ໂດຍສືບຕໍ່ແນວທາງນະໂຍບາຍມະນຸດສະທໍາອັນສະເໝີຕົ້ນ ສະເໝີປາຍ ຂອງພັກ ແລະ ລັດຖະບານລາວ ທີ່ມີຕໍ່ວຽກງານ ສໍາຫຼວດ ແລະ ຂຸດຄົ້ນ ເພື່ອຊອກຫາຮ່ອງຮອຍ ແລະ ສິ່ງເສດເຫຼືອຂອງທະຫານອາເມຣິກາທີ່ເສຍຊີວິດໃນປາງສົງຄາມຢູ່ລາວ ແລະ ຕອບສະໜອງຕາມການສະເໜີ ແລະ ຮ້ອງຂໍຈາກລັດຖະບານ ແລະ ປະຊາຊົນອາເມຣິກາ ຕະຫຼອດໄລຍະເວລາ 30 ກວ່າປີ ແຫ່ງການຮ່ວມມືສອງຝ່າຍ ລາວ-ອາເມຣິກາ ໃນການດໍາເນີນວຽກງານສໍາຫຼວດ ແລະ ຂຸດຄົ້ນ ເພື່ອຊອກຫາສິ່ງເສດເຫຼືອຂອງທະຫານອາເມຣິກາທີ່ເສຍຊີວິດໃນປາງສົງຄາມຢູ່ລາວ, ລັດຖະບານ ແຫ່ງ ສປປ ລາວ ກໍ່ຄືປະຊາຊົນລາວບັນດາເຜົ່າ ໂດຍສະເພາະແມ່ນພໍ່ແມ່ປະຊາຊົນໃນຂົງເຂດທີ່ມີການສໍາຫຼວດ ແລະ ຂຸດຄົ້ນຕົວຈິງ ໄດ້ໃຫ້ຄວາມເອົາໃຈໃສ່ຮ່ວມມືກັບຝ່າຍອາເມຣິກາຫຼາຍທີ່ສຸດ ເທົ່າທີ່ຈະເປັນໄປໄດ້ຕາມເງື່ອນໄຂ ແລະ ຄວາມອາດສາມາດຕົວຈິງຂອງຕົນ, ອັນໄດ້ເຮັດໃຫ້ການປະຕິບັດງານຮ່ວມສອງຝ່າຍ (JFAs) ໄດ້ຮັບຜົນສໍາເລັດທີ່ເປັນໜ້າເພີ່ງພໍໃຈຕະຫຼອດມາ.

ນັບແຕ່ມີການຮ່ວມມືກັນເພື່ອດໍາເນີນການສໍາຫຼວດ ແລະ ຂຸດຄົ້ນ ເພື່ອຊອກຫາສິ່ງເສດເຫຼືອຂອງທະຫານອາເມຣິກາ ທີ່ເສຍຊີວິດໃນປາງສົງຄາມຢູ່ລາວຈົນມາຮອດປະຈຸບັນ, ສອງຝ່າຍໄດ້ຂຸດຄົ້ນພົບສິ່ງເສດເຫຼືອທະຫານອາເມຣິກາ ໄດ້ຈັດສົ່ງ ແລະ ສັນລະສູດສິ່ງເສດເຫຼືອຂອງທະຫານອາເມຣິກາໄດ້ແລ້ວ ຈໍານວນ287 ຄົນ ຫຼື ຫຼາຍກວ່າ 50% ຂອງຈໍານວນທັງໝົດ ແລະ ຍັງອີກ 286 ຄົນ ທີ່ຝ່າຍອາເມຣິກາຈໍາເປັນຕ້ອງໄດ້ຮ່ວມມືກັບຝ່າຍລາວ ໃນການສືບຕໍ່ຄົ້ນຫາ. ຕໍ່ບັນຫານີ້, ລັດຖະບານລາວຈະສືບຕໍ່ໃຫ້ການຮ່ວມມືກັບຝ່າຍອາເມຣິກາ ອີງຕາມຄວາມອາດສາມາດ ແລະ ເງື່ອນໄຂຕົວຈິງຂອງຕົນ ກໍ່ຄືບັນຍາກາດແຫ່ງການພົວພັນຮ່ວມມືລະຫວ່າງ ສອງປະເທດ ລາວ-ອາເມຣິກາໃນອະນາຄົດ.

ແຜນການປະຕິບັດງານຮ່ວມ ລາວ-ອາເມຣິກາ ຢູ່ພາກສະໜາມເພື່ອສໍາຫຼວດ ແລະ ຂຸດຄົ້ນ ຊອກຫາຮ່ອງຮອຍ ແລະ ສີ່ງເສດເຫຼືອຂອງທະຫານອາເມຣິກາທີ່ເສຍຊີວິດໃນປາງສົງຄາມຢູ່ລາວຄັ້ງນີ້ ແມ່ນໄດ້ມີແຜນການຮ່ວມມືມາແລ້ວ, ແຕ່ໄດ້ຖືກໂຈະມາຫຼາຍຄັ້ງແລ້ວ ເພາະຍ້ອນສະພາບການແຜ່ລະບາດຂອງພະຍາດ COVID-19, ແຕ່ມາຮອດຕົ້ນເດືອນເມສາ 2021 ພາຍຫຼັງໄດ້ຮັບການອະນຸຍາດຈາກ ຄະນະສະເພາະກິດເພື່ອປ້ອງກັນ, ຄວບຄຸມ ແລະ ແກ້ໄຂການລະບາດຂອງພະຍາດ COVID-19.

ດັ່ງນັ້ນ, ໃນວັນທີ 28 ເມສາ 2021, ຍົນ C-17ຂອງກອງທັບ ສະຫະລັດ ອາເມຣິກາ ຈຶ່ງໄດ້ມາສົ່ງທີມງານວິຊາການອາເມຣິກາ ແລະ ສົ່ງເຄື່ອງຮັບໃຊ້ພາກສະໜາມໃນວຽກງານສໍາຫຼວດ ແລະ ຂຸດຄົ້ນ ເພື່ອຊອກຫາຮ່ອງຮອຍ ແລະ ສິ່ງເສດເຫຼືອຂອງທະຫານອາເມຣິກາ ທີ່ເສຍຊີວິດໃນປາງສົງຄາມຢູລາວ ຫຼື MIA ຄັ້ງທີ 4 ຂອງປີ 2021 ຫຼື 21-4LA ທີ່ຈະມີຂຶ້ນໃນລະຫວ່າງວັນທີ 12 ພຶດສະພາ ຫາ 21 ມິຖຸນາ 2021 ຢູ່ເຂດເມືອງບົວລະພາ, ແຂວງຄໍາມ່ວນ.

ທີມງານດັ່ງກ່າວຈະກັກຕົວຢູ່ໂຮງແຮມຢູນະຄອນຫຼວງວຽງຈັນເປັນເວລາ 14 ວັນ ແລະ ຈະດໍາເນີນການຂຸດຄົ້ນຕົວຈີງແຕ່ວັນທີ 13 ພຶດສະພາ ຫາ 18 ມິຖຸນາ 2021 ແລະ ຈະເດີນທາງອອກຈາກ ສປປ ລາວໃນວັນທີ 21 ມິຖຸນາ 2021.

Medialaos MMD