ສປປ ລາວ ໄດ້ຮັບວັກຊິນ ຈາກລັດຖະບານແຫ່ງ ສປ ຈີນ ເພີ່ມອີກ 1 ລ້ານໂດສຂປລ. ໃນວັນທີ 13 ຕຸລາ 2021 ຢູ່ສະໜາມບິນສາກົນວັດໄຕ ນະຄອນຫລວງວຽງຈັນ, ໄດ້ມີພິທີ ມອບ-ຮອບ ວັກຊິນປ້ອງກັນພະຍາດໂຄວິດ-19 ຈໍານວນ 1 ລ້ານໂດສ, ຕາງໜ້າມອບໂດຍ ສະຫາຍ ຈຽງ ຈ້າຍຕຸ່ງ ເອກອັກຄະລັດຖະທູດ ຜູ້ມີອຳນາດເຕັມ ແຫ່ງ ສປ ຈີນ ປະຈຳ ສປປ ລາວ ແລະ ຕາງໜ້າຮັບໂດຍ, ສະຫາຍ ກິແກ້ວ ໄຂຄຳພິທູນ ຮອງນາຍົກລັດຖະມົນຕີ ແຫ່ງ ສປປ ລາວ, ພ້ອມດ້ວຍພາກສ່ວນກ່ຽວຂ້ອງທັງສອງຝ່າຍ ເຂົ້າຮ່ວມ.

ສະຫາຍ ກິແກ້ວ ໄຂຄໍາພິທູນ ໄດ້ກ່າວໃນພິທີມອບ-ຮັບວັກຊິນໃນຄັ້ງນີ້ວ່າ: ມື້ນີ້ເປັນອີກມື້ໜຶ່ງ ທີ່ພັກ, ລັດຖະບານ ແລະ ປະຊາຊົນລາວບັນດາເຜົ່າ ທົ່ວປະເທດ ມີຄວາມເບີກບານມ່ວນຊື່ນ ແລະ ພາກພູມໃຈເປັນຢ່າງຍິ່ງ ທີ່ໄດ້ຮັບວັກຊິນປ້ອງກັນພະຍາດໂຄວິດ-19 ເພີ່ມຕື່ມຈໍານວນ 1 ລ້າຍໂດສ, ພ້ອມດ້ວຍເຂັມສັກຢາ ຈາກລັດຖະບານ ແຫ່ງ ສປ ຈີນ, ໂດຍມອບຜ່ານ ສະຫາຍ ຈຽງ ຈ້າຍຕຸ່ງ ເພື່ອນຳໃຊ້ເຂົ້າໃນການຕ້ານ ແລະ ສະກັດກັ້ນ ການແຜ່ລະບາດຂອງພະຍາດໂຄວິດ-19 ຢູ່ ສປປ ລາວ.

ພັກ, ລັດຖະບານ ແລະ ປະຊາຊົນລາວ ໄດ້ຕີລາຄາສູງ ແລະ ຂໍສະແດງຄວາມຂອບອົກຂອບໃຈຢ່າງຈິງໃຈ, ຮູ້ບຸນຄຸນຢ່າງລົ້ນເຫລືອ ຕໍ່ການຊ່ວຍເຫລືອອັນບໍລິສຸດ, ຈິງໃຈ, ລ້ຳຄ່າ, ທັນເວລາ ແລະ ສະ ເໝີຕົ້ນສະເໝີປາຍ ຂອງພັກ, ລັດ ແລະ ປະຊາຊົນຈີນ. ວັກຊິນ 1 ລ້ານໂດສໃນເທື່ອນີ້, ຈະສົມທົບກັບວັກຊິນ ທີ່ ສປ ຈີນ ຊ່ວຍເຫລືອຜ່ານມາ ຈຳນວນ 3.302.000 ໂດສ (ບໍ່ລວມທີ່ກະຊວງປ້ອງກັນປະເທດໄດ້ຮັບ 400.000 ໂດສ) ແລະ ຮ່ວມກັບການຊ່ວຍເຫລືອຂອງປະເທດຕ່າງໆ, ອົງການສາກົນອື່ນໆ ທີ່ຈະຊ່ວຍໃຫ້ ສປປ ລາວ ສາມາບັນລຸຄາດໝາຍການສັກວັກຊິນ ໃຫ້ກັບປະຊາຊາຊົນລາວທົ່ວປະເທດ ໃຫ້ໄດ້ 50% ຂຶ້ນໄປໃນປີ 2021 ນີ້, ເພື່ອຕ້ານ ແລະ ສະກັດກັ້ນການແຜ່ລະບາດຂອງພະຍາດໂຄວິດ-19.

#ແຫຼ່ງຂ່າວມາຈາກ: ຂປລ