ມີເດຍລາວແຂວງຫຼວງນ້ຳທາ ຂ່າວ: ສົມພອນ ຂຸນດາວົງ ວັນທີ 29 ມິຖຸນາ 2021 ຢູ່ທີ່ລັດວິສາຫະກິດນໍ້າປະປາແຂວງຫຼວງນໍ້າທາເຊື່ອມຊຶມ ແລະ ຜັນຂະຫຍາຍມະຕິກອງປະຊຸມ ຄັ້ງທີ Xl ຂອງພັກ,ໂດຍການເປັນປະທານຂອງ ສະຫາຍ ສິດທິກອນ ພະນາລາຍ ຮອງອໍານວຍການລັດວິສາຫະກິດນໍ້າປະປາ ແຂວງຫຼວງນໍ້າທາ, ມີຄະນະອໍານວຍການລັດວິສາຫະກິດນໍ້າປະປາ, ແຂກຖືກເຊີນ ແລະພະນັກງານພາຍໃນລັດວິສາຫະກິດນໍ້າປະປາເຂົ້າຮ່ວມ.

ສະຫາຍ ສິດທິກອນ ພະນາລາຍ ຮອງອໍານວຍການລັດວິສາຫະກິດນໍ້າປະປາ ແຂວງຫຼວງນໍ້າທາ ໄດ້ເຜີຍແຜ່ມະຕິກອງປະຊຸມໃຫຍ່ ຄັ້ງທີ Xl ຂອງພັກ ໂດຍຍົກໃຫ້ເຫັນຄວາມໝາຍ, ຄວາມສໍາຄັນ ມະຕິກອງປະຊຸມໃຫຍ່ ຄັ້ງທີ Xl ຂອງພັກ ເຊີ່ງແມ່ນເຫດການ ການເມືອງທີ່ສໍາຄັນ ແຫ່ງການສຶບຕໍ່ຍຶດໝັ້ນ ແລະ ເສີມຂະຫຍາຍແນວທາງປ່ຽນແປງໃໝ່ຢ່າງຮອບດ້ານທີ່ມີຫຼັກການຂອງພັກໃຫ້ເຂົ້າສູ່ລວງເລິກ,

ໄດ້ກໍານົດທັດສະນະແຫ່ງການສ້າງການຫັນປ່ຽນຢ່າງແຂງແຮງ, ເລິກເຊິ່ງ, ຮອບດ້ານ ແລະ ເປັນລະບົບ, ຄະນະພັກແຕ່ລະຂັ້ນ ຕ້ອງຖືເອົາການຄົ້ນຄວ້າ, ເຊື່ອມຊຶມ, ກໍານົດທິດທາງພື້ນຖານ, ຄາດໝາຍສູ້ຊົນຮອດປີ 2025 ແລະ ວຽກງານຈຸດສຸມແຕ່ລະຂົງເຂດ ໂດຍຕິດພັນກັບການກໍານົດໃຫ້ຈະແຈ້ງຂອງໜ້າທີ່ວຽກງານ, ບັນຫາຕົວຈິງທີ່ຂະແໜງການ, ທ້ອງຖິ່ນຂອງຕົນ ຈະຕ້ອງສຸມໃສ່ແກ້ໄຂດ້ວຍການປຸກລະດົມຂະບວນການຕົວຈິງຂອງມະຫາຊົນຢ່າງແຂງແຮງໄປພ້ອມກັບການຍົກສູງບົດບາດການຈັດຕັ້ງ, ເພີ່ມທະວີຄວາມເຂັ້ມແຂງ ແລະ ຄວາມເຂັ້ມງວດໃນການຄຸ້ມຄອງພັກ ແລະ ລະບຽບພາຍໃນພັກ, ຮັບປະກັນແກ້ໄຂບັນຫາຕ່າງໆ ທີ່ເກີດຂື້ນໃຫ້ຖືກຈຸດ ແລະ ເປັນລະບົບ ຕັ້ງໜ້າແກ້ໄຂ ປະກົດການຫຍໍ້ທໍ້ຕ່າງໆໃຫ້ຂາດຕົວ,

ການເຊື່ອມຊຶມມະຕິກອງປະຊຸມໃຫຍ່ ຄັ້ງທີ Xl ຂອງພັກ ຄັ້ງນີ້ ກໍ່ເພື່ອແນ່ໃສ່ເຮັດໃຫ້ພະນັກງານລັດຖະກອນພາຍໃນລັດວິສາຫະກິດນໍ້າປະປາແຂວງຫຼວງນໍ້າທາໄດ້ ຮັບຮູ້ ແລະ ເຂົ້າໃຈ ເນື້ອໃນທີ່ສໍາຄັນຕົ້ນຕໍ ແລະ ວຽກງານຈຸດສຸມ ທີ່ຈະຕ້ອງເອົາໃຈໃສ່ຊີ້ນໍາ-ນໍາພາ ໃນແຕ່ລະຂົງເຂດ, ເພື່ອສືບຕໍ່ນໍາພາຈັດຕັ້ງເຊື່ອມຊຶມ ແລະ ຜັນຂະຫຍາຍມະຕິ ຄັ້ງທີ Xl ຂອງພັກ ເຂົ້າສູ່ວຽກງານຕົວຈິງ ແຕ່ຂັ້ນແຂວງ ລົງຮອດຂັ້ນເມືອງ ແລະ ຮາກຖານໃຫ້ທົ່ວເຖີງເປັນຕົ້ນ

ແມ່ນສ້າງການຫັນປ່ຽນທາງດ້ານຄວາມຮັບຮູ້, ທັດສະນະ ແລະ ການກະທໍາ ເເນ່ໃສ່ສົ່ງເສີມດ້ານດີແກ້ໄຂຂໍ້ຄົງຄ້າງສ້າງຄວາມເຊື່ອໝັ້ນຂອງພະນັກງານ ແລະ ປະຊາຊົນບັນດາເຜົ່າຕໍ່ການນໍາພາຂອງພັກ ການບໍລິຫານຄຸ້ມຄອງຂອງລັດ, ສືບຕໍ່ຊີ້ນໍາ – ນໍາພາ ປົກປັກຮັກສາ ແລະ ສ້າງສາພັດທະນາປະເທດຊາດເວົ້າລວມ ເວົ້າສະເພາະກໍ່ຄືຂົງເຂດວຽກງານ ລັດວິສາຫະກິດນໍ້າປະປາແຂວງຫຼວງນໍ້າທາ ໄດ້ຮັບການພັດທະນາດີຂື້ນ.ໂອກາດນີ້ ຍັງໄດ້ຜ່ານເອກະສານແຜນພັດທະນາເສດຖະກິດ-ສັງຄົມແຫ່ງຊາດ 5ປີ ຄັ້ງທີ່ IX ປີ 2021 – 2025 ຕື່ມອີກ.