ມີເດຍລາວແຂວງໄຊສົມບູນ ຂ່າວ: ຈິນລະວອນ ວໍລະສົມບູນ
ພິທີ ເປີດບັ້ນຝຶກອົບຮົມຊ່າງວິຊາຕັດຫຍິບ ໄລຍະສັ້ນ 3 ເດືອນ ໃຫ້ສະມາຊິກຊາວໜຸ່ມຜູ້ດ້ອຍໂອກາດ ໃນທົ່ວແຂວງໄຊສົມບູນ ຊຸດທີ V ໄດ້ຈັດຂຶ້ນໃນຕອນເຊົ້າຂອງວັນທີ 25 ມີນາ 2021 ນີ້ ທີ່ສູນພັດທະນາວິຊາຊີບຊາວໜຸ່ມ-ເຍົາວະຊົນ ຂອງແຂວງ ໂດຍການເຂົ້າຮ່ວມເປັນປະທານ ຂອງທ່ານ ເລັ່ງຊົ່ງ ຕົ່ງສີ, ຄະນະປະຈຳພັກແຂວງ, ປະທານແນວລາວສ້າງຊາດ ແຂວງໄຊສົມບູນ, ມີທ່ານ ເຍ່ຍຊົ່ງ ຫວັງທ່າວ, ເລຂາຄະນະບໍລິຫານງານຊາວໜຸ່ມ ແຂວງ ຕະຫຼອດຮອດຄູຝຶກ, ນັກສຳມະນາກອນ ພ້ອມດ້ວຍແຂກຖືກເຊີນ ເຂົ້າຮ່ວມ.

ການເປີດບັ້ນຝຶກອົບຮົມ ຄັ້ງນີ້ ແມ່ນເພື່ອສຸມໃສ່ການພັດທະນາສີມືແຮງງານ ເວົ້າລວມ, ເວົ້າສະເພາະ ແມ່ນການພັດທະນາເສດຖະກິດ-ສັງຄົມ ເພື່ອແກ້ໄຂຄວາມທຸກຍາກຂອງປະຊາຊົນ ໃຫ້ຫຼຸດພົ້ນອອກຈາກຄວາມທຸກຍາກ ເທື່ອລະກ້າວ ທັງເປັນການຊຸກຍູ້ສົ່ງເສີມໃຫ້ແມ່ຍິງຜູ້ດ້ອຍໂອກາດ ທີ່ບໍ່ມີວິຊາຊີບ ເພື່ອຊອກວຽກເຮັດງານທຳໃຫ້ເຂົາເຈົ້າ ສາມາດນຳໄປພັດທະນາເສດຖະກິດຄອບຄົວຂອງຕົນ ໃຫ້ມີລາຍຮັບທີ່ແນ່ນອນ ຕາມແນວທາງນະໂຍບາຍຂອງພັກ, ແຜນພັດທະນາເສດຖະກິດ-ສັງຄົມຂອງລັດທີ່ວາງອອກ ໃຫ້ປະກົດຜົນເປັນຈິງ. ໃນໂອກາດ ມີຄຳເຫັນໂອ້ລົມຕໍ່ພິທີ ທ່ານ ເລັ່ງຊົ່ງ ຕົ່ງສີ ໄດ້ຮຽກຮ້ອງໃຫ້ຄູຝຶກ ຈົ່ງສຸມທຸກເຫື່ອແຮງ ແລະ ຄວາມຮູ້ຄວາມສາມາດຂອງຕົນ ເຂົ້າໃນການສິດສອນດ້ວຍຄວາມຮັບຜິດສູງ ທັງນີ້ ກໍເພື່ອເຮັດໃຫ້ສຳມະນາກອນຮັບຮູ້ ແລະ ເຂົ້າໃຈ ຢ່າງເລິກເຊິ່ງ ກ່ຽວກັບເຕັກນິກການຕັດຫຍິບທຸກປະການ ເມື່ອຈົບການຝຶກອົບຮົມໄປແລ້ວ ສາມາດນຳໄປປະກອບອາຊີບທີ່ໝັ້ນຄົງ ແລະ ສ້າງລາຍຮັບເຂົ້າຄອບຄົວໄດ້ເປັນຢ່າງດີ. ນອກນັ້ນ ທ່ານຍັງໄດ້ຮຽກຮ້ອງມາຍັງສຳມະນາກອນ ຈົ່ງມີຄວາມພາກພຽນພະຍາຍາມຍາດແຍ່ງຄວາມຮູ້ຈາກຄູຝຶກ ດ້ວຍຄວາມຫ້າວຫັນ ພ້ອມທັງປະຕິບັດໂມງເວລາໃນການເຂົ້າຫ້ອງຝຶກອົບຮົມ ຢ່າງເຂັ້ມງວດ. ເພື່ອສ້າງໃຫ້ຕົນເອງມີຄວາມຮູ້ ແລະ ຄ່ອງແຄ້ວ ກ່ຽວກັບການຕັດຫຍິບ ທັງສາມາດນຳໄປປະກອບອາຊີບ ແລະ ພັດທະນາເສດຖະກິດຄອບຄົວຂອງຕົນ ໃຫ້ມີບາດກ້າວຂະຫຍາຍຕົວ ແລະ ຫຼຸດພົ້ນອອກຈາກຄວາມທຸກຍາກ ໃນອະນາຄົດ.