ວັນເສົາ ທີ 3 ເມສາ ວັດສີມຸງຄຸນ ບ້ານວັດກາງ ເມືອງ ແລະ ແຂວງສາລະວັນ ໄດ້ຈັດພິທີແຫ່ປະສາດເຜີ້ງ, ຜ້າໄຕປີດົກ, ໜັງສືຜູກໃບລານ ຕິດພັນກັບການສົມໂພດພຣະພຸດທະຣູບປາງຊະນະມານ ແລະ ພຣະພຸດທະຣູບປາງປະທານພອນ ເຊິ່ງພາຍໃນມີພຣະອາຈານ, ເຈົ້າອະທິການວັດສີມຸງຄຸນ ບ້ານວັດກາງ ພ້ອມດ້ວຍພຣະສົງສຳມະເນນ, ພາຍນອກ ເຂົ້າຮ່ວມຂອງທ່ານ ໂພໄຊ ໄຊຍະສອນ ເຈົ້າແຂວງໆ ສາລະວັນ ພ້ອມຄອບຄົວເຈົ້າສັດທາຖວາຍພຣະປາງຊະນະມານ, ທ່ານ ນາງ ອິນແປງ ຊາມົນຕີ ພ້ອມຄອບຄົວເຈົ້າສັດທາຖວາຍພຣະປາງປະທານພອນ, ມີທ່ານ ຈັນສີລອນ ສີສົມບູນ ເຈົ້າເມືອງໆ ສາລະວັນ ຕະຫຼອດຮອດຄະນະນຳຂັ້ນແຂວງ, ຄະນະນຳຂັ້ນເມືອງ ແລະ ອອກຕົນຍາດໂຍມທີ່ເຫຼື້ອມໃສໃນພຣະພຸດທະສາສະໜາທັງໃກ້ ແລະ ໄກເຂົ້າຮ່ວມຢ່າງຫຼວງຫຼາຍ.


ພາຍໃນພິທີມີການຖວາຍວັດຖຸປັດໃຈ, ຜ້າໄກ, ຕົ້ນເງິນ, ຕົ້ນຄຳ ເຄື່ອງໄຊຍະທານຕ່າງໆ ຈາກອອກຕົນຍາດໂຍມ, ແຫ່ນາກ, ບວດນາກ ແລະ ຕອນແລງຂອງວັນດຽວກັນ ກໍ່ໄດ້ມີພິທີແຫ່ປະສາດເຜີ້ງຈຳນວນ 9 ອັນ, ຜ້າໄຕປີດົກ, ໜັງສືຜູກໃບລານ ຈາກຈຸດຫ້ອງການນາຍບານໆ ວັດກາງອ້ອມຮອບເທດສະບານເມືອງສາລະວັນ ແລ້ວແຫ່ອ້ອມວັດສີມຸງຄຸນຈຳນວນ 3 ຮອບ ດ້ວຍບັນຍາກາດອັນຟົດຟື້ນເຕັມໄປດ້ວຍເອກະລັກວັດທະນະທຳ ຮີດຄອງປະເພນີອັນດີງາມ ແລະ ຕອນກາງຄືນຂອງວັນດຽວກັນ ກໍ່ໄດ້ໄຫ້ວພຣະຮັບສິນ, ໄຕ້ທູບ, ໄຕ້ທຽນໄຊ ແລ້ວເຂົ້າສູ່ພິທີໂສມໂພດພຣະພຸດທະຣູບຕະຫຼອດຄືນ.

ໃນຕອນເຊົ້າວັນທີ 4 ເມສາ ປີ 2021 ກົງວັນອາທິດ ກໍ່ໄດ້ມີພິທີຕັກບາດຖວາຍສັງຄະທານແດ່ພຣະສົງສໍາມະເນນ ເປັນອັນວ່າເສດຊີ້ນພິທີໃນມື້ນັ້ນ ພິທີແຫ່ປະສາດເຜີ້ງ, ຜ້າໄຕປີດົກ, ໜັງສືຜູກໃບລານ ຕິດພັນກັບການສົມໂພດພຣະພຸດທະຣູບຄັ້ງນີ້ຍັງເປັນການສະເຫຼີມສະຫຼອງຫໍໄຕປີດົກທີ່ໄດ້ປະຕິບັດກັນມາທຸກໆ ປີ ແລະ ເປັນການອະນຸລັກ, ສົ່ງເສີມວັດທະນະທໍາ-ຮີດຄອງປະເພນີອັນດີງາມຂອງຊາດລາວໄວ້ໄຫ້ໝັ້ນຄົງຕະຫຼອດໄປ.
ພາບ-ຂ່າວ: ສິດຕາ ເພັດວົງສາ