ຕອນເຊົ້າວັນທີ 6 ເມສາ 2021 ທ່ານ ວົງສະຫວັນ ເທບພະຈັນ ຮອງເລຂາພັກແຂວງ ສະມາຊິກສະພາແຫ່ງຊາດ ຊຸດທີ IX ປະຈຳເຂດເລືອກຕັ້ງທີ 6 ແຂວງຫລວງພະບາງ ພ້ອມດ້ວຍສະມາຊິກສະພາແຫ່ງຊາດ ປະຈຳເຂດເລືອກຕັ້ງ ແລະ ສະມາຊິກສະພາປະຊາຊົນແຂວງຫລວງພະບາງ ຊຸດທີ II ໄດ້ເຂົ້າຂໍ່ານັບ ແລະ ວາງພວງມາລາ ຢູ່ອານຸສາວະລີນັກຮົບນິລະນາມ, ອານຸສາວະລີປະທານ ໄກສອນ ພົມວິຫານ ບ້ານພະບາດໃຕ້ ແລະ ອານຸສາວະລີ ປະທານສຸພານຸວົງ ບ້ານນາວຽງຄໍາ ນະຄອນຫຼວງພະບາງ ເພື່ອລະນຶກເຖີງບຸນຄຸນ ຄຸນງາມຄວາມດີ ຂອງບັນພະບູລຸດ ກໍຄື ນັກຮົບປະຕິວັດທີ່ໄດ້ອຸທິດເລືອດເນື້ອ, ເຫື່ອແຮງ ແລະ ສະຕິປັນຍາ ເຂົ້າໃນພາລະກິດປົດປ່ອຍຊາດ ເມື່ອກ່ອນ ແລະ ຈາກນັ້ນກໍໄດ້ນໍາພາປົກປັກຮັກສາ ແລະ ສ້າງສາພັດທະນາປະເທດຊາດ ໃນຍົກໃໝ່ໃຫ້ມີຄວາມຮຸ່ເຮືອງ ແລະ ສີວິໄລຈົນເຖິງປັດຈຸບັນ.


ຈາກນັ້ນຄະນະດັ່ງກ່າວ ກໍ່ໄດ້ເຂົ້າກາບໄຫວ້ອົງພະບາງ ພຣະມິ່ງບ້ານຂັວນເມືອງ ຂອງປວງຊົນລາວທັງຊາດ ກໍຄືຊາວຫລວງພະບາງ ທີ່ຫໍພິພິທະພັນແຫ່ງຊາດຫຼວງພະບາງ ແລະໄປຂາບໄຫວ ບູຊາພະພຸດທະຮູບ ຢູ່ວັດຊຽງທອງ ຕື່ມອີກ. ຈາກນັ້ນກໍໄດ້ເຂົ້າຮ່ວມກອງປະຊຸມກະກຽມດຳເນີນກອງປະຊຸມຄັ້ງປະຖົມມະລືກ ຂອງສະພາປະຊາຊົນແຂວງຫລວງພະບາງ ຊຸດທີ II ຈະໄດ້ຈັດຂື້ນຢ່າງເປັນທາງການ ໃນລະຫວ່າງ ວັນທີ 7-9 ເມສາ 2021 ນີ້.
ພາບ-ຂ່າວ: ເພັດສາຄອນ ສິມມະວົງ