽວກັນນີ້ຕ້ອງຫັນເອົາເນື້ອໃຈ ແລະ ຈິດໃຈຂອງມະຕິກອງປະຊຸມໃຫຍ່ ຄັ້ງທີ ຄັ້ງທີ XI ຂອງພັກປະຊາຊົນລາວ, ມະຕິກອງປະຊຸມໃຫຍ່ ຄັ້ງທີ IX ຂອງອົງຄະນະພັກແຂວງສາລະວັນ ນຳໄປເຜີຍແຜ່ເຊື່ອມຊຶມພາຍໃນກົມກອງຂອງຕົນ ແລະ ລົງສູ່ຮາກຖານບ້ານໃຫ້ທົ່ວເຖິງ ແລະ ໃຫ້ມີຜົນສຳເລັດຢ່າງສູງ.