ມີເດຍາວແຂວງເຊກອງ (ຂ່າວ-ພາບ: ແກ້ວໄຊຍະວົງ) ວັນທີ 17 ພຶດສະພາ 2021 ທີ່ຫ້ອງວ່າການແຂວງເຊກອງ, ກຸ່ມບໍລິສັດ ວຽງຈັນ ອໍໂຕເມເຊິນ ແອນໂຊລູເຊິນ ເອັນຈີເນຍຣິງ (VASE) ໄດ້ມອບເງິນຈໍານວນ 20 ລ້ານກີບໃຫ້ແກ່ແຂວງເຊກອງ ເພື່ອປະກອບສ່ວນເຂົ້າໃນວຽກງານປ້ອງກັນ, ຄວບຄຸມ ແລະແກ້ໄຂການລະບາດຂອງພະຍາດໂຄວິດ-19 ເຊິ່ງກ່າວມອບແມ່ນທ່ານ ອານຸພາບ ພົນເທບສອນ ຮອງຜູ້ອໍານວຍການບໍລິສັດ ແລະໃຫ້ກຽດຮັບແມ່ນທ່ານ ຄໍາສອນ ກອນເຍີ ຮອງເຈົ້າແຂວງເຊກອງ, ປະທານຄະນະສະເພາະກິດປ້ອງກັນຂັ້ນແຂວງ ໂດຍມີທ່ານ ຂັນຕີ ສີລະວົງສາ ຮອງເຈົ້າແຂວງໆເຊກອງ, ຮອງຫົວໜ້າຄະນະຊີ້ນໍາຄະນະສະເພາະກິດຂັ້ນແຂວງ ແລະພາກສ່ວນກ່ຽວຂ້ອງເຂົ້າຮ່ວມເປັນສັກຂີພິຍານ.

ໃນໂອກາດດັ່ງກ່າວ, ທ່ານ ຄໍາສອນ ກອນເຍີ ໄດ້ສະແດງຄວາມຂອບໃຈ ແລະຍ້ອງຍໍຊົມເຊີຍມາຍັງບໍລິສັດ, ທີ່ໄດ້ມີຄວາມຕື່ນຕົວເປັນເຈົ້າການປະກອບສ່ວນທຶນຮອນ ເພື່ອຊ່ວຍເຫຼືອໃຫ້ແກ່ການເຄື່ອນໄຫວວຽກງານຕ້ອນ ແລະແກ້ໄຂການລະບາດຂອງພະຍາດໂຄວິດ-19, ໃນນາມສ່ວນຕົວ ກໍຄືຕາງໜ້າການນໍແຂວງແມ່ນຮູ້ສຶກພາກພູມໃຈ ແລະເຊື່ອແນ່ວ່າ ຈະນໍາເອົາເງິນ, ປັດຈຸປັດໄຈທີ່ໄດ້ໃນເທື່ອນີ້ ເຂົ້າໃນການເຄື່ອນໄຫວວຽກງານໃຫ້ມີປະສິດທິພາບ ແລະປະສິດທິຜົນ.

ທ່ານຮອງເຈົ້າແຂວງໄດ້ກ່າວຕື່ມອີກວ່າ: ໃນຄວາມເປັນຈິງວຽກງານປ້ອງກັນ, ຄວບຄຸມ ແລະແກ້ໄຂການລະ ບາດຂອງພະຍາດໂຄວິດ-19 ເປັນວຽກໜຶ່ງທີ່ໜັກໜ່ວງ ແລະມີຄວາມຈໍາເປັນຈະຕ້ອງໄດ້ໃຊ້ທຶນຮອນເປັນຈໍານວນຫຼວງຫຼາຍ, ດ້ວຍເຫດນີ້ ຈຶ່ງເຮັດໃຫ້ໜ່ວຍງານທີ່ກ່ຽວຂ້ອງຈໍາຕ້ອງໄດ້ແຈ້ງການຫາໜ່ວຍງານອື່ນ ເພື່ອເປັນການສົມທົບທຶນຮອນຮ່ວມກັນ.