ມີເດຍລາວແຂວງເຊກອງ ຂ່າວ:ພຸດທະສອນ ໃນລະຫວ່າງວັນທີ 15-21 ມິຖຸນາ ຜ່ານມາ ສະມາຊິກສະພາແຫ່ງຊາດ (ສສຊ) ແລະສະມາຊິກສະພາປະຊາຊົນແຂວງເຊກອງ (ສສຂ) ນໍາໂດຍທ່ານ ປອ ແພງສີ ສີລາວີ ກໍາມະການປະຈໍາພັກແຂວງ, ສະມາຊິກສະພາແຫ່ງຊາດ ປະຈໍາເຂດເລືອກຕັ້ງທີ16, ຮອງປະທານສະພາປະຊາຊົນ ແຂວງເຊກອງ ພ້ອມດ້ວຍ ສສຂ ປະຈໍາເຂດເລືອກຕັ້ງເມືອງລະມາມ ພ້ອມຄະນະຄະນະ ໄດ້ລົງພົບປະ ປະຊາຊົນຜູ້ມີສິດເລືອກຕັ້ງ ແລະເຜີຍແຜ່ຜົນສໍາເລັດກອງປະຊຸມຄັ້ງປະຖົມມະລຶກຂອງສະພາແຫ່ງຊາດຊຸດທີ IX ແລະສະພາປະຊາຊົນແຂວງເຊກອງຊຸດທີ II ຢູ່ເມືອງລະມາມ ເຊິ່ງລວມມີ 9 ຈຸດຄື: ສະໂມສອນເມືອງ, ສະໂມສອນພະແນກສຶກສາທິການ ແລະກິລາແຂວງ, ສະໂມສອນທະຫານແຂວງ, ສະໂມສອນສະພາປະຊາຊົນແຂວງ, ໂຮງຮຽນເຕັກນິກ-ວິຊາຊີບແບບປະສົມແຂວງ, ບ້ານດ່ານ, ບ້ານກະຊັງກາງ, ບ້ານໂພນ ແລະບ້ານຕະນຶມ; ໂດຍພະນັກງານຫຼັກແຫຼ່ງຂັ້ນແຂວງ-ຂັ້ນເມືອງ, ອໍານາດການປົກຄອງບ້ານ ແລະປະຊາຊົນ 10 ບ້ານ ເຂົ້າຮ່ວມ.

ການລົງເຄື່ອນໄຫວໃນຄັ້ງນີ້ ກໍເພື່ອເປັນການຜັນຂະຫຍາຍ ແລະໂຄສະນາເຜີຍແຜ່ບັນດາມະຕິຮັບຮອງໃນກອງປະຊຸມຄັ້ງປະຖົມມະລຶກ ຂອງ ສສຊ ຊຸດທີ IX (ລວມມີ 21 ສະບັບ) ແລະ ສສຂ ຊຸດທີ II (ມີ 10 ສະບັບ); ທັງນີ້ ເພື່ອແນໃສ່ເຮັດໃຫ້ບັນດາອົງການຈັດຕັ້ງພັກ-ລັດ, ແນວລາວສ້າງຊາດ, ອົງການຈັດຕັ້ງມະຫາຊົນທຸກຂັ້ນ, ພະນັກງານ-ລັດຖະກອນ, ນາຍ ແລະ ພົນທະຫານ, ນາຍ ແລະ ພົນຕຳຫລວດ ຕະຫລອດຮອດພໍ່ແມ່ປະຊາຊົນບັນດາເຜົ່າ ທົ່ວເມືອງ ລະມາມ ໄດ້ຮັບຮູ້ ແລະເຂົ້າໃຈຕໍ່ລະບົບກົງຈັກການຈັດຕັ້ງ, ພາລະບົດບາດ, ສິດ ແລະໜ້າທີ່ ຂອງ ສສຊ ແລະ ສສຂ ແຜນພັດທະນາເສດຖະກິດ-ສັງຄົມ 5 ປີຄັ້ງທີ IX ແລະແຜນພັດທະນາຊົນນະບົດ ຕິດພັນກັບການແກ້ໄຂຄວາມທຸກຍາກຂອງປະຊາຊົນ.

ໃນການລົງເຄື່ອນໄຫວໃນຄັ້ງນີ້ ນອກຈາກເຜີຍແຜ່ຜົນສໍາເລັດກອງປະຊຸມຄັ້ງປະຖົມມະລຶກຂອງສະພາ 2 ຂັ້ນແລ້ວ ກໍຍັງເປັນການລົງຮາກຖານ, ພົບປະ ປະຊາຊົນຜູ້ມີສິດເລືອກຕັ້ງ ແລະຮັບຟັງຄໍາຄິດເຫັນ ແລະຄໍາສະເໜີຂອງຂອງພະນັກງານຫຼັກແຫຼ່ງຂັ້ນແຂວງ-ຂັ້ນເມືອງ ກໍຄືອໍານາດການປົກຄອງບ້ານ ແລະປະຊາຊົນບັນດາເຜົ່າ ຊຶ່ງເຫັນວ່າມີຂໍ້ຫຍຸ້ງຍາກຫຼາຍດ້ານທີ່ຈະຕ້ອງໄດ້ປັບປຸງແກ້ໄຂ ໂດຍສະເພາະບັນຫາດ້ານພື້ນຖານໂຄງລ່າງ, ບັນຫາດ້ານການສຶກສາ, ບັນຫາດ້ານສາທາລະນະສຸກ, ບັນຫາດ້ານກະສິກໍາ, ບັນຫາໂກຕ້າລັດຖະກອນ, ບັນຫາການຄວບຄຸມການແຜ່ລະບາດຂອງພະຍາດໂຄວິດ-19 ແລະອື່ນໆ. ຫຼັງຈາກນັ້ນ ສສຊ ແລະ ສສຂ ກໍໄດ້ມີຄໍາເຫັນຊີ້ນໍາໃນການແກ້ໄຂບັນຫາເບື້ອງຕົ້ນ ແລະຮັບເອົາບັນດາຄໍາສະເໜີຂອງປະຊົນ ເພື່ອໄປນໍາສະເໜີຕໍ່ຂະແໜງການທີ່ກ່ຽວຂ້ອງ ເພື່ອຄົ້ນຄວ້າພິຈາລະນາຫາວິທີການແກ້ໄຂໃນຕໍ່ໜ້າໃຫ້ທ່ວງທັນ; ໂອກາດນີ້ ຄະນະ ສສຊ ແລະ ສສຂ ກໍໄດ້ມອບຜ້າອັດປາກ-ດັງ ຈໍານວນໜຶ່ງໃຫ້ໂຮງໝໍນ້ອຍຂອງບ້ານຕື່ມອີກ.