ມີເດຍລາວແຂວງເຊກອງ ໂດຍ: ດາວສະຫວັນ
ໃນຕອນເຊົ້າຂອງວັນທີ 30 ເມສາ 2021 ນີ້,ຢູ່ທີ່ສະໂມສອນເມືອງລະມາມໄດ້ມີພິທີສອບເສັງບັນຈຸເຂົ້າເປັນລັດຖະກອນໃໝ່ ປະຈຳງວດ III ປີ2021ໂດຍການເຂົ້າຮ່ວມເປັນປະທານ ແລະຕັດຫົວບົດສອບເສັງຂອງທ່ານໄຊຍະຫວັດ ກ້ອນຄຳໝັ້ນ ຄະນະປະຈຳພັກ ຮອງເລຂາພັກເມືອງລະມາມ ມີບັນດາຫົວໜ້າ,ຮອງ ຫ້ອງການ,ຄະນະກຳມະການ ພ້ອມດ້ວຍນັກສອບເສັງເຂົ້າຮ່ວມ.

ໃນພິທີ,ທ່ານ ສົມພົງ ເກດຈັນ ຫົວໜ້າຫ້ອງການພາຍໃນ ເມືອງລະມາມໄດ້ໃຫ້ກຽດຂຶ້ນຜ່ານຂໍ້ຕົກລົງຂອງເຈົ້າແຂວງເຊກອງ ສະບັບເລກທີ 44/ຈຂ.ຊກ ລົງວັນທີ 12/3/2021 ວ່າດ້ວຍອະນຸມັດແຈກຢາຍຕົວເລກລັດຖະກອນໃໝ່ໃຫ້ແກ່ບັນດາກົງຈັກຊ່ວຍວຽກອົງຄະນະພັກສາບຂວາງຂັ້ນແຂວງ ແລະອົງຄະນະພັກສາວຍຂວາງຂັ້ນເມືອງ,ຂໍ້ຕົກລົງຂອງທ່ານເຈົ້າເມືອງ-ເມືອງລະມາມ ສະບັບເລກທີ 287/ຈມ, ລົງວັນທີ 26/4/2021 ວ່າດ້ວຍແຕ່ງຕັ້ງຄະນະຊີ້ນຳການສອບເສັງບັນຈຸພະນັກງານລັດຖະກອນໃໝ່. ພ້ອມນີ້ບັນດານັກສອບເສັງກໍ່ໄດ້ເຊື່ອມຊຶມກ່ຽວກັບກົດລະບຽບການສອບເສັງເຂົ້າເປັນລັດຖະກອນໃໝ່ ໂດຍສະເພາະຂໍ້ຫ້າມຕໍ່ນັກສອບເສັງ ເປັນຕົ້ນແມ່ນຫ້າມນັກສອບເສັງສົ່ງສຽງດັງ,ຫ້າມນຳເອົາເຄື່ອງເອ້ລັກໂຕນິກທຸກປະເພດເຂົ້າໃນການສອບເສັງ,ຫ້າມໃຫ້ຄົນອື່ນກ່າຍ ແລະກ່າຍຄົນອື່ນໃນເວລາສອບເສັງ,ຫ້າມນັກສອບເສັງເອົາເອກະສານທຸກປະເພດທີ່ກ່ຽວຂ້ອງກັບການສອບເສັງເດັດຂາດ;ການສອບເສັງມີຄຳຖາມ-ຕອບ ແບບປາລະໄນທັງໝົດ 50 ຂໍ້,ຂໍ້ລະ 2 ຄະແນນ ແລະແບບສຳພາດດ້ວຍການຂຽນມີ 5 ຂໍ້ ໂດຍໃຊ້ເວລາສອບເສັງທັງໝົດ 90 ນາທີ,ມີນັກສອບເສັງເຂົ້າຮ່ວມທັງໝົດ16 ຄົນ,ຍິງ 6 ຄົນ.

ໂອກາດນີ້,ທ່ານ ໄຊຍະຫວັດ ກ້ອນຄຳໝັ້ນ ຮອງເລຂາພັກເມືອງລະມາມ ກໍ່ໄດ້ໃຫ້ກຽດໂອ້ລົມຕໍ່ບັນດານັກສອບເສັງຈົ່ງພ້ອມກັນຕັ້ງອົກຕັ້ງໃຈໃນການສອບເສັງເປັນຢ່າງດີໃຫ້ປະສົບຜົນເລັດ,ພ້ອມນີ້ກໍ່ໄດ້ຮຽກຮ້ອງມາຍັງໃຫ້ຄະນະກຳມະການສອບເສັງຕ້ອງຕິດຕາມກວດກາດ້ວຍຄວາມໂປ່ງໃສ່,ຍະຕິທຳ ເພື່ອເຮັດການສອບເສັງຄັດເລືອກລັດຖະກອນຄັ້ງນີ້ໃຫ້ໄດ້ຄຸນນະພາບ ແລະປະລິມານສູງ.