ມີເດຍລາວແຂວງຫຼວງນ້ຳທາ ຂ່າວ: ສົມພອນ ຂຸນດາວົງ ໃນລະຫວ່າງວັນທີ 22 – 23 ມີຖຸນາ ປີ 2021 ນີ້, ຄະນະນໍາຂອງເມືອງລອງ ແຂວງຫຼວງນໍ້າທາ ນໍາໂດຍທ່ານ ເພັດສະຫວັນ ຈິດດາລາ ຮອງເລຂາພັກເມືອງ ຜູ້ຊີ້ນໍາວຽກງານການເມືອງແນວຄິດ ແລະ ພັກ-ພະນັກງານ, ພ້ອມດ້ວຍທີມງານ ໄດ້ເຊື່ອມຊື່ມມະຕິ ກອງປະຊຸມໃຫຍ່ຄັ້ງທີ XI ຂອງພັກ, ຢູ່ທີ່ກຸ່ມບ້ານຈ່າໃໝ່ ແລະ ກຸ່ມບ້ານຜາງົວ, ໂດຍມີກໍາມະການພັກເມືອງ, ເລຂາຄະນະພັກຮາກຖານກຸ່ມບ້ານ, ມີພາກສ່ວນທີ່ກ່ຽວຂ້ອງຂອງເມືອງ, ນາຍບ້ານ ແລະ ປະຊາຊົນທັງສອງກຸ່ມບ້ານເຂົ້າຮ່ວມ.

ທ່ານ ເພັດສະຫວັນ ຈິດດາລາ ຮອງເລຂາພັກເມືອງ ຜູ້ຊີ້ນໍາວຽກງານການເມືອງແນວຄິດ ແລະ ພັກ-ພະນັກງານ ກໍ່ໄດ້ຜ່ານເອກະສານມະຕິກອງປະຊຸມໃຫຍ່ຄັ້ງທີ XI ຂອງພັກ ໂດຍຍົກໃຫ້ເຫັນເຖີງສະພາບອັນພົ້ນເດັ່ນໃນການຈັດຕັ້ງປະຕິບັດວຽກງານຂອງແຕ່ລະຂົງເຂດວຽກງານ; ໂດຍສະເພາະແມ່ນສາມາດຮັບປະກັນໃຫ້ປະເທດຊາດ ມີສະຖຽນລະພາບທາງດ້ານການເມືອງຢ່າງໜັກແໜ້ນ, ມີຄວາມເປັນເອກະພາບ, ອໍານາດອະທິປະໄຕ, ຜືນແຜ່ນດີນອັນຄົບຖ້ວນ ແລະ ໝາກຜົນຂອງການປະຕິວັດ ໄດ້ຮັບການປົກປ້ອງຢ່າງເຂັ້ມແຂງ, ສັງຄົມມີຄວາມສະຫງົບຮອບດ້ານ, ເສດຖະກີດໄດ້ຮັບການຂະຫຍາຍຕົວ ໂດຍສະເລ່ຍ 5,8 %, ລາຍຮັບສະເລ່ຍຕໍ່ຫົວຄົນບັນລຸ 2.664 ໂດລາສະຫະລັດຕໍ່ຄົນຕໍ່ປີ, ບັນດາອົງການອໍານາດລັດ ລ້ວນແລ້ວແຕ່ໄດ້ຮັບການປັບປຸງທາງດ້ານການຈັດຕັ້ງ, ຍົກສູງຄຸນນະພາບການເຄື່ອນໄຫວ ໃຫ້ສອດຄ່ອງກັບເປົ້າໝາຍຂອງການສ້າງລັດປະຊາທິປະໄຕປະຊາຊົນ ເປັນລັດທີ່ປົກຄອງດ້ວຍກົດໝາຍ; ລວມທັງການສ້າງປະຖົມປັດໃຈ ໃຫ້ແກ່ການກ້າວຂື້ນສັງຄົມນິຍົມຕາມແນວທາງປ່ຽນແປງ

ໃໝ່ ທີ່ພັກວາງອອກ; ຈາກນັ້ນ, ທ່ານ ສົມໝາຍ ວົງພະຈັນ ຮອງຫົວໜ້າຄະນະໂຄສະນາອົບຮົມເມືອງ ກໍ່ໄດ້ຜ່ານເອກະສານແຜນພັດທະນາເສດຖະກີດ – ສັງຄົມແຫ່ງຊາດ 5 ປີ ຄັ້ງທີ 9 ແລະ ແຜນງົບປະມານແຫ່ງລັດ 5 ປີ ແຕ່ນີ້ ຮອດປີ 2025 ໄດ້ກໍານົດ 6 ເປົ້າໝາຍໃຫຍ່, 25 ແຜນວຽກຈຸດສຸມ ແລະ ໂຄງການບູລິມະສີດຕົ້ນຕໍ່ຈໍານວນໜື່ງ, ສູ້ຊົນເຮັດໃຫ້ເສດຖະກີດຂະຫຍາຍຕົວ ສະເລ່ຍຕໍ່ປີ ໃນລະດັບ 4 ສ່ວນຮ້ອຍຂື້ນໄປ, ລວມຍອດຜະລີດຕະພັນພາຍໃນ ຫຼື GDP ຕໍ່ຫົວຄົນໃຫ້ບັນລຸ 2.880 ໂດລາສະຫະລັດ, ລາຍຮັບແຫ່ງຊາດ ຫຼື GNI ຕໍ່ຫົວຄົນໃຫ້ບັນລຸ 2.280 ໂດລາສະຫະລັດ ໃນປີ 2025.

ທັງນີ້ກໍ່ເພື່ອເຮັດໃຫ້ບັນດາພະນັກງານນໍາພາຄຸ້ມຄອງ, ພະນັກງານຫຼັກແຫຼ່ງ ແລະ ພໍ່ແມ່ປະຊາຊົນ ໄດ້ເຊື່ອມຊືມກໍາແໜ້ນຕໍ່ຜົນສໍາເລັດແຫ່ງການສ້າງສາພັດທະນາປະເທດຊາດ ແລະ ພ້ອມກັນນໍາເອົາທີດທາງແຜນພັດທະນາເສດຖະກີດ-ສັງຄົມ 5 ປີ ຄັ້ງທີ 9 ແລະ ແຜນງົບປະມານແຫ່ງລັດ 5 ປີ ແຕ່ນີ້ຮອດປີ 2025 ໄປຈັດຕັ້ງຜັນຂະຫຍາຍ ໃຫ້ສໍາເລັດຕາມລະດັບຄາດໝາຍ.