ວັນທີ19 ມີນາ 2021 ນີ້ ທ່ານ ນາງ ແສງເດືອນ ຫຼ້າຈັນທະບູນ ລັດຖະມົນຕີກະຊວງສຶກສາທິການ ແລະ ກິລາ ພ້ອມດ້ວຍຄະນະໄດ້ລົງຢ້ຽມຍາມເມືອງ ຈອມເພັດ ແຂວງຫຼວງພະບາງໂດຍ ໃຫ້ກຽດຕ້ອນຮັບອັນອົບອຸ່ນຈາກທ່ານ ສົມສັກ ສີລິວົງ ຮອງເຈົ້າເມືອງຈອມເພັດ ພ້ອມດ້ວຍຄະນະ.
ທ່ານ ນາງ ຈັນສະໝຸດ ສຸກກະເສີມ ຫົວໜ້າຫ້ອງການສຶກສາທິການ ແລະ ກິລາເມືອງ ຈອມເພັດ ໄດ້ຂຶ້ນລາຍງານສະພາບການສຶກສາໃນທົ່ວເມືອງມີໂຮງຮຽນທັງໝົດ 89 ແຫ່ງ, ໃນນັ້ນອະນຸບານ 10 ແຫ່ງ, ມູນລະປະຖົມ 11 ແຫ່ງ, ປະຖົມສົມບູນ 61 ແຫ່ງ, ມັດທະຍົມຕົນ 4 ແຫ່ງ ແລະ ມັດທະຍົມສົມບູນ 3 ແຫ່ງ, ມີນັກຮຽນທັງໝົດ 6.476 ນ້ອງ, ຍິງ 2.539 ນ້ອງ, ມີພະນັກງານລັດຖະກອນຄູທັງໝົດ 385 ທ່ານ, ຍິງ 195 ທ່ານ ໃນນັ້ນມີຄູອາສາສະໝັກ 75 ຄົນ, ຍິງ 51 ຄົນ ໃນໄລຍະ 1 ປີຜ່ານມາອັດຕາການເຂົ້າຮຽນຂອງນັກຮຽນເກນອາຍຸ 0-2 ປີປະຕິບັດໄດ້ 1,4% ອັດຕາການເຂົ້າຮຽນຂອງເດັກເກນອາຍຸ 3-5 ປີປະຕິບັດໄດ້ 43,5% ອັດຕາການເຂົ້າຮຽນຂອງເດັກໃນເກນອາຍຸ 5 ປີ ປະຕິບັດໄດ້ 61.9% ອັດຕາການເຂົ້າຮຽນລວມໃນຊັ້ນປະຖົມປະຕິບັດໄດ້ 98,12% ອັດຕາການເລື່ອນຂັ້ນ ແລະ ຈົບຊັ້ນປະຖົມປະຕິບັດໄດ້ 93,31% ອັດຕາການເຂົ້າຮຽນຊັ້ນມັດທະຍົມຕອນຕົ້ນ ປະຕິບັດໄດ້ 79,14% ອັດຕາການເລື່ອນຂັ້ນ ແລະ ຈົບຊັ້ນມັດທະຍົມຕອນຕົ້ນປະຕິບັດໄດ້ 87,38% ອັດຕາການເຂົ້າຮຽນຊັ້ນມັດທະຍົມຕອນປາຍປະຕິບັດໄດ້ 38,81% ອັດຕາການເລື່ອນຂັ້ນແລະ ຈົບຊັ້ນມັດທະຍົມຕອນປາຍປະຕິບັດໄດ້86,76% ຄຽງຄູ່ກັນນັ້ນວຽກງານຕ່າງໆ ທີ່ນອນຢູ່ໃນໜ່ວຍງານການສຶກສາກໍໄດ້ຮັບການປັບປຸງ ແລະ ຍົກລະດັບເຊັ່ນ: ສຳເລັດການລົງເຜີຍແຜ່ເອກະສານລະບຽບກົດໝາຍຂອງການສຶກສາໃຫ້ແກ່ພະນັກງານຄູພາຍໃນເມືອງ, ລົງຕິດຕາມແລະຊຸກຍູ້ຄູສອນ, ສ້າງໂອກາດໃຫ້ຄູພາຍໃນເມືອງໃຫ້ໄດ້ຮັບການຝຶກອົບຮົມຫຼັກສູນການຮຽນ-ການສອນ.

ນອກນັ້ນ, ວຽກງານການສຶກສານອກລະບົບ (ການຈັດການຮຽນ-ການສອນປະຖົມບຳລຸງ ແລະ ມັດທະຍົມຕົ້ນບຳລຸງ) ໄດ້ລົງມືປະຕິບັດຢ່າງຕໍ່ເນື່ອງ ໂອກາດນີ້ທ່ານ ນາງ ແສງເດືອນ ຫຼ້າຈັນທະບູນ ໄດ້ຍ້ອງຍໍຊົມເຊີນຜົນງານທີ່ທາງຫ້ອງການສຶກສາທິການ ແລະ ກິລາເມືອງ ຍາດມາໄດ້ພ້ອມທັງເນັ້ນໜັກໃຫ້ທຸກພາກສ່ວນທີ່ກ່ຽວຂ້ອງຮ່ວມມືກັນສຶກສາອົບຮົມການເມືອງແນວຄິດໃຫ້ພະນັກງານ ແລະ ຄູອາຈານຢ່າງຕໍ່ເນື່ອງພ້ອມທັງຊອກຫາຊ່ອງທາງປັບປຸງການຮຽນການສອນຂອງຄູອາຈານໃຫ້ເຂົ້າສູ່ຄຸນນະພາບເທື່ອລະກ້າວ.
ພາບ-ຂ່າວ: ເມືອງ ຈອມເພັດ