ມີເດຍລາວແຂວງເຊກອງ ຂ່າວ-ພາບ: ດາວສະຫວັນ
ພິທີໄຂສົກຮຽນໃໝ່ສົກຮຽນ 2021-2022 ທົ່ວເມືອງລະມາມ ແຂວງເຊກອງໄດ້ໄຂຂຶ້ນຢ່າງເປັນທາງການ ໃນຄັ້ງວັນທີ 7 ກັນຍາ 2021 ທີ່ສະໂມສອນຫ້ອງວ່າການເມືອງດັ່ງກ່າວ ພາຍໄຕ້ການເຂົ້າຮ່ວມຂອງທ່ານ ວົງເດືອນ ຈັນທະບຸດຊຽງ ເຈົ້າເມືອງໆລະມາມ, ທ່ານ ໂພທອງ ສີລັນດອນ ຮອງເຈົ້າເມືອງ ຜູ້ຊີ້ນຳວຽກງານຂົງເຂດວັດທະນະທຳ-ສັງຄົມຂັ້ນເມືອງ, ມີບັນດາຄະນະຫ້ອງການສຶກສາທິການ ແລະ ກິລາເມືອງ,ຄະນະພະແນກສຶກສາແຂວງ, ພະນັກງານຄູ-ອາຈານມາຈາກໂຮງຮຽນປະຖົມ-ມັດທະຍົມ ອ້ອມຂ້າງ,ຄະນະອຳນາດການປົກຄອງບ້ານເທດສະບານ ພ້ອມດ້ວຍຫຼານນ້ອຍນັກຮຽນເຂົ້າຮ່ວມ.

ທ່ານ ນາງ ພອນໄພ ສີວິໄລ ກຳມະການພັກເມືອງ ຫົວໜ້າຫ້ອງການສຶກສາທິການ ແລະ ກິລາເມືອງລະມາມ ກໍ່ໄດ້ລາຍງານຜົນສຳເລັດການຈັດຕັ້ງປະຕິບັດແຜນພັດທະນາການສຶກສາ ແລະກິລາ ປະຈຳສົກຮຽນ 2020-2021 ໂດຍຫຍໍ້ເຊິ່ງທ່ານກ່າວວ່າ: ທົ່ວເມືອງມີໂຮງຮຽນທັງໝົດ 84 ແຫ່ງ, ອາຄານຮຽນ 151 ຫຼັງ, ມີ 610 ຫ້ອງອາຄານ, ມີໂຮງຮຽນລ້ຽງເດັກ-ອະນຸບານ 11 ແຫ່ງ(ເອກະຊົນ 2 ແຫ່ງ),ໂຮງຮຽນປະຖົມສຶກສາ 56 ແຫ່ງ(ເອກະຊົນ 2 ແຫ່ງ), ໂຮງຮຽນມັດທະຍົມຕົ້ນ 10 ແຫ່ງ, ມັດທະຍົມປາຍ 1 ແຫ່ງ ແລະ ມັດທະຍົມສົມບູນ 6 ແຫ່ງ, ມີຫ້ອງຮຽນທັງໝົດ 430 ຫ້ອງ; ໃນນີ້ຫ້ອງລ້ຽງເດັກ 7 ຫ້ອງ,ອະນຸບານ 33 ຫ້ອງ,ຫ້ອງກຽມ 25 ຫ້ອງ, ປະຖົມ 209 ຫ້ອງ(ຫ້ອງຄວບ 67 ຫ້ອງ); ມັດທະຍົມຕົ້ນ 98 ຫ້ອງ, ມັດທະຍົມປາຍ 58 ຫ້ອງ; ມີນັກຮຽນທັງໝົດ 11.848 ຄົນ,ຍິງ 2.511 ຄົນໃນນັ້ນມີນັກຮຽນລ້ຽງເດັກ-ອະນຸບານ,ຫ້ອງກຽມ 1.589 ຄົນ, ຍິງ 803 ຄົນ, ນັກຮຽນປະຖົມ 5.251 ຄົນ, ຍິງ 2.511 ຄົນ, ນັກຮຽນມັດທະຍົມຕົ້ນ 3.063 ຄົນ, ຍິງ 1.491 ຄົນ, ນັກຮຽນມັດທະຍົມປາຍ 1.945 ຄົນ, ຍິງ 967 ຄົນ, ມີຜູ້ອຳນວຍການ,ຄູສອນ ແລະພະນັກງານບໍລິຫານໂຮງຮຽນທັງໝົດ 699 ຄົນ, ຍິງ 447 ຄົນ.

ໂອກາດດຽວກັນນີ້, ກໍ່ໄດ້ຮັບຟັງການໂອ້ລົມຂອງທ່ານ ວົງເດືອນ ຈັນທະບຸດຊຽງ ເຈົ້າເມືອງລະມາມ ເຊີ່ງທ່ານກໍ່ໄດ້ຮຽກຮອງມາຍັງຄະນະຜູ້ບໍລິຫານຫ້ອງການສຶກສາ ຈົ່ງພ້ອມກັນສືບຕໍ່ເອົາໃຈໃສ່ສຶກສາອົບຮົມການເມືອງແນວຄິດໃຫ້ພະນັກງານຄູອາຈານ ເຂົ້າໃຈຕໍ່ແນວທາງນະໂຍບາຍຂອງພັກ-ລັດວາງອອກຢ່າງເລິກເຊິງ, ເຮັດວຽກຢ່າງລວມສູນປະຊາທິປະໄຕເປັນໝູ່ຄະນະ, ພ້ອມຕິດຕາມການຂຶ້ນຫ້ອງລົງຫ້ອງຂອງພະນັກງານຄູສອນໃຫ້ເຂັ້ມງວດ ພ້ອມນີ້ກໍ່ຕ້ອງໄດ້ປະຕິບັດມາດຕະການປ້ອງກັນ,ຄວບຄຸມ, ຕ້ານ ແລະສະກັດກັ້ນການແຜ່ລະບາດຂອງພະຍາດໂຄວິດ-19ອີກດ້ວຍ. ພ້ອມນີ້ທ່ານກໍ່ໄດ້ມອບອຸປະກອນການຮຽນ-ການສອນ ແລະກິລາ ໃຫ້ຫ້ອງການສຶກສາທິການ ແລະກິລາ ຕື່ມອີກ.