ມີເດຍລາວແຂວງເຊກອງ ຂ່າວ:ພຸດທະສອນ
ວັນທີ 17 ມິຖຸນາ ນີ້, ສະມາຊິກສະພາແຫ່ງຊາດ (ສສຊ) ຊຸດທີ IX ປະຈຳເຂດເລືອກຕັ້ງທີ 16 ແຂວງເຊກອງ ແລະສະມາຊິກສະພາປະຊາຊົນ ແຂວງ (ສສຂ) ຊຸດທີ II ປະຈຳໜ່ວຍເລືອກຕັ້ງເມືອງລະມາມ ນໍາໂດຍ ທ່ານ ປອ ແພງສີ ສີລາວີ ກຳມະການປະຈໍາພັກແຂວງ, ສະມາຊິກສະພາແຫ່ງຊາດ, ຮອງປະທານສະພາປະຊາຊົນແຂວງ ພ້ອມດ້ວຍຄະນະສະມາຊິກສະພາປະຊາຊົນແຂວງ ປະຈໍາໜ່ວຍເລືອກຕັ້ງ ເມືອງລະມາມ ໄດ້ສືບຕໍ່ເຜີຍແຜ່ຜົນສຳເລັດກອງປະຊຸມຄັ້ງປະຖົມມະລຶກຂອງສະພາແຫ່ງຊາດ ແລະ ສະພາປະຊາຊົນແຂວງ ຢູ່ສະໂມສອນກອງບັນຊາການທະຫານແຂວງ ໂດຍມີ ທ່ານ ພົນຈັດຕະວາ ສົມທອງ ດອນກັນນ້ອຍ ເລຂາຄະນະພັກ, ຫົວໜ້າການເມືອງ ກອງບັນຊາການປ້ອງກັນຊາດ (ປກຊ) ແຂວງ ພ້ອມດ້ວຍຄະນະພັກ-ຄະນະບັນຊາ, ພະນັກງານຫຼັກແຫຼ່ງພາຍໃນກ້ອນກຳລັງ ປກຊ ແຂວງເຂົ້າຮ່ວມ 100 ກວ່າຄົນ.

ການລົງເຄື່ອນໄຫວໃນຄັ້ງນີ້ ບັນດາທ່ານ ສສຊ ແລະ ສສຂ ກໍໄດ້ຜັດປ່ຽນກັນຜັນຂະຫຍາຍ ເຜີຍແຜ່ຜົນສຳເລັດ ກອງປະຊຸມຄັ້ງປະຖົມມະລຶກຂອງສະພາແຫ່ງຊາດ ຊຸດທີ IX ແລະ ສະພາປະຊາຊົນແຂວງ ຊຸດທີ II ທີ່ໄດ້ສຳເລັດລົງໃນຕົ້ນເດືອນ ເມສາ 2021 ຜ່ານມາ ປະກອບມີ: ເອກະສານກົງຈັກ ແລະ ບຸກຄະລາກອນ ຂອງສະພາແຫ່ງຊາດ; ກົງຈັກ ແລະບຸກຄະລາກອນ ຂອງອົງການປົກຄອງແຂວງ; ແຜນພັດທະນາເສດຖະກິດ-ສັງຄົມແຫ່ງຊາດ 5 ປີ; ແຜນງົບປະມານແຫ່ງລັດ 5 ປີ; ແຜນການສ້າງ ແລະປັບປຸງກົດຫມາຍ 5 ປີ ຂອງສະພາແຫ່ງຊາດ, ແຜນການເຄື່ອນໄຫວ 5 ປີ ຂອງອົງການໄອຍະການປະຊາຊົນສູງສຸດ ແລະສານປະຊາຊົນສູງສຸດ, ແຜນດໍາເນີນງານ 5 ປີ ຂອງສະພາແຫ່ງຊາດ; ແຜນດໍດາເນີນງານ 5 ປີຂອງສະພາປະຊາຊົນແຂວງ, ແຜນພັດທະນາເສດຖະກິດ-ສັງຄົມ 5 ປີຂອງແຂວງ ແລະ ແຜນງົບປະມານແຫ່ງລັດ 5 ປີ ຂອງແຂວງ.

