ມີເດຍແຂວງສາລະວັນ ໂດຍ: ກິນດາວັນ ອ້ວນນາຄູ ສະພາປະຊາຊົນແຂວງສາລະວັນ ໄດ້ເຂົ້າຮ່ວມກອງປະຊຸມທາງໄກກັບຄະນະປະຈໍາສະພາແຫ່ງຊາດ ແລະ ກໍາມະທິການປະຊາຊົນຂັ້ນແຂວງທົວປະເທດ ເພື່ອປຶກສາຫາລືກ່ຽວກັບການຈັດຕັ້ງປະຕິບັດ ຄໍາສັ່ງ ເລກທີ 15/ນຍ ວ່າດ້ວຍມາດຕະການສະກັດກັ້ນຄວບຄຸມ ແລະ ກຽມຄວາມພ້ອມຮອບດ້ານເພື່ອຕ້ານພະຍາດໂຄວິດ-19 ຕິດພັນກັບການ ຈັດຕັ້ງປະຕິບັດນະໂຍບາຍດ້ານຕ່າງໆຂອງຂະແໜງການກ່ຽວຂ້ອງກໍານົດອອກ ໄດ້ຈັດຂຶ້ນໃນວັນທີ 9 ມິຖຸນາ 2021 ຢູ່ທີ່ຫໍປະຊຸມແຫ່ງຊາດ ໂດຍການເປັນປະທານຂອງທ່ານ ສົມມາດ ພົນເສນາ ຮອງປະທານຄະນະປະຈໍາສະພາແຫ່ງຊາດ, ຜູ້ຊີ້ນໍາວຽກງານເສດຖະກິດ, ແຜນການ ແລະ ການເງິນ, ມີບັນດາທ່ານຄະນະປະຈໍາສະພາແຫງຊາດ, ປະທານກໍາມະທິການວຽກງານ ສສຊ, ຄະນະປະຈໍາະພາທົ່ວປະເທດ, ສໍາລັບແຂວງສາລະວັນເຂົ້າຮ່ວມມີທ່ານ ສີເຮັງ ຫອມສົມບັດ ຮອງເລຂາພັກແຂວງ, ປະທານສະພາປະຊາຊົນແຂວງສາລະວັນ, ທ່ານຄະນະປະຈໍາສພຂ, ຄະນະກໍາມະການ, ຄະນະເສນາທິການເຂົ້າຮ່ວມ.

ກອງປະຊຸມຄັ້ງນີ້ຜູ້ເຂົ້າຮ່ວມໄດ້ຮັບຟັງການລາຍງານສະພາບລວມໂດຍຫຍໍ້ກ່ຽວກັບການຈັດຕັ້ງປະຕິບັດຄໍາສັ່ງເລກທີ 15/ນຍ, ມາດຕະການສະກັດກັ້ນຄວບຄຸມ ແລະ ກຽມຄວາມພ້ອມຮອບດ້ານເພື່ອຕ້ານພະຍາດໂຄວິດ-19 ໃນທົ່ວປະເທດ ສໍາລັບ ສປປ ລາວ ປະຈຸບັນການແຜ່ລະບາດຂອງພະຍາດໂຄວິດ-19ໄດ້ມີທ່າອ່ຽງຫລຸດລົງ ເຊິ່ງລວມຍອດຕິດເຊື້ອສະສົມ 1,971 ກໍລະນີ (ໃໝ່ 1), ເສຍຊີວິດ 3 ກໍລະນີ (ໃໝ່ 0), ປິ່ນປົວຫາຍດີສະສົມ 1,795 ກໍລະນີ , ກໍາລັງປິ່ນປົວ 173 ກໍລະນີ, ວັນທີ 8 ມິຖຸນາ 2021 ໄດ້ເກັບຕົວຢ່າງມາກວດວິເຄາະທັງໝົດ 1,401 ຕົວຢ່າງ ກວດພົບຜູ້ຕິດເຊື້ອທັງໝົດ 01 ກໍລະນີ, ທັງໝົດແມ່ນຈາກນະຄອນຫຼວງວຽງຈັນ ແລະ ແມ່ນກໍລະນີຕິດເຊື້ອໃນຊຸມຊົນ ຕິດເຊື້ອຈາກການສຳຜັດໃກ້ຊິດກັບຜູ້ຕິດເຊື້ອເກົ່າ, ເຝົ້າລະວັງ ແລະ ກັ່ນກອງຢ່າງເຄັ່ງຄັດບຸກຄົນທີ່ໄດ້ຮັບອະນຸຍາດຈາກຄະນະສະເພາະກິດ ທີ່ມີຄວາມຈຳເປັນເດີນທາງເຂົ້າ-ອອກ ສປປ ລາວ ໃນໄລຍະນີ້ ແລະ ໄດ້ນຳໄປກວດຫາເຊື້ອ ແລະ ເຂົ້າຈຳກັດບໍລິເວນຕົນເອງຈົນຄົບ 14 ວັນ, ສໍາລັບແຂວງສາລະວັນໃນໄລຍະຜ່ານມາມີຜູ້ຕິດເຊື້ອພະຍາດໂຄວິດ-19 ທັງໝົດ 13 ຄົນ, ຍິງ 6 ຄົນ, ມາຮອດປະຈຸບັນປິ່ນປົວຫາຍດີໝົດແລ້ວ.

ຈາກນັ້ນທາງຄະນະປະທານກໍ່ໄດ້ມີຄໍາຖາມເຈາະຈີ້ມ ບັນຫາຜົນກະທົບໂດຍກົງທາງດ້ານເສດຖະກິດຂອງແຕ່ລະແຂວງເປັນຕົ້ນ ການບໍລິການດ້ານການທ່ອງທ່ຽວ, ຜົນກະທົບທາງດ້ານສັງຄົມ, ແຮງງານ, ດ້ານສາທາລະນະສຸກ ແລະ ການສຶກສາ, ພ້ອມທັງໄດ້ຮ່ວມກັນປະກອບຄໍາຄິດ-ຄໍາເຫັນ, ປຶກສາຫາລື ເພື່ອວາງແຜນຕອບໂຕ້ ກັບພະຍາດໂຄວິດ-19 ຢູ່ພາຍໃນປະເທດ, ກໍ່ຄືບັນດາແຂວງຕ່າງໆໃຫ້ໄດ້ຮັບຜົນສູງ, ມີຄວາມສະຫງົບ, ການດໍາລົງຊີວິດຂອງປະຊາຊົນກັບຄືນສູ່ສະພາບເດີມໂດຍໄວ, ພ້ອມທັງໃຫ້ບັນດາແຂວງໄດ້ຜັດປ່ຽນກັນລາຍງານສະພາບໃນການຈັດຕັ້ງປະຕິບັດປະຕິບັດຄໍາສັ່ງເລກທີ 15/ນຍ, ມາດຕະການສະກັດກັ້ນຄວບຄຸມ ແລະ ກຽມຄວາມພ້ອມຮອບດ້ານເພື່ອຕ້ານພະຍາດໂຄວິດ-19 ເພື່ອຈະນໍໍາເອົາຜົນຂອງກອງປະຊຸມດັ່ງກ່າວເປັນບ່ອນອີງໃນການລາຍງານໃຫ້ປະທານຄະນະປະຈໍາສະພາແຫ່ງຊາດພິຈາລະນາ.