ສະພາບການແຜ່ລະບາດຂອງພະຍາດ ປອດອັກເສບຈາກເຊື້ອຈຸລະໂລກສາຍພັນໃໝ່ ໂຄວິດ-19 ໄດ້ກາຍເປັນໄພຂົ່ມຂູ່ ທາງດ້ານສາທາລະນະສຸກ ໃນທົ່ວໂລກ, ມາຮອດປັດຈຸບັນມີ 60 ກວ່າປະເທດພົບຜູ້ຕິດເຊື້ອພະຍາດ ດັ່ງກ່າວລວມແລ້ວກວ່າ 95 ພັນຄົນ ແລະ ມີຜູ້ເສຍຊີວິດ 3.200 ກວ່າ​ຄົນ, ຂະນະທີ່ ສປປ ລາວ ເຖິງວ່າຈະຍັງບໍ່ພົບຜູ້ຕິດເຊື້ອກໍຕາມ, ແຕ່ລັດຖະບານໄດ້ຊີ້ນໍາໃຫ້ ທຸກພາກສ່ວນປະຕິບັດ ມາດຕະການປ້ອງກັນໃນລະດັບສູງ ເພື່ອຕ້ານການລະບາດຂອງພະຍາດຮ້າຍແຮງນີ້ ໂດຍສະເພາະແມ່ນໄດ້ເລື່ອນເວລາ ແລະ ຍົກເລີກການຈັດງານສໍາຄັນຂອງຊາດ, ເທສະການບຸນຕ່າງໆ ຂອງແຕ່ລະທ້ອງຖິ່ນ ແລະ ກິດຈະກໍາທາງສັງຄົມອື່ນໆ ທີ່ຈະມີຂຶ້ນໃນເດືອນມີນານີ້ ເປັນຕົ້ນ ການສະເຫລີມສະຫລອງວັນສ້າງຕັ້ງ ພັກປະຊາຊົນ ປະຕິວັດລາວ ຄົບຮອບ 65 ປີ, ການສະເຫລີມສະຫລອງໄຫຫີນເປັນມໍລະດົກໂລກ, ງານມະຫາກໍາກິລາແຫ່ງຊາດຢູ່ ແຂວງຊຽງຂວາງ, ງານບຸນຜີຕາໂຂນ ຢູ່ເມືອງປາກລາຍ ແຂວງໄຊຍະບູລີ, ງານວາງສະແດງສິນຄ້າເຟີນີເຈີວຽງຈັນ ຄັ້ງທີ 5, ງານວາງ ສະແດງສິນຄ້າລາວ-ໄທ ທີ່ນະຄອນຫລວງວຽງຈັນ ແລະ ກິດຈະກໍາອື່ນໆ.

ທັງ​ນີ້ ກໍ​ເພື່ອປະຕິບັດຕາມແຈ້ງການ ຂອງຄະ­ນະ​ສະ­ເພາະ​ກິດ ເພື່ອ​ປ້ອງ​ກັນ, ຄວບ​ຄຸມ ແລະ ແກ້​ໄຂ​ການ​ລະ­ບາດ​ ຂອງ​ພະ­ຍາດ​ໂຄວິດ-19 (COVID-19) ຢ່າງເຂັ້ມງວດ ທີ່ໄດ້ແຈ້ງໃຫ້ອໍານາດ ການປົກຄອງທ້ອງຖິ່ນ, ທຸກພາກສ່ວນສັງຄົມຕະຫລອດຮອດ ປະຊາຊົນບັນດາເຜົ່າໃນທົ່ວປະເທດ ເພື່ອໃຫ້ໂຈະ, ເລື່ອນຊົ່ວຄາວ ແລະ ຈໍາກັດຜູ້ເຂົ້າຮ່ວມການຈັດງານປະເພນີ, ງານສັງສັນ ແລະ ກິດຈະກໍາຕ່າງໆທີ່ມີຈໍານວນຄົນເຂົ້າຮ່ວມຫລາຍ ລວມທັງການຈັດແຂ່ງຂັນກິລາຕ່າງໆ ອອກໄປກ່ອນ ໃນໄລຍະທີ່ມີການລະບາດຂອງພະຍາດນີ້, ຖ້າພາກສ່ວນໃດມີຄວາມຈໍາເປັນຕ້ອງ ຈັດງານແມ່ນໃຫ້ຄະນະຮັບຜິດຊອບ ຫລື ເຈົ້າພາບປະຕິ ບັດມາດຕະການ ການປ້ອງກັນ ພະຍາດດັ່ງກ່າວ ໂດຍການກວດອຸນຫະພູມ ​ເມື່ອພົບເຫັນຜູ້ໃດມີອາການໄຂ້, ໄອ ຫລື ຫາຍໃຈຜິດປົກກະຕິ ທີ່ຄ້າຍຄືນິຍາມອາການຂອງພະຍາດນີ້ ແມ່ນບໍ່ໃຫ້ອະນຸຍາດ ເຂົ້າຮ່ວມງານໂດຍເດັດຂາດ. 

Medialaos MMD