ມີເດຍລາວແຂວງຄຳມ່ວນ ພິທີ ມອບ – ຮັບ ດັ່ງກ່າວໄດ້ຈັດຂຶ້ນໃນວັນທີ 18 ມີຖຸນາ 2021 ທີ່ອົງການໄອຍາການປະຊາຊົນປະຈຳແຂວງ. ເປັນກຽດເຂົ້າຮ່ວມໂດຍ ທ່ານ ວັນໄຊ ພອງສະຫວັນ ເຈົ້າແຂວງໆ ຄຳມ່ວນ, ມີຫົວໜ້າກົມຈັດຕັ້ງ – ພະນັກງານອົງການໄອຍາການປະຊາຊົນສູງສຸດ, ຕາງໜ້າຄະນະຈັດຕັ້ງແຂວງ, ຄະນະກວດກາພັກແຂວງ, ສະພາປະຊາຊົນແຂວງ, ພະແນກພາຍໃນ ແລະ ພະນັກງານ – ວິຊາການກ່ຽວຂ້ອງເຂົ້າຮ່ວມ.

ທ່ານ ນາງ ບຸນໄທ ປັນແກ້ວ ຫົວໜ້າກົມຈັດຕັ້ງ – ພະນັກງານ ອົງການໄອຍາການປະຊາຊົນສູງສຸດໄດ້ຜ່ານຂໍ້ຕົກລົງສະບັບເລກທີ 146/ອອປສ ແລະ ຂໍ້ຕົກລົງສະບັບເລກທີ 310/ ອອປສ ວ່າດ້ວຍການຮັບເອົາ ແລະ ແຕ່ງຕັ້ງ ທ່ານ ຄຳແດງ ສີບຸນເຮືອງ ຮອງຫົວໜ້າພະແນກວິທະຍາສາດ ແລະ ເຕັກໂນໂລຊີແຂວງ ເປັນຫົວໜ້າອົງການໄອຍາການປະຊາຊົນແຂວງຄຳມ່ວນ, ຂໍ້ຕົກລົງວ່າດ້ວຍການຍົກຍ້າຍ ທ່ານ ທິບພະຈັນ ໂພໄຊ ວ່າການຫົວໜ້າອົງການໄອຍາການປະຊາຊົນແຂວງໄປຢູ່ກອງບັນຊາການປ້ອງກັນຄວາມສະຫງົບແຂວງຄຳມ່ວນ.

ຈາກນັ້ນກໍ່ໄດ້ຮັບຟັງການຜ່ານບົດສະຫລຸບການເຄື່ອນໄຫວວຽກງານໃນໄລຍະການດຳລົງຕຳແໜ່ງວ່າການຫົວໜ້າອົງການໄອຍາການປະຊາຊົນແຂວງແຕ່ປີ 2020 – 2021 ແລະ ບົດບັນທຶກມອບ – ຮັບໜ້າທີ່ ລະຫວ່າງຫົວໜ້າອົງການໄອຍາການປະຊາຊົນແຂວງ ຜູ້ເກົ່າ ແລະ ຜູ້ໃໝ່. ໂດຍສະເພາະແມ່ນສະພາບລວມ, ວຽກງານກົງຈັກການຈັດຕັ້ງພັກ – ພະນັກງານ, ວຽກງານແຜນການ – ການເງິນ ແລະ ວຽກງານທີ່ຈະຕ້ອງໄດ້ສືບຕໍ່ປະຕິບັດໃນຕໍ່ໜ້າ. ພ້ອມນີ້ກໍ່ໄດ້ລົງນາມເຊັນບົດບັນທຶກ ມອບ – ຮັບ ໜ້າທີ່ ລະຫວ່າງ ທ່ານ ທິບພະຈັນ ໂພໄຊ ວ່າການຫົວໜ້າອົງການໄອຍາການປະຊາຊົນແຂວງ ( ຜູ້ເກົ່າ ) ແລະ ທ່ານ ຄຳແດງ ສີບຸນເຮືອງ ຫົວໜ້າອົງການໄອຍາການປະຊາຊົນແຂວງ ( ຜູ້ໃໝ່ ).

ໂອກາດນີ້ ທ່ານ ວັນໄຊ ພອງສະຫວັນ ກໍ່ໄດ້ກ່າວສະແດງຄວາມຍ້ອງຍໍຊົມເຊີຍ ຕໍ່ຜົນງານທີ່ທາງຄະນະຊຸດເກົ່າຍາດມາໄດ້ ຄຽງຄູ່ກັນນັ້ນຍັງໄດ້ຮຽກຮ້ອງມາຍັງຄະນະພັກ, ຄະນະນຳ ຕະຫລອດເຖິງສະມາຊິກພັກ – ພະນັກງານທຸກຂັ້ນ ຈົ່ງໄດ້ເປັນເອກະພາບຕໍ່ການຊັບປ່ຽນໃນຄັ້ງນີ້, ເອົາໃຈໃສ່ຊຸກຍູ້ຊ່ວຍໜູນໃຫ້ຜູ້ທີ່ໄດ້ຮັບໜ້າທີ່ໃໝ່ໃນການປະຕິບັດໜ້າທີ່ວຽກງານໃຫ້ມີຄວາມເອກະພາບກັນ, ເພີ່ມທະວີຄວາມສາມັກຄີເປັນປຶກແຜ່ນເປັນຈິດໜຶ່ງໃຈດຽວໃນໝູ່ຄະນະ, ເສີມຂະຫຍາຍດ້ານຕັ້ງໜ້າ ແລະ ແກ້ໄຂບັນຫາຄົງຄ້າງ ເພື່ອໃຫ້ວຽກງານມີປະສິດທິພາບດີຂຶ້ນກວ່າເກົ່າ, ສືບຕໍ່ເອົາໃຈໃສ່ສຶກສາອົບຮົມການເມືອງແນວຄິດໃຫ້ແກ່ຖັນແຖວພະນັກງານ, ສະມາຊິກພັກເປັນປົກກະຕິ ແລະ ສືບຕໍ່ຂະຫຍາຍມະຕິກອງປະຊຸມໃຫຍ່ຄັ້ງທີ X ຂອງແຂວງ ກໍ່ຄື ແຜນພັດທະນາຂອງວຽກງານອົງການໄອຍາການ ແລະ ຕັ້ງໜ້າປັບປຸງກົງຈັກການຈັດຕັ້ງ, ແຜນການເຄື່ອນໄຫວໃຫ້ຮັບປະກັນຄວາມຖືກຕ້ອງ, ໂປ່ງໃສ, ຍຸຕິທຳ ແລະ ທັນກຳນົດເວລາຕາມກົດໝາຍທີ່ວາງໄວ້.

ທັງນີ້ກໍ່ເພື່ອເປັນການປັບປຸງໜ້າທີ່ວຽກງານໃຫ້ແທດເໝາະຕາມຄວາມຮຽກຮ້ອງຕ້ອງການໃນໄລຍະ ໃໝ່ໃຫ້ດີຂຶ້ນກວ່າເກົ່າ.