ມີເດຍລາວແຂວງຄຳມ່ວນ
ໃນຕອນເຊົ້າຂອງວັນທີ 16 ມິຖຸນາ 2021 ຢູ່ທີ່ສະໂມສອນຫ້ອງວ່າການເມືອງມະຫາໄຊ ແຂວງຄຳມ່ວນ ໄດ້ຈັດພິທີ ມອບ-ຮັບໜ້າທີ່ລະຫວ່າງເຈົ້າເມືອງມະຫາໄຊຜູ້ເກົ່າ ແລະ ຜູ້ໃໝ່ ໂດຍເປັນກຽດເຂົ້າຮ່ວມຂອງ ທ່ານ ວັນໄຊ ພອງສະຫວັນ ກຳມະການສູນກາງພັກ, ເລຂາຄະນະບໍລິຫານງານພັກແຂວງ, ເຈົ້າແຂວງໆຄໍາມ່ວນ, ມີບັນດາພະແນກການຂັ້ນແຂວງ, ບັນດາການນຳຂັ້ນເມືອງ, ອະດີດການນໍາຂັ້ນເມືອງ ຕະຫຼອດເຖິງອຳນາດການປົກຄອງບ້ານໃນທົ່ວເມືອງເຂົ້າຮ່ວມ.

ທ່ານ ຄໍາແຜວ ສາຍປະດິດ ຮອງຫົວໜ້າຄະນະຈັດຕັ້ງເເຂວງຄໍາມ່ວນ ໄດ້ຂຶ້ນຜ່ານຂໍ້ຕົກລົງເເຕ່ງຕັ້ງມອບ-ຮັບໜ້າທີ່ເຈົ້າເມືອງມະຫາໄຊຜູ້ໃໝ່ ປ່ຽນແທນຜູ້ເກົ່າພ້ອມທັງຄະນະປະຈໍາພັກເມືອງ, ກໍາມະການພັກເມືອງ ເຊິ່ງມີລາຍຊື່ລະອຽດດັ່ງນີ້: ທ່ານ ສົມບູນ ແກ້ວວົງສາ ຮອງເລຂາພັກເມືອງ ຂຶ້ນເປັນເລຂາພັກເມືອງ ເຈົ້າເມືອງໆມະຫາໄຊ, ທ່ານ ສົມພິດ ສຸລິຍະວົງ ຄະນະປະຈໍາພັກເມືອງ ຫົວໜ້າຄະນະຈັດຕັ້ງເມືອງ ຂຶ້ນເປັນຮອງເລຂາພັກເມືອງ, ທ່ານ ສີວອນ ທໍາມະວົງ ກໍາມະການພັກເມືອງ ຫົວໜ້ອງວ່າການເມືອງ ຂຶ້ນເປັນ ຄະນະປະຈໍາພັກເມືອງ, ທ່ານ ຂັນອາສາ ພົງອຸດົມ ຮອງປະທານກໍາມະບານເມືອງ ຂຶ້ນເປັນ ກໍາມະການພັກເມືອງ.

ຈາກນັ້ນໃນພິທີກໍ່ໄດ້ມີການເຊັນບົດບັນທຶກ ມອບ-ຮັບໜ້າທີ່ ລະຫວ່າງທ່ານ ບົວພັນ ແສງຈັນ ເຈົ້າເມືອງໆມະຫາໄຊ ຜູ້ເກົ່າ ກັບ ທ່ານ ສົມບູນ ແກ້ວວົງສາ ເຈົ້າເມືອງໆມະຫາໄຊ ຜູ້ໃໝ່. ທ່ານ ບົວພັນ ເເສງຈັນ ເຈົ້າເມືອງທມະຫາໄຊ ຜູ້ເກົ່າໄດ້ຂຶ້ນກ່າວມອບໜ້າທີ່ ພ້ອມທັງລາຍງານໂດຍຫຍໍ້ການນໍາພາ-ຊີ້ນໍາວຽກງານ ຕະຫຼອດໄລຍະທີ່ການຈັດຕັ້ງຂັ້ນເທິງໄດ້ມອບໝາຍໃຫ້ດຳລົງຕຳແໜ່ງເປັນເຈົ້າເມືອງ ຜ່ານມາໃນແຕ່ລະດ້ານເປັນຕົ້ນດ້ານການເມືອງແນວຄິດ, ວຽກງານປ້ອງກັນຊາດ-ປ້ອງກັນຄວາມສະຫງົບ, ດ້ານເສດຖະກິດ, ດ້ານການລົງທຶນ, ທາງດ້ານການເງິນ ແລະ ງົບປະມານ ແລະ ດ້ານອື່ນໆແມ່ນເຫັນວ່າມີຜົນສໍາເລັດໃນຫຼາຍດ້ານ.

ໃນໂອກາດດຽວກັນ ທ່ານ ວັນໄຊ ພອງສະຫວັນ ເຈົ້າເເຂວງໆຄໍາມ່ວນ ກໍ່ໄດ້ມີຄຳເຫັນໂອ້ລົມ ພ້ອມທັງຮຽກຮ້ອງມາຍັງບັນດາພະນັກງານການນຳພາຍໃນເມືອງມະຫາໄຊ ຈົ່ງໃຫ້ຄວາມຮ່ວມມືໃນການຈັດຕັ້ງປະຕິບັດວຽກງານຂອງທ່ານເຈົ້າເມືອງຜູ້ໃໝ່ ພ້ອມນັ້ນ ຄະນະນຳທຸກຂັ້ນຕ້ອງມີຄວາມເປັນເອກກະພາບພ້ອມພາກັນແກ້ໄຂປະກົດການຫຍໍ້ທໍ້ທາງສັງຄົມໂດຍສະເພາະແມ່ນບັນຫາຢາເສບຕິດ ແລະ ສືບຕໍ່ປຸກລະດົມຂະບວນການຮັກຊາດພັດ ທະນາ, ສ້າງຄວາມສາມັກຄີຊ່ວຍເຫຼືອເຊິ່ງກັນ ແລະ ກັນ. ພ້ອມທັງສືບຕໍ່ເອົາໃຈໃສ່ປ້ອງກັນ ແລະ ສະກັດກັ້ນການແຜ່ລະບາດຂອງພະຍາດ ໂຄວິດ-19. ສ່ວນທ່ານເຈົ້າເມືອງທີ່ໄດ້ຮັບການແຕ່ງຕັ້ງໃໝ່ ຈົ່ງສືບຕໍ່ນຳພາຈັດຕັ້ງປະຕິບັດຕາມແຜນການທີ່ໄດ້ກຳນົດໄວ້ ເພື່ອນຳພາເມືອງມະຫາໄຊ ໃຫ້ມີຄວາມຈະເລີນຮຸ່ງເຮືອງເປັນກ້າວໆ.