ທ່ານ ຣັດຕະນະໄຊ ເພັດສຸວັນ ຫົວໜ້າກົມຄວບຄຸມພະຍາດຕິດຕໍ່ ກະຊວງສາທາລະນະສຸກ, ຕາງໜ້າໃຫ້ກອງ ເລຂາຄະນະສະເພາະກິດ ເພື່ອປ້ອງກັນ, ຄວບຄຸມ ແລະ ແກ້ໄຂການລະບາດຂອງພະຍາດ COVID-19 ໄດ້ລາຍ ງານກ່ຽວກັບການເກັບຕົວຢ່າງມາກວດວິເຄາະ ແລະ ຄົ້ນຫາຜູ້ຕິດເຊື້ອພະຍາດໃນວັນທີ 10​ ມີນາ 2021 ທີ່ກະຊວງ ສາທາ ສປປ ລາວ ໄດ້ກວດພົບຜູ້ຕິດເຊື້ອໃໝ່ ຈຳນວນ 1 ຄົນ.

ທ່ານ ຣັດຕະນະໄຊ ເພັດ​ສຸ​ວັນ ໄດ້ລາຍງານໃຫ້ຮູ້ວ່າ: ຜູ້ຕິດເຊື້ອນ້ຳເບີ 48 ແມ່ນເພດຊາຍ ອາຍຸ 43 ປີ, ສັນຊາດລາວ ອາຊີບພໍ່ຄ້າຂາຍຜັກ, ເຮັດວຽກຢູ່ແຂວງປະທຸມທານີ ປະເທດໄທ; ຜູ້ກ່ຽວແມ່ນຈຳກັດບໍລິເວນຢູ່ສູນທີ່ຄະ ນະສະເພາະກິດກຳນົດໄວ້ຢູ່ແຂວງສະຫວັນນະເຂດ ຊຶ່ງປະຫວັດຂອງຜູ້ກ່ຽວ ແຂງແຮງດີ, ບໍ່ມີອາການສະແດງຫຍັງ ແລະ ບໍ່ໄດ້ກວດຊອກຫາໂຄວິດ-19 ກ່ອນເດີນທາງເຂົ້າມາ ສປປ ລາວ; ໃນໄລຍະເຮັດວຽກຢູ່ແຂວງປະທຸມທານີ ຜູ້ກ່ຽວ ໄດ້ອາໄສຢູ່ຫ້ອງພັກຄົນດຽວ ເນື່ອງຈາກມີການລະບາດຂອງພະຍາດໂຄວິດ-19 ຢູ່ແຂວງດັ່ງກ່າວ ຜູ້ກ່ຽວຈຶ່ງກັບຄືນມາ ສປປ ລາວ ໃນວັນທີ 4​ ມີນາ 2021 ໂດຍນັ່ງລົດໂດຍສານ ຈາກແຂວງປະທຸມທານີ ມາຫາ ແຂວງ ມຸກດາຫານ. ໃນວັນທີ 5 ມີນາ 2021​ ຜູ້ກ່ຽວມາຮອດແຂວງສະຫວັນນະເຂດ ແລະ ຖືກນໍ​າສົ່ງໄປຈຳກັດບໍລິເວນຢູ່ສູນທີ່ຄະ ນະສະເພາະກິດກຳນົດໄວ້. ພາຍຫຼັງ ທີ່ໄດ້ເກັບຕົວຢ່າງຜູ້ກ່ຽວມາກວດຊອກຫາພະຍາດໂຄວິດ-19 ນັ້ນ, ໃນວັນທີ 9 ມີນາ 2021 ​ຜົນກວດຈາກຫ້ອງວິເຄາະຂອງໂຮງໝໍແຂວງສະຫວັນນະເຂດ ແມ່ນກວດພົບເຊື້ອ COVID-19 ຈຶ່ງໄດ້ນຳ ສົ່ງຜູ້ກ່ຽວເຂົ້ານອນແຍກປ່ຽວ,​ ຕິດຕາມອາການ ແລະ ປິ່ນປົວຢູ່ໂຮງໝໍແຂວງສະຫວັນນະເຂດ ພ້ອມດຽວກັນນັ້ນ ຍັງໄດ້ສົ່ງຕົວຢ່າງມາກວດຢັ້ງຢືນຢູ່ສູນວິເຄາະ ແລະ ລະບາດວິທະຍາ.

ໃນວັນທີ 10 ມີນາ 2021​ ຜົນກວດຈາກ ສູນວິເຄາະ ແລະ ລະບາດວິທະຍາ ຢັ້ງຢືນຜົນກວດ ແມ່ນພົບເຊື້ອ COVID-19; ປັດຈຸບັນຜູ້ກ່ຽວໄດ້ເຂົ້ານອນແຍກປ່ຽວ, ຕິດຕາມອາການ ແລະ ປິ່ນປົວຢູ່ໂຮງໝໍທີ່ຖືກກຳນົດໄວ້ ແລະ ເຈົ້າໜ້າທີ່ໄດ້ຕິດຕາມຜູ້ສຳຜັດໃກ້ຊິດທັງໝົດ 15 ຄົນ ແລະ ໄດ້ເກັບຕົວຢ່າງມາກວດວິເຄາະ ຢູ່ໂຮງໝໍແຂວງສະຫວັນນະເຂດ, ໃນນັ້ນ 5 ຄົນ ເຫັນວ່າ ຜົນກວດແມ່ນບໍ່ພົບເຊື້ອ,​ ທີ່ເຫຼືອແມ່ນກໍ​າລັງລໍຖ້າຜົນກວດຢູ່ ແລ້ວຈະລາຍງານໃຫ້ບັນດາທ່ານຊາບຕື່ມໃນພາຍຫຼັງ, ພ້ອມດຽວກັນ ຍັງໄດ້ສືບ ຕໍ່ເຝົ້າລະວັງ ແລະ ຈຳກັດບໍລິເວນຜູ້ສຳຜັດໃກ້ຊິດ ຈົບຄົບ 14 ວັນ.

