ມີເດຍລາວແຂວງເຊກອງ (ຂ່າວ-ພາບ: ແກ້ວໄຊຍະວົງ) ໃນລະຫວ່າງວັນທີ 15-18 ມິຖຸນາຜ່ານມາ ສະມາຊິກສະພາແຫ່ງຊາດ (ສສຊ) ແລະສະມາຊິກສະພາປະຊາຊົນແຂວງເຊກອງ (ສສຂ) ນໍາໂດຍທ່ານ ນາງ ໄຮມະນີ ວົງໜໍ່ແກ້ວ ສສຊ, ປະທານຄະນະກໍາມະການວັດທະນະທໍາ-ສັງຄົມ ແລະບັນດາເຜົ່າ ສະພາປະຊາຊົນແຂວງເຊກອງພ້ອມດ້ວຍທ່ານ ອຸດົມສຸກ ບຸດສວນທຽນ ຮອງເລຂາພັກເມືອງ, ສສຂ ປະຈໍາເຂດເລືອກຕັ້ງເມືອງກະລຶມ ແລະຄະນະ ໄດ້ລົງພົບປະ ປະຊາຊົນຜູ້ມີສິດເລືອກຕັ້ງ ແລະເຜີຍແຜ່ຜົນສໍາເລັດກອງປະຊຸມຄັ້ງປະຖົມມະລຶກຂອງສະພາແຫ່ງຊາດຊຸດທີ IX ແລະສະພາປະຊາຊົນແຂວງເຊກອງຊຸດທີ II ຢູ່ເມືອງກະລຶມ ໂດຍລວມມີ 5 ຈຸດຄື: ເທສະບານເມືອງ, ບ້ານສອງຄອນ, ບ້ານໂລຍ, ບ້ານຫານອງ ແລະບ້ານກຸງຕາສີງ.

ໃນການລົງແຕ່ລະຈຸດ ບັນດາທ່ານ ສສຊ ແລະ ສສຂ ກໍໄດ້ຮັບຟັງການລາຍງານສະພາບລວມດ້ານດີ, ດ້ານອ່ອນ ແລະບາງບັນຫາທີ່ເປັນອຸປະສັກຕໍ່ການປະຕິບັດມະຕິກອງປະຊຸມໃຫຍ່ຄັ້ງທີ XI ຂອງພັກ, ມະຕິກອງປະຊຸມໃຫຍ່ຄັ້ງທີ X ຂອງອົງຄະນະພັກແຂວງ, ແຜນພັດທະນາເສດຖະກິດ-ສັງຄົມ 5 ປີຄັ້ງທີ IX ແລະແຜນພັດທະນາຊົນນະບົດ ຕິດພັນກັບການແກ້ໄຂຄວາມທຸກຍາກຂອງປະຊາຊົນ; ຈາກນັ້ນ ສສຊ ແລະ ສສຂ ກໍໄດ້ຜັດປ່ຽນກັນເຜີຍແຜ່ຜົນສໍາເລັດຂອງກອງປະຊຸມຄັ້ງປະຖົມມະລຶກຂອງສະພາແຫ່ງຊາດຊຸດທີ IX ແລະສະພາປະຊາຊົນແຂວງເຊກອງຊຸດທີ II ເພື່ອເຮັດໃຫ້ປະຊາຊົນໄດ້ຮັບຮູ້, ເຂົ້າໃຈ ແລະກໍາໄດ້ເນື້ອໃນຈິດໃຈການດໍາເນີນກອງປະຊຸມ, ການພິຈາລະນາ ແລະຕົກລົງຮັບຮອງບັນຫາສໍາຄັນຂອງຊາດ ແລະຂອງແຂວງ.

ພ້ອມນີ້ ກໍເພື່ອເຮັດໃຫ້ປະຊາຊົນໄດ້ຮັບຮູ້ເຖິງພາລະບົດບາດ, ສິດ ແລະໜ້າທີ່ຂອງສະພາແຫ່ງຊາດ, ສະມາຊິກສະພາແຫ່ງຊາດ ແລະສະພາປະຊາຊົນແຂວງ, ສະມາຊິກສະພາປະຊາຊົນຂັ້ນແຂວງທີ່ມີຕໍ່ປະຊາຊົນ, ພ້ອມທັງຮັບຟັງຄໍາຄິດເຫັນ ແລະຄໍາສະເໜີຂອງປະຊາຊົນ ຊຶ່ງເຫັນວ່າມີຂໍ້ຫຍຸ້ງຍາກຫຼາຍດ້ານທີ່ຈະຕ້ອງໄດ້ປັບປຸງແກ້ໄຂ ໂດຍສະເພາະບັນຫາດ້ານພື້ນຖານໂຄງລ່າງ, ບັນຫາດ້ານການສຶກສາ, ບັນຫາດ້ານສາທາລະນະສຸກ, ບັນຫາດ້ານກະສິກໍາ ແລະອື່ນໆ. ຫຼັງຈາກນັ້ນ ສສຊ ແລະ ສສຂ ກໍໄດ້ມີຄໍາເຫັນຊີ້ນໍາໃນການແກ້ໄຂບັນຫາເບື້ອງຕົ້ນ ແລະຮັບເອົາບັນດາຄໍາສະເໜີຂອງປະຊົນ ໄປນໍາສະເໜີຕໍ່ຂະແໜງການທີ່ກ່ຽວຂ້ອງ ເພື່ອຄົ້ນຄວ້າພິຈາລະນາຫາວິທີການແກ້ໄຂໃນຕໍ່ໜ້າ.

ໂອກາດລົງພົບປະຄັ້ງນີ້ ຄະນະ ສສຊ ແລະ ສສຂ ກໍໄດ້ມອບເຂົ້າສານໜຽວ ແລະເຄື່ອງອຸປະໂພກ-ບໍລິໂພກຈໍານວນໜຶ່ງໃຫ້ອົງການປົກຄອງບ້ານ ເພື່ອນໍາໄປແບ່ງປັນໃຫ້ຄອບຄົວປະຊາຊົນຜູ້ທຸກຍາກພາຍໃນບ້ານຂອງຕົນ.