ມີເດຍລາວແຂວງວຽງຈັນ ຂ່າວ: ບຸນມາ ແກ້ວບຸດດາ. ໃນວັນທີ 29 ມີນາ 2021 ນີ້, ຢູ່ທີ່ຫ້ອງປະຊຸມຊັ້ນ 2 ຫ້ອງວ່າການແຂວງວຽງຈັນ, ສະພາທິດສະດີສູນກາງພັກໄດ້ລົງເກັບກໍາຂໍ້ມູນ ແລະ ຈັດຕັ້ງກອງປະຊຸມລະດົມຄວາມຄິດຢູ່ແຂວງວຽງຈັນ ເພື່ອປະກອບໃສ່ໂຄງ ການຄົ້ນຄວ້າລະດັບຊາດພາຍໃຕ້ຫົວຂໍ້ “ການສ້າງເສດຖະກິດຕະຫຼາດຕາມທິດສັງຄົມນິຍົມຢູ່ ສ ປປ ລາວ” ສະບັບເລກທີ 89/ສທພ, ລົງວັນທີ 14 ທັນວາ 2020. ເຊິ່ງນຳໂດຍທ່ານ ປອ ນາງ ໄກສອນ ຈັນສີນາ ຫົວໜ້າກົມຄຸ້ມຄອງການຮຽນ-ການສອນ ສະຖາບັນການເມືອງ ແລະ ການປົກຄອງແຫ່ງຊາດ, ພ້ອມດ້ວຍທີມງານ, ໃຫ້ກຽດຕ້ອນຮັບຄັ້ງນີ້ໂດຍ ທ່ານ ປອ ສີວຽງໄຊ ອໍລະບູນ ກຳມະການພັກແຂວງ, ຫົວໜ້າຫ້ອງວ່າການແຂວງວຽງຈັນ, ພ້ອມດ້ວຍຫົວໜ້າພະແນກ, ຮອງຫົວໜ້າພະແນກການ ແລະ ພາກສ່ວນທີ່ກ່ຽວຂ້ອງເຂົ້າຮ່ວມ.

ທ່ານ ປອ ນາງ ໄກສອນ ຈັນສີນາ ຫົວໜ້າກົມຄຸ້ມຄອງການຮຽນ-ການສອນ ສະຖາບັນການເມືອງ ແລະ ການປົກຄອງແຫ່ງຊາດກ່າວວ່າ: ຈຸດປະສົງຂອງການມາຄັ້ງນີ້ເພື່ອເປັນການເກັບກໍາຂໍ້ມູນ ແລະ ຖອດຖອນບົດຮຽນການຈັດຕັ້ງປະຕິບັດຕົວຈິງຂອງຂະແຫນງການເສດຖະກິດຢູ່ແຂວງວຽງຈັນ ເພື່ອນໍາເອົາຂໍ້ມູນ ແລະ ບົດຮຽນດັ່ງກ່າວ ປະກອບເຂົ້າໃນບົດຄົ້ນຄວ້າວິທະຍາສາດ ໃຫ້ມີຄວາມອຸດົມສົມບູນ ແລະ ມີວິທະຍາ ສາດຍິ່ງຂຶ້ນ.ການເຮັດວຽກຄັ້ງນີ້ປະກອບມີ: ຫ້ອງວ່າການແຂວງ, ບັນດາພະແນກການຕ່າງໆ ໂດຍສະເພາະແມ່ນ ພະແນກອຸດສາຫະກໍາ ແລະ ການຄ້າ, ພະແນກກະສິກໍາ ແລະ ປ່າໄມ້, ພະແນກຖະແຫລງຂ່າວ,ວັດທະນະທໍາ ແລະ ທ່ອງທ່ຽວ, ພະແນກແຜນການ ແລະ ການລົງທຶນຂອງແຂວງ.