ສັງລວມການກວດວິເຄາະ ນັບແຕ່ເດືອນມັງກອນ 2020 ຮອດ ວັນທີ 10​ ມີນາ 2021 ກວດພົບເຊື້ອສະສົມ ທັງໝົດ 48 ຄົນ. ສຳລັບຄົນເຈັບຕິດເຊື້ອພະຍາດ COVID-19 ທີ່ຍັງນອນຕິດຕາມອາການ ແລະ ປິ່ນປົວຢູ່ໂຮງໝໍ ທີ່ຖືກກຳນົດໄວ້ ມີທັງໝົດ 6 ຄົນ (ຈຳປາສັກ 2 ຄົນ, ນະຄອນຫຼວງ 3 ຄົນ ແລະ ສະຫວັນນະເຂດ 1​ ຄົນ) ຊຶ່ງທັງ 6 ຄົນ ແມ່ນແຂງແຮງດີ ບໍ່ມີອາການຫຍັງ.

ສປປ ລາວ ແມ່ນກວດພົບຜູ້ຕິດເຊື້ອໃໝ່ ຈຳນວນ 1​ ຄົນ ຊຶ່ງຜູ້ກ່ຽວແມ່ນມີປະຫວັດການເດີນທາງມາຈາກປະເທດເພື່ອນບ້ານ ທີ່ມີການລະບາດຂອງພະຍາດໂຄວິດ-19 ພາຍໃນປະເທດ; ຕໍ່ກັບສະ ພາບການດັ່ງກ່າວຂໍການຮ່ວມມືນຳພໍ່ແມ່, ພີ່ນ້ອງ, ປະຊາຊົນ ແລະ ທຸກພາກສ່ວນໃນສັງຄົມ ຮ່ວມແຮງຮ່ວມໃຈກັນ ຍົກສູງສະຕິຄວາມຮັບຜິດຊອບ ໃນການປະຕິບັດມາດຕະການທີ່ຄະນະສະເພາະກິດວາງອອກ ຢ່າງຖືກຕ້ອງ ແລະ ເຄັ່ງຄັດເພື່ອຮັບປະກັນບໍ່ໃຫ້ມີຄວາມສ່ຽງ ທີ່ຈະມີການນຳພະຍາດໂຄວິດ-19 ເຂົ້າມາແຜ່ລະບາດ ໃນປະເທດເຮົາຮອບໃໝ່ ແລະ ສະກັດກັ້ນການລະບາດບໍ່ໃຫ້ຂະຫຍາຍເປັນວົງກວ້າງ.

ສຳລັບຜູ້ທີ່ຈະເດີນທາງເຂົ້າມາ ສປປ ລາວ ແມ່ນປະຕິບັດຕາມຄຳແນະນຳຂອງຄະນະສະເພາະກິດ, ສະບັບເລກທີ 3087/ສພກ, ລົງວັນທີ 26 ກຸມພາ 2021 ແລະ ແຈ້ງການເລື່ອງການນຳໃຊ້ເຄື່ອງຕິດຕາມທາງການແພດ ແລະ ປະກັນໄພ COVID-19, ສະບັບເລກທີ 3018/ສພກ, ລົງວັນທີ 2 ມີນາ 2021 ພ້ອມດຽວກັນນັ້ນ ທຸກຄົນຕ້ອງໄດ້ຈຳກັດບໍລິເວນຈົນຄົບຕາມກຳນົດ 14 ວັນ ຈຶ່ງສາມາດອອກໄປເຄື່ອນໄຫວໃນສັງຄົມຕາມປົກກະຕິໄດ້; ໃຫ້ເອົາໃຈໃສ່ສືບຕໍ່ປະຕິບັດມາດຕະການປ້ອງກັນການຕິດເຊື້ອຢ່າງເປັນປະຈຳ ແລະ ໃຫ້ກາຍເປັນຄວາມຊິນເຄີຍ ເປັນຕົ້ນແມ່ນ​ການໃສ່ຜ້າອັດປາກ-ດັງ ໃນເວລາອອກໄປນອກບ້ານ, ລ້າງມືເລື້ອຍໆ ດ້ວຍນ້ຳສະອາດໃສ່ສະບູ ຫຼື ເຈວລ້າງມືຂ້າເຊື້ອ, ຮັກສາໄລຍະຫ່າງໃນສັງຄົມຢ່າງໜ້ອຍໄລຍະ 1 ແມັດຂຶ້ນໄປ, ຖ້າບໍ່ຈຳເປັນ ແມ່ນຫຼີກລ່ຽງການໄປຢູ່ໃນສະຖານທີ່ມີຄົນແອອັດຫຼາຍ.

Medialaos MMD (ແຫຼ່ງຂໍ້ມູນຈາກ: ໜັງສືພິມປະຊາຊົນ)