ມີເດຍລາວແຂວງສາລະວັນ ໃນທ້າຍອາທິດທີ່ຜ່ານມາ ບໍລິສັດລາວໂທລະຄົມມະນາຄົມ ມະຫາຊົນ ສາຂາແຂວງສາລະວັນ ໄດ້ມອບເງິນ ແລະ ເຄື່ອງນຸ່ງຫົ່ມ ມູນຄ່າ 3 ລ້ານກວ່າກີບ ໃຫ້ພໍ່ແມ່ປະຊາຊົນບ້ານດົງບັງ ເມືອງເລົ່າງາມ ແຂວງສາລະວັນ ທີ່ໄດ້ຮັບຜົນກະທົບຈາກໄພພິບັດທຳມະຊາດ. ໂດຍການມອບຂອງ ທ່ານ ຖາວອນ ກິ່ງສັກດາ ຮັກສາການຫົວໜ້າບໍລິສັດລາວໂທລະຄົມ ມະນາຄົມ ມະຫາຊົນ ສາຂາ ແຂວງສາລະວັນ ພ້ອມຄະນະ ຕາງໜ້າຮັບຂອງ ທ່ານ ກິແກ້ວ ຄໍາພູມີ ນາຍບ້ານດົງບັງ ພ້ອມດ້ວຍພໍ່-ແມ່ ປະຊາຊົນເຂົ້າຮ່ວມ. ທັງນີ້ ກໍ່ເພື່ອເປັນການຊ່ວຍເຫຼືອບັນເທົາທຸກເບື້ອງຕົ້ນ ໃຫ້ພໍ່ແມ່ປະຊາຊົນ ບ້ານດົງບັງ ທີ່ໄດ້ຮັບຜົນກະທົບຈາກໄພພິບັດທໍາມະຊາດ ທີ່ເກີດຂື້ນໃນຕອນບ່າຍວັນທີ 4 ເມສາຜ່ານມາ ເຊິ່ງເກີດມີຝົນຕົກ, ລົມພັດແຮງ ເຮັດໃຫ້ບ້ານເຮືອນປະຊາຊົນເປ້ເພ, ເສຍຫາຍ, ໄດ້ຮັບຜົນກະທົບຢ່າງໜັກໜ່ວງ.

ທ່ານ ຖາວອນ ກິ່ງສັກດາ ຍັງໃຫ້ຮູ້ຕື່ມອີກວ່າ: ເຄື່ອງທີ່ນຳມາມອບໃນຄັ້ງນີ້ມີ ເງິນມູນຄ່າ 3 ລ້ານກວ່າກີບ ແລະເຄື່ອງນຸ່ງຫົ່ມຈຳນວນໜຶ່ງ ທີ່ໄດ້ຈາກການລະດົມນຳອ້າຍເອື້ອຍນ້ອງພະນັກງານໃນບໍລິສັດ ເພື່ອນຳມາມອບໃຫ້ພໍ່ແມ່ປະຊາຊົນ. ເພື່ອແບ່ງເບົາຄວາມທຸກໂສກຂອງພໍ່ແມ່ປະຊາຊົນໃນເບື້ອງຕົ້ນ. ຈາກນັ້ນບໍລິສັດກໍ່ໄດ້ມີກິດຈະກຳແຈກເບີໂທລະສັບ ແລະລົງທະບຽນຟີ ໃຫ້ພໍ່ແມ່ປະຊາຊົນບ້ານດົງບັງຕື່ມອີກ.