ມີເດຍລາວແຂວງເຊກອງ ຂ່າວ:ດາວສະຫວັນ ພິທີປະກາດການບົ່ງຕົວແຕ່ງຕັ້ງປະທານກວດກາພັກ-ລັດ, ຫົວໜ້າ, ຮອງ ຫ້ອງການ ແລະຖອນພະນັກງານຫຼັກແຫຼ່ງນຳພາ-ຄຸ້ມຄອງລົງຊ່ວຍຄະນະກຳມະການ, ຄະນະບ້ານບາງຫ້ອງການອ້ອມຂ້າງເມືອງ ໄດ້ຈັດຂຶ້ນຕອນບ່າຍຂອງວັນທີ 25 ມິຖຸນາ 2021 ທີ່ຜ່ານມາ,ໂດຍພາຍໄຕ້ການເຂົ້າຮ່ວມຂອງທ່ານ ວົງເດືອນ ຈັນທະບຸດຊຽງ ເລຂາພັກເມືອງ-ເຈົ້າເມືອງລະມາມ ມີບັນດາພະແນການກ່ຽວຂ້ອງຂັ້ນແຂວງ,ກຳມະການພັກເມືອງ,ຫົວໜ້າ, ຮອງ ຫ້ອງການ, ພະນັກງານວິຊາການທີ່ກ່ຽວຂ້ອງເຂົ້າຮ່ວມ.

ທ່ານ ໄຂຄຳ ດອຍສີທົນ ກຳມະການພັກ ຫົວໜ້າຄະນະຈັດຕັ້ງເມືອງ ໄດ້ໃຫ້ກຽດຂຶ້ນຜ່ານຂໍ້ຕົກລົງຂອງເຈົ້າເມືອງ ສະບັບເລກທີ 355/ຈມ, ລົງວັນທີ 8.6.2021 ວ່າດ້ວຍຍົກຍ້າຍ ທ່ານ ໄຊຍະຫວັດ ກ້ອນຄຳໝັ້ນ ຜູ້ຊີ້ນຳວຽກງານການເມືອງແນວຄິດ,ວຽກງານພັກ-ພະນັກງານ ໄປຮັບໜ້າທີ່ໃໝ່ ຢູ່ອົງການກວດກາລັດເມືອງ ເປັນປະທານອົງກວດກວດກາພັກ-ລັດ ເມືອງ, ຍົກຍ້າຍ ທ່ານ ບົວໄລ ວິໄລວົງ ຮອງເລຂາພັກເມືອງ ປະທານກວດກາພັກ-ລັດເມືອງ ໄປຮັບໜ້າທີ່ໃໝ່ຢູ່ຫ້ອງວ່າການເມືອງ,ແຕ່ງຕັ້ງທ່ານ ສິນປະເສີດ ອາໄພຍະລາດ ກຳມະການພັກເມືອງ ເປັນຫົວໜ້າຫ້ອງໂຍທາທິການ ແລະຂົ່ນສົ່ງ ແລະ ແຕ່ງຕັ້ງທ່ານ ສຳລີ ສິມບູລົມ ເປັນຮອງຫົວໜ້າຫ້ອງການກະສິກຳ ແລະປ່າໄມ້ ເມືອງລະມາມ. ພ້ອມນີ້ ກໍ່ໄດ້ຜ່ານຂໍ້ຕົກລົງຂອງທ່ານເຈົ້າເມືອງ ສະບັບເລກທີ 335/ຈມ ລົງວັນທີ 25.6.2021 ວ່າດ້ວຍຖອນພະນັກງານຫຼັກແຫຼ່ງນຳພາ-ຄຸ້ມຄອງລົງຊ່ວຍຄະນະພັກບ້ານຂຶ້ນມາປະຈຳການປົກະຕິຢູ່ພາຍໃນກົມກອງຂອງຕົນຕື່ມອີກ.

ໂອກາດນີ້, ທ່ານ ວົງເດືອນ ຈັນທະບຸດຊຽງ ເຈົ້າເມືອງລະມາມ ກໍ່ໄດ້ໃຫ້ກຽດໂອ້ລົມ ເຊິ່ງທ່ານກໍ່ໄດ້ຮຽກຮ້ອງມາຍັງບັນທ່ານທີ່ຖືກຊັບຊ້ອນຮັບໜ້າທີ່ໃໝ່ຈົ່ງເອົາໃຈໃສ່ສືບຕໍ່ປະຕິບັດຕາມພາລະບົດບາດ, ສິດ ແລະ ໜ້າທີ່ ຂອງຕົນຮັບຜິດຊອບຢ່າງເຂັ້ມງວດ,ພ້ອມກັນຈັດຕັ້ງປະຕິບັດວຽກງານທີ່ພັກລັດມອບໝາຍໄປຈັດຕັ້ງປະຕິບັດໃຫ້ປະສົບຜົນສຳເລັດ.