ມີເດຍລາວແຂວງສາລະວັນ ພາບຂ່າວ: ທິດລານີ ໂຄດໂຍທາ.
ວັນທີ 22 ມິຖຸນາ 2021 ນີ້, ຢູ່ພະແນກຖະແຫຼງຂ່າວ, ວັດທະນະທຳ ແລະທ່ອງທ່ຽວແຂວງ ໄດ້ຈັດພິທີຮັບມະຫາຊົນກ້າວໜ້າເຂົ້າເປັນສະມາຊິກພັກສຳຮອງຈຳນວນ 8 ສະຫາຍ, ຍິງ 7 ສະຫາຍ ທີ່ມາຈາກ 4 ໜ່ວຍພັກ ທີ່ ຂື້ນກັບ ຄະນະພັກຮາກຖານພະແນກຖະແຫຼງຂ່າວ, ວັດທະນະທຳ ແລະທ່ອງທ່ຽວແຂວງສາລະວັນ, ໃນນັ້ນມາຈາກໜ່ວຍພັກຖະແຫຼງຂ່າວ-ສື່ມວນຊົນ 2 ສະຫາຍ, ໜ່ວຍພັກຄຸ້ມຄອງ-ບໍລິຫານ 2 ສະຫາຍ, ໜ່ວຍພັກວັດທະນະທຳ 2 ສະຫາຍ ແລະ ໜ່ວຍພັກທ່ອງທ່ຽວ 2 ສະຫາຍ, ໂດຍການເຂົ້າຮ່ວມເປັນປະທານຂອງ ສະຫາຍ ມະໄລວອນ ສີປະເສີດ ກໍາມະການພັກແຂວງ ເລຂາຄະນະພັກຮາກຖານ ຫົວໜ້າພະແນກຖະແຫຼງຂ່າວ – ວັດທະນະທຳ ແລະ ທ່ອງທ່ຽວແຂວງ, ມີເລຂາ-ຮອງເລຂາໜ່ວຍພັກ, ສະມາຊິກພັກສົມບູນ-ສຳຮອງເຂົ້າຮ່ວມ.

ມະຫາຊົນກ້າວໜ້າທີ່ເຂົ້າເປັນສະມາຊິກພັກສຳຮອງ ແມ່ນໄດ້ຜ່ານການຕິດຕາມຈາກຄະນະໜ່ວຍພັກ, ເຫັນວ່າຜ່ານມາຜູ້ກ່ຽວແມ່ນໄດ້ເອົາໃຈໃສ່ຕັ້ງໜ້າເຝິກຝົນຫຼໍ່ຫຼອມຕົນເອງໃນດ້ານຄວາມຮູ້ຄວາມສາມາດ, ມີຫົວຄິດປະດິດສ້າງໃນການປະຕິບັດໜ້າທີ່ວຽກງານ, ພັດທະນາຕົນເອງ ແລະ ຈົນສາມາດເຮັດໃຫ້ເຮັດສໍາເລັດໜ້າທີ່ວຽກງານທີ່ການຈັດຕັ້ງມອບໝາຍໃຫ້, ມີແນວຄິດອຸ່ນອ່ຽງທຸ່ນທ່ຽງ ເຊື່ອໝັ້ນຕໍ່ການນໍາພາຂອງພັກ-ລັດ, ມີທັດສະນະຫຼັກໝັ້ນ, ຄຸນທາດການເມືອງໜັກແໜ້ນ, ມີຄຸນສົມບັດສິນທໍາປະຕິວັດ, ມີແບບແຜນດໍາລົງຊີວິດທີ່ປອດໃສຂາວສະອາດ, ບໍລິສຸດສັດຊື່ຕໍ່ໜ້າທີ່ວຽກງານ ແລະ ເຮັດຫຼ້ອນໜ້າທີ່ຕາມການຈັດຕັ້ງມອບໝາຍໃຫ້, ເຄົາລົບລະບຽບຂອງພັກ, ກົດໝາຍຂອງລັດ, ມີຄວາມສາມັກຄີພາຍໃນ ແລະພາຍນອກຢ່າງກ້ວາງຂວາງ ແລະໜັກແໜ້ນ.

ໃນຕອນທ້າຍຂອງພິທີ ສະຫາຍ ມະໄລວອນ ສີປະເສີດ ກໍ່ໄດ້ໂອ້ລົມ ແລະ ເນັ້ນໃຫ້ສະມາຊິກສຳຮອງ ຈົ່ງສືບຕໍ່ກໍ່ສ້າງ ແລະ ເຝິກຜົນຫຼໍ່ຫຼອມຕົນເອງ, ສຶກສາຄົ້ນຄວ້າແນວທາງນະໂຍຂອງພັກ, ທິດສະດີມາກເລນິນ, ແນວຄິດຂອງປະທານໄກສອນພົມວິຫານຜູ້ນໍາທີ່ແສນເຄົາລົບຮັກ,ກໍາແໜ້ນສິດ ແລະ ໜ້າທີ່ຂອງສະມາຊິກພັກໃຫ້ເລິກເຊິ່ງ, ປະຕິບັດຕາມ 5 ໜ້າທີ່, 6 ສິດ ແລະ 9 ຂໍຫ້າມຂອງສາມາຊີກພັກເຂົ້າສູ່ຊີວີດຕົວຈີ່ງ, ທັງນີ້ກໍ່ເພື່ອເປັນການຂະຫຍາຍສະມາຊິກພັກໃຫ້ໄດ້ທັງປະລິມານ ແລະຄຸນະພາບແນໃສ່ປະກອບສ່ວນໃນພາລະກິດປົກປັກຮັກສາ ແລະ ສ້າງສາພັດທະນາປະເທດຊາດໃຫ້ເຂັ້ມແຂງເປັນກ້າວໆ.