ວັນທີ່ 29 ມິຖຸນາ 2021 ນີ້ ທ່ານ ວົງສະຫວັນ ເທບພະຈັນ ຮອງເລຂາພັກແຂວງ ປະທານສະພາປະຊາຊົນແຂວງຫລວງພະບາງກໍ່ໄດ້ນໍາເຄື່ອງອາຫານແຫ້ງໄປມອບໃຫ້ຄະນະສະເພາະກິດເມືອງປາກອູ. ຢູ່ທີ່ໜ້າຫ້ອງວ່າການປົກຄອງເມືອງປາກອູ,ໃຫ້ກຽດເຂົ້າຮ່ວມ ມອບ-ຮັບ ເຄື່ອງໂດຍ ທ່ານ ປທ ແກ່ນຄໍາ ຄໍາພັນ ກໍາມະການພັກແຂວງ ເລຂາພັກເມືອງ ເຈົ້າເມືອງປາກອູ, ທ່ານ ຫຸມແພງ ວິລະໄຊ ຮອງເຈົ້າເມືອງປາກອູ ຫົວໜ້າຄະນະສະເພາະກິດຂັ້ນເມືອງ

ພ້ອມດ້ວຍຄະນະສະເພາະກິດການຕ້ານ, ຄວບຄຸມ, ປ້ອງກັນການລະບາດຂອງພະຍາດອັກເສບປອດສາຍພັນໃໝ່ (ໂຄວິດ-19) ຂັ້ນເມືອງເຂົ້າຮ່ວມ. ເຄື່ອງທີ່ນໍາມາມອບໃນຄັ້ງນີ້ ມີ ຢາຊາລາ 3,000 ເມັດ, ມູນຄ່າ 1,500.000 ກີບ, ຢາແກ້ໄອເດັກນ້ອຍ 12 ແກ້ວ, ມູນຄ່າ 250.000 ກີບ,ໝີ່ໄວໆ 2 ແກັດ, ມູນຄ່າ 620,000 ກີບ, ແລະ ຜ້າປິດປາກ 1 ແກັດ, ມູນຄ່າ 1,000.000ກີບ, ລວມມູນຄ່າເຄື່ອງ ທີ່ນໍາມາມອບທັງໝົດ 3,370.000 ກີບ. ເຄື່ອງທີ່ໄດ້ມາຄັ້ງນີ້ທາງຄະນະສະເພາະກິດຕ້ານ,ຄວບຄຸມ ປ້ອງກັນການລະບາດພະຍາດອັກເສບປອດສາຍພັນໃໝ່( ໂຄວິດ19 ) ຂັ້ນເມືອງກໍ່ຈະນໍາໄປແຈກຢາຍໃຫ້ບັນດາຜູ້ທີ່ມີການສົງໄສ ແລະ ຖືກກັກຕົວໃນໄລຍະ14 ວັນ ຢູ່ທີ່ສູນກັກຕົວ ເມືອງປາກອູ.