ທ່ານ ປອ ສີວຽງໄຊ ອໍລະບູນ ກຳມະການພັກແຂວງ, ຫົວໜ້າຫ້ອງວ່າການປົກຄອງແຂວງ ໄດ້ລາຍງານຫຍໍ້ສະພາບລວມຂອງແຂວງວຽງຈັນ ແລະ ຍົກໃຫ້ເຫັນການປະຕິບັດແຜນພັດທະນາເສດຖະກິດ-ສັງຄົມ ໃນ 5 ປີ (2016-2020) ຂອງແຂວງ ສາມາດເຮັດໃຫ້ເສດຖະກິດສືບຕໍ່ຂະຫຍາຍຕົວຕໍ່ເນື່ອງ ສະເລ່ຍ 7,3% ຕໍ່ປີ; ສຳລັບ ປີ 2020 ບັນລຸໄດ້ພຽງ 4,3% ລວມຍອດຜະລິດຕະພັນພາຍໃນບັນລຸໄດ້ 8.261 ຕື້ກວ່າກີບ, ສະ ເລ່ຍໃສ່ຫົວຄົນໄດ້ 17,64 ລ້ານກວ່າກີບ, ຫຼືເທົ່າກັບ 1.959 ໂດລາສະຫະລັດ. ການປ່ຽນແປງໂຄງປະກອບເສດຖະກິດ 5 ປີຜ່ານມາ, ຂະແໜງກະສິກຳ ຂະຫຍາຍຕົວ 3,7% ກວມ 34,1% ຂອງ GDP ທຽບໃສ່ປີ 2016 ຫຼຸດລົງ 3,33%; ຂະແໜງອຸດສາຫະກຳ 11,2% ກວມເອົາ 33% ຂອງ GDP ທຽບໃສ່ປີ 2016 ເພີ່ມຂຶ້ນ 2,72% ແລະ ຂະແໜງບໍລິການ 9,2% ກວມ 32,9% ຂອງ GDP ທຽບໃສ່ປີ 2016 ເພີ່ມຂຶ້ນ 2,47%.


ໂອກາດນີ້ບັນດາຜູ້ທີ່ເຂົ້າຮ່ວມຍັງໄດ້ພ້ອມກັນປະກອບຄຳຄິດຄຳເຫັນໃສ່ບັນດາຫົວຂໍ້ທີ່ສະພາທິດສະດີສູນກາງພັກຕັ້ງຂຶ້ນເປັນຕົ້ນ: ຕີລາຄາສະພາບຄວາມເປັນຈິງຂອງການສ້າງ ແລະ ພັດທະນາເສດຖະກິດຕະ ຫຼາດຕາມທິດສັງຄົມນິຍົມຢູ່ລາວ; ປະເມີນການເຊື່ອມເສດຖະກິດກັບພາກພື້ນ ແລະ ສາກົນຂອງ ສປປລາວ; ບັນດາຕົວແບບເສດຖະກິດຕະຫຼາດໃນໂລກ ແລະ ບົດບາດຂອງການຄຸ້ມຄອງ; ການພັດທະນາຕະຫຼາດປະ ເພດຕ່າງໆ ຢູ່ ສປປ ລາວ ໃນໄລຍະຜ່ານມາ ແລະ ການບູລະນະລະບອບລະບຽບການກ່ຽວກັບການສ້າງເສດ ຖະກິດຕະຫຼາດຕາມທິດສັງຄົມນິຍົມ ເຊິ່ງບັນດາຜູ້ເຂົ້າຮ່ວມໄດ້ພ້ອມກັນປະກອບຄຳຄິດຄຳເຫັນໃຫ້ຫົວຂໍ້ດັ່ງ ກ່າວຢ່າງມີວິທະຍາສາດ ເພື່ອເຮັດໃຫ້ເນື້ອໃນຂອງຫົວຂໍ້ດັ່ງກ່າວມີຄວາມຄົບຖ້ວນສົມບູນຂຶ້ນ.