ຈາກນັ້ນ, ໃນຕອນບ່າຍຂອງວັນດຽວກັນນີ້ ຄະນະດັ່ງກ່າວ ກໍ່ໄດ້ສືບຕໍ່ລົງເຜີຍແຜ່ຜົນສຳເລັດກອງປະຊຸມຄັ້ງປະຖົມມະລຶກຂອງ ສພຊ ແລະ ສພຂ ຢູ່ສະໂມສອນສະພາປະຊາຊົນແຂວງໃຫ້ແກ່ ພະນັກງານການນໍາ, ພະນັກງານຫຼັກແຫຼ່ງ ໃນຂົງເຂດວຽກງານປົກປ້ອງກົດໝາຍ ແລະ ອົງການຈັດຕັ້ງມະຫາຊົນ ຂັ້ນແຂວງຕື່ມອີກ.

ການລົງເຜີຍແຜ່ຜົນສໍາເລັດກອງປະຊຸມໃນຄັ້ງນີ້ ຍັງຖືເປັນການຫັນລົງຮາກຖານການເມືອງ ເພື່ອຮັບເອົາຄຳສະເໜີຈາກຄະນະພັກ, ຄະນະນໍາຂົງເຂດ ປກຊ ແລະ ຂົງເຂດປົກປ້ອງກົດໝາຍ ທີ່ສະເໜີຕໍ່ຄະນະ ສສຊ-ສສຂ ເພື່ອຂໍທິດຊີ້ນໍາ ແລະແກ້ໄຂຊ່ວຍເປັນຕົ້ນ ແມ່ນສະເຫນີໃຫ້ຊ່ວຍຊຸກຍູ້ບໍລິຫານລັດ, ອຳນາດການປົກຄອງຂັ້ນແຂວງ ກໍຄືພາກສ່ວນທີ່ກ່ຽວຂ້ອງອໍານວຍຄວາມສະດວກໃນສະໜອງງົບປະມານໃນການປັບປຸງພື້ນຖານໂຄງລ່າງ,

ຊຸກຍູ້ຜັກດັນໃຫ້ພາກສ່ວນທີ່ກ່ຽວຂ້ອງ ໃນການໃຊ້ມາດຕະການຕໍ່ກຸ່ມຜູ້ກະທໍາຜິດທີ່ລະເມີດຕໍ່ລະບຽບກົດໝາຍໃຫ້ເຂັ້ມງວດ ໂດຍສະເພາະຕໍ່ຄົນຕ່າງປະເທດທີ່ເຮັດວຽກຢູ່ ສປປ ລາວ ທີ່ລັກລອບເອົາຄົນຕ່າງປະເທດເຂົ້າມາແບບຜິດກົດໝາຍ, ຜິດຕໍ່ມາດຕະການຄວບຄຸມໂຄວິດ-19, ຜິດຕໍ່ກົດໝາຍບ້ານເມືອງ ແລະ ບັນຫາການລັກລອບຕັດໄມ້ທໍາລາຍປ່າ; ສໍາລັບຂົງເຂດປົກປ້ອງກົດໝາຍ ໄດ້ສະເໜີໃຫ້ມີມະຕິຮັບຮອງ ກ່ຽວກັບປະຕິບັດຂອງອົງການໄອຍະການໃນການສັ່ງຟ້ອງມາຫາສານ ໃນການຕັດສິນບັນດາຄະດີແພ່ງ ຄວນເປັນການຕັດສິນຂອງສານ ເພື່ອສະດວກໃນການປະຕິບັດວຽກງານການຕັດສິນຄະດີ ແລະອື່ນໆ.