ມີເດຍລາວແຂວງຈຳປາສັກ ຂ່າວ-ພາບ: ທັດຊະນະ
ທ່ານ ພົນໂທ ວິໄລ ຫຼ້າຄຳຟອງ ກຳມະການກົມການເມືອງສູນກາງພັກ ລັດຖະມົນຕີກະຊວງປ້ອງກັນ ຄວາມສະຫງົບ ໄດ້ເຄື່ອນໄຫວຊີ້ນຳວຽກງານກະກຽມເຜີຍແຜ່ຜົນສຳເລັດກອງປະຊຸມໃຫຍ່ ຄັ້ງທີ XI ຂອງພັກ ປະຊາຊົນ ປະຕິວັດລາວ ຢູ່ແຂວງຈຳປາສັກ, ໃນວັນທີ 19 ເມສານີ້ ທີ່ສຳນັກງານຫ້ອງວ່າການແຂວງຈຳປາສັກ ໂດຍການຕ້ອນຮັບຂອງ ທ່ານ ວິໄລວົງ ບຸດດາຄຳ ກຳມະການສູນກາງພັກ ເລຂາຄະນະບໍລິຫານງານພັກແຂວງ ເຈົ້າແຂວງຈຳປາສັກ, ມີບັນດາຄະນະປະຈຳພັກແຂວງເຂົ້າຮ່ວມ.

ທ່ານ ວິໄລວົງ ບຸດດາຄຳ ໄດ້ລາຍງານບາງວຽກງານທີ່ສຳຄັນໃນໄຕມາດທີ I ກໍຄືມະຕິກອງປະຊຸມຄົບ ຄະນະບໍລິຫານງານພັກແຂວງ ຄັ້ງທີ 3, ຜົນສຳເລັດໃນ 3 ເດືອນຕົ້ນປີໄຕມາດທີ I, ວຽກງານປ້ອງກັນຊາດ-ປ້ອງກັນຄວາມສະຫງົບ, ວຽກກໍ່ສ້າງຮາກຖານການມືອງ, ວຽກງານ 3 ສ້າງພັດທະນາຊົນນະບົດ ແລະ ລຶບລ້າງ ຄວາມທຸກຍາກ ແລະ ວຽກງານເສດຖະກິດ-ສັງຄົມ, ສໍາລັບການກະກຽມເຜີຍແຜ່ຜົນສຳເລັດກອງປະຊຸມໃຫຍ່ ຄັ້ງທີ XI ຂອງພັກ ແລະ ຄັ້ງທີ VIII ຂອງອົງຄະນະພັກແຂວງແມ່ນໄດ້ມີການກະກຽມເນື້ອໃນຈິດໃຈຂອງມະຕິ (ບົດລາຍງານການເມືອງ) ກອງປະຊຸມໃຫຍ່ຄັ້ງທີ XI ຂອງພັກ; ແຜນພັດທະນາເສດຖະກິດ-ສັງຄົມ 5 ປີ (2021-2025); ກົດລະບຽບພັກປະຊາຊົນ ປະຕິວັດລາວ ຄັ້ງທີ XI (ສະບັບປັບປຸງ); ມະຕິກອງປະຊຸມໃຫຍ່ຄັ້ງທີ VIII ຂອງອົງຄະນະພັກແຂວງ ແລະ ແຜນພັດທະນາເສດຖະກິດ-ສັງຄົມ 5 ປີຂອງແຂວງ (2021-2025), ສຳລັບວຽກງານຄວບຄຸມພະຍາດໂຄວິດ-19 ຂອງຄະນະສະເພາະກິດຂັ້ນແຂວງ ເລີ່ມແຕ່ຕົ້ນປີ 2020 ມາຮອດ ວັນທີ 16 ເມສາ 2021 ມີຄົນເຂົ້າຜ່ານ 3 ດ່ານສາກົນທັງຫມົດ 108.890 ຄົນ, ມີຄົນລາວ 47.600 ຄົນ, ຕ່າງປະເທດ 61.290 ຄົນ, ສະເພາະໃນປີ 2021 