ມີເດຍລາວແຂວງສາລະວັນ ຂ່າວພາບ: ວິໄລວອນ ສິດທິໄຊ ທ່ານ ຄຳຜ່ານ ສີລາວີ ຫົວໜ້າພະແນກອຸດສາຫະກຳ-ການຄ້າແຂວງສາລະວັນ ໄດ້ເປີດເຜີຍຕໍ່ສື່ມວນຊົນ ແຂວງ ໃນວັນທີ 12 ພຶດສະພານີ້ວ່າ: ປັດຈຸບັນລາຄາສິນຄ້າ ນັບແຕ່ໄລຍະປິດການເຂົ້າ-ອອກ ແຂວງ, ເມືອງ ແມ່ນຢູ່ໃນເກນປົກກະຕິ ເຊັ່ນ: ຊີ້ນງົວ-ຄວາຍ ລາຄາ 60-70 ພັນກີບ, ລາຄາຊີ້ນໝູ ບໍ່ເກີນ 45 ພັນກີບ, ປາ 25 ພັນກີບ, ໄຂ່ໄກ່ ໜ່ວຍ 1.000 ກີບ ແລະ ພຶດຜັກຕ່າງໆ ກໍ່ເປັນປົກກະຕິ ຍ້ອນໄດ້ເອົາໃຈໃສ່ຄຸ້ມຄອງລາຄາສິນຄ້າ, ການສະໜອງສິນຄ້າ ແລະມີການແນະນຳບັນດາຜູ້ປະກອບການຄ້າຂາຍ ພາຍໃນເທສະບານແຂວງ ແລະ ບັນດາເມືອງ ເອົາໃຈໃສ່ປະຕິບັດມາດຕະການປ້ອງກັນພະຍາດໂຄວິດ-19 ຢ່າງເຂັ້ມງວດ ໂດຍເຮັດໜ້າທີ່ເຜີຍແຜ່, ເຊື່ອມຊຶມຄຳສັ່ງຕ່າງໆ ພ້ອມທັງແຕ່ງຕັ້ງຄະນະຮັບຜິດຊອບຂັ້ນແຂວງ, ເມືອງ ຕິດຕາມ, ຄຸ້ມຄອງ ແລະ ລາຍງານ ເປັນປົກກະຕິ.

ແຂວງສາລະວັນ ສາມາດສະໜອງສະບຽງອາຫານ ປະເພດຊີ້ນ, ປາ ແລະ ພຶດພັກຕ່າງໆ ຕອບສະໜອງໃຫ້ຜູ້ບໍລິໂພກ ໄດ້ຢ່າງພຽງພໍ ແລະ ທົ່ວເຖີງ, ທັງໄດ້ຈຳກັດການນຳເຂົ້າຈາກຕ່າງປະເທດ, ຕ່າງແຂວງ ໄດ້ເປັນຢ່າງດີ, ໂດຍມີສິນຄ້າບາງປະເພດເທົ່ານັ້ນ ທີ່ນຳເຂົ້າຈາກຕ່າງແຂວງ, ເຊັ່ນດຽວກັບການຂົນສົ່ງສິນຄ້າ ຕ້ອງໄດ້ຮັບການອະນຸຍາດ ແລະ ຢັ້ງຢືນຈາກເຈົ້າໜ້າທີ່ຂະແໜງການຄ້າ, ສາທາລະນະສຸກແຂວງ ຮັບປະກັນຄວາມຖືກຕ້ອງຕາມລະບຽບຫຼັກການ ແລະ ຄວາມປອດໄພໃນການປ້ອງກັນພະຍາດໂຄວິດ-19. ນອກຈາກນັ້ນ, ໄດ້ແນະນຳຮ້ານຂາຍເຄື່ອງຍົກ-ຍ່ອຍ, ຂາຍເສື້ອຜ້າ ທີ່ບໍ່ມີຄວາມຈຳເປັນ ແມ່ນໄດ້ປິດບໍລິການ ເພື່ອຫຼຸດຜ່ອນການແອອັດ ພາຍໃນຕະຫຼາດ.

ທ່ານ ຄຳຜ່ານ ສີລາວີ ຍັງໄດ້ຮຽກຮ້ອງທຸກຊັ້ນຄົນໃນສັງຄົມ ເພີ່ມທະວີເອົາໃຈໃສ່ປະຕິບັດຕາມຄຳສັ່ງຕ່າງໆຢ່າງເຂັ້ມງວດ ແລະ ບັນດາຜູ້ປະກອບການ, ພໍ່ຄ້າຊາວຊາຍ ເປັນເຈົ້າການຮ່ວມກັນ, ບໍ່ສວຍໂອກາດກັກຕູນ, ຂຶ້ນລາຄາສິນຄ້າ ໃນຍາມວິກິດ ແລະ ຊ່ວຍປະຄັບປະຄອງເຊີ່ງກັນ ເພື່ອເຮັດໃຫ້ບັນຍາກາດການຊື້-ຂາຍ ມີຄວາມສະຫງົບ ແລະ ຍຸຕິທຳ, ພ້ອມດຽວກັນນັ້ນ ເປັນເຈົ້າການປ້ອງກັນພະຍາດໂຄວິດ-19.