ມີເດຍລາວແຂວງເຊກອງ ຂ່າວ- ພາບ: ສະຫຍາມ ຈັນທະສອນ
ໂອກາດລົງຕິດຕາມຊຸກຍູ້ມາດຕະການປ້ອງກັນ,ຄວບຄຸມພະຍາດໂຄວິດ 19 ຢູ່ເມືອງທ່າແຕງໃນວັນທີ 13 ພຶດສະພາ 2021. ທ່ານ ດົງເພັດ ພະຍົນ ປະທານສະພາປະຊາຊົນແຂວງເຊກອງໄດ້ເນັ້ນໜັກໃຫ້ການນໍາເມືອງທ່າແຕງ ກໍຄື ຄະນະສະເພາະກິດປ້ອງກັນ,ຄວບຄຸມພະຍາດໂຄວິດ 19 ຂັ້ນເມືອງສືບຕໍ່ເອົາໃຈໃສ່ຕ້ານ ແລະ ສະກັດກັ້ນພະຍາດໂຄວິດ 19 ຢ່າງເຂັ້ມງວດ ໂດຍໃຫ້ຖືສໍາຄັນຄໍາສັ່ງແນະນໍາ ເລກທີ 26 ຂອງເຈົ້າແຂວງ ວ່າດ້ວຍການສືບຕໍ່ເພີ່ມທະວີສະກັດກັ້ນ,ປ້ອງກັນ,ຄວບຄຸມ ແລະ ຕ້ານພະຍາດໂຄວິດ 19 ໃນທົ່ວແຂວງເຊກອງ.

ເພື່ອສືບຕໍ່ປະຕິບັດມາດຕະການປ້ອງກັນ ແລະ ຄວບຄຸມພະຍາດໂຄວິດ 19 ໃນໄລຍະວັນທີ 6 – 20 ພຶດສະພາ ນີ້ ກ່ອນອື່ນ ປະທານ ສະພາປະຊາຊົນແຂວງເຊກອງໄດ້ຊັກຖາມ ແລະ ເຈາະຈີ້ມຫຼາຍປະເດັນໃນການປ້ອງກັນ ແລະ ຄວບຄຸມພະຍາດໂຄວິດ 19 ໃນໄລຍະຜ່ານມາໂດຍເຫັນວ່າເມືອງທ່າແຕງໄດ້ເອົາໃຈໃສ່ຕໍ່ມາດຕະການປ້ອງກັນຢ່າງຕໍ່ເນື່ອງ ແຕ່ເຖິງຢ່າງໃດກໍດີ ປະທານ ສະພາປະຊາຊົນແຂວງເຊກອງຍັງໄດ້ສະແດງຄວາມເປັນຫ່ວງຕໍ່ປະຊາຊົນໃນຂະນະທີ່ພະຍາດໂຄວິດ 19 ໃນທົ່ວໂລກຍັງມີການລະບາດເພີ່ມຂຶ້ນໃນແຕ່ລະວັນເວົ້າລວມ,ເວົ້າສະເພາະກໍຄືໃນທົ່ວປະເທດ ຫຼື ບັນດາແຂວງໄກ້ຄຽງ,ຕໍ່ເຫດການດັ່ງກ່າວຈິ່ງຮຽກຮ້ອງໃຫ້ການນໍາຂັ້ນສູງຂອງເມືອງທ່າແຕງກໍຄືຄະນະສະເພາະກິດປ້ອງກັນ ແລະ ຄວບຄຸມພະຍາດໂຄວິດ 19 ຂັ້ນເມືອງກວດກາຄົນເຂົ້າ – ອອກເມືອງໂດຍສະເພາະດ່ານຊາຍແດນຕິດຈອດລະຫ່ວາງແຂວງຕໍ່ແຂວງ ແລະ ປ່ອງຂ້າມລອຍຕ່າງໆ,ທີ່ສຳຄັນໃຫ້ປະຕິບັດລະບຽບການ ຫຼື ມາດຕະການປ້ອງກັນຂອງຄະນະສະເພາະກິດຢ່າງເຄັ່ງຄັດ,ນອກຈາກນີ້ກໍໃຫ້ເອົາໃຈໃສ່ຕ້ານ ແລະ ສະກັດກັ້ນບັນດາປະກົດການຫໍ້ຍທໍ້ຕ່າງໆທີ່ກອາດຈະເກີດຂຶ້ນໃນສັງຄົມ.