ມີຄົນເຂົ້າຜ່ານດ່ານສາກົນວັງເຕົ່າ ແລະ ດ່ານສາ ກົນໜອງນົກຂຽນ 22.815 ຄົນ, ເຂົ້າຜ່ານປະມານ 200-300 ຄົນ/ວັນ, ໃນນັ້ນແຮງງານລາວເຂົ້າຜ່ານວັນລະ ປະມານ 50-100 ຄົນ, ນອກນັ້ນແມ່ນຄົນຕ່າງປະເທດທີ່ຂັບລົດຂົນສົ່ງເຂົ້າ-ອອກແຕ່ລະວັນ ແລະ ໄດ້ເກັບຕົວ ຢ່າງກວດຊອກຫາເຊື້ອ COVID-19, ຜ່ານມາແຂວງຈໍາປາສັກມີແຮງງານມາກັກບໍລິເວນຢູ່ສູນຂອງແຂວງ ສະ ສົມທັງໝົດ 19.003 ຄົນ, ໃນປີ 2021 ມີແຮງງານມາກັກບໍລິເວນແລ້ວທັງໝົດ 7.106 ຄົນ, ປັດຈຸບັນຍັງມີ ຜູ້ຖືກກັກບໍລິເວນຢູ່ສູນຫຼັກ 21 ເມືອງປະທຸມພອນ ມີ 303 ຄົນ ແລະ ກັກຢູ່ສູນຂອງ 9 ເມືອງ, ສ່ວນບຸກຄົນ ທີ່ກັກບໍລິເວນຢູ່ 6 ໂຮງແຮມໃນປີ 2021 ສະສົມທັງໝົດ 160 ຄົນ, ປັດຈຸບັນຍັງກັກບໍລິເວນຢູ່ 16 ຄົນ.


ໂອກາດນີ້, ທ່ານ ພົນໂທ ວິໄລ ຫຼ້າຄຳຟອງ ໄດ້ມີຄຳເຫັນຊີ້ນຳໃນການກະກຽມເຜີຍແຜ່ຜົນສຳເລັດກອງ ປະຊຸມໃຫຍ່ ຄັ້ງທີ XI ຂອງພັກຢູ່ແຂວງຈຳປາສັກ ການເຜີຍແຜ່ດັ່ງກ່າວເພື່ອໃຫ້ຜູ້ເຂົ້າຮ່ວມໄດ້ຮັບຮູ້, ເຂົ້າໃຈ ແລະ ກຳແໜ້ນເນື້ອໃນຈິດໃຈທີ່ສຳຄັນຂອງບັນດາມະຕິທີ່ນຳມາເຜີຍແຜ່ເຊື່ອມຊຶມ ທັງເປັນການປຸກລະດົມກຳລັງ ແຮງຂອງທົ່ວສັງຄົມ, ອົງການຈັດຕັ້ງສັງຄົມ, ຜູ້ປະກອບການທັງພາຍໃນ ແລະ ຕ່າງປະເທດ ລວມທັງປະຊາຊົນ ບັນດາເຜົ່າເຂົ້າຮ່ວມປະກອບສ່ວນຈັດຕັ້ງປະຕິບັດບັນດາມະຕິດັ່ງກ່າວເຂົ້າສູ່ວຽກງານຕົວຈິງ. ນອກນັ້ນຄະນະພັກ ທຸກຂັ້ນຕ້ອງໄດ້ເສີມຂະຫຍາຍຄວາມເປັນເຈົ້າການ, ມີຫົວຄິດປະດິດສ້າງ, ກຳນົດແຈ້ງໃນການປະຕິບັດບັນດາ ມາດຕະການຕົວຈິງເພື່ອຮັບປະກັນຍົກສູງຄວາມຮັບຜິດຊອບຂອງສະມາຊິກພັກ. ຕ້ອງມີຄວາມຮັບຜິດຊອບຕໍ່ຜົນ ໄດ້ຜົນເສຍໃນການປະຕິບັດໜ້າທີ່ເສີມຂະຫຍາຍຢ່າງແຂງແຮງໃນການຄົ້ນຄວ້າຄົ້ນຄິດ, ກ້າເຮັດກ້າຮັບຜິດຊອບ ຕາມຂອບເຂດສິດຂອງຕົນ.