ສະພາ​ປະຊາຊົນ​ນະ ຄອນ ຫຼວງ​ວຽງ​ຈັນ (ນວ) ຈະ​ໄດ້​ພິຈາລະນາ ແລະ ຮັບ​ຮອງເອົາຫຼາຍ ​ບັນຫາ​ສຳຄັນ​ຂອງນະຄອນຫຼວງ​ວຽງ​ຈັນ ເປັນຕົ້ນ​ແມ່ນ​ບົດ​ລາຍ​ງານ​ຂອງ​ເຈົ້າ​ຄອງ​ນະຄອນຫຼວງ​ວຽງ​ຈັນ ກ່ຽວ​ກັບ​ການຈັດຕັ້ງ​ປະຕິບັດ​ແຜນ​ພັດທະນາ​ເສດ​ຖະ​ກິດ​-​ສັງຄົມ 2019 ແລະ ທິດ​ທາງ ປີ 2020 ຂອງ​ນະຄອນຫຼວງ​ວຽງ​ຈັນ ແລະ ບັນຫາ​ອື່ນໆ​ອີກ.

ກ​ອງ​ປະຊຸມ​ສະໄໝ​ສາມັນ​ ເທື່ອ​ທີ 8 ສະພາ​ປະຊາຊົນ ​ນະຄອນຫຼວງ​ວຽງ​ຈັນ​ຊຸດ​ທີ I ໄດ້​ເປີດ​ຂຶ້ນ​ໃນ​ວັນ​ທີ 20 ມັງກອນ​ນີ້ ທີ່ຫ້ອງ​ວ່າການ​ປົກຄອງ​ນະຄອນຫຼວງ​ວຽງ​ຈັນ ພາຍ​ໃຕ້​ການ​ເປັນ​ປະທານ​ຂອງ ທ່ານ ອານຸພາບ ຕຸ​ນາ​ລົມ ປະທານ​ສະພາ​ປະຊາຊົນ​ນະຄອນຫຼວງ​ວຽງ​ຈັນ ໂດຍ​ການ​ໃຫ້​ກຽດ​ເຂົ້າ​ຮ່ວມ​ຂອງ​ທ່ານ ສິນ​ລະ​ວົງ ຄຸດ​ໄພທູນ ເຈົ້າ​ຄອງ​ນະຄອນຫຼວງ​ວຽງ​ຈັນ ພ້ອມ​ດ້ວຍ ການ​ນຳ​ນະຄອນ​ຫຼວງ ແລະ ສະມາຊິກ​ສະພາ​ແຫ່ງ​ຊາດ ເຂດ 1, ສະມາຊິກ​ສະພາ​ປະຊາຊົນ​ນະຄອນ ຫຼວງ​ວຽງ​ຈັນ (ສສ ນວ) ພ້ອມ​ດ້ວຍ​ແຂກ​ຖືກ​ເຊີນ​ເຂົ້າ​ຮ່ວມ.

ທ່ານ ອານຸພາບ ຕຸ​ນາ​ລົມ ໄດ້​ກ່າວ​ວ່າ: ກອງປະ ຊຸມ​ຄັ້ງ​ນີ້, ບັນດາ ສສຊ ແລະ ສສ ນວ ຈະ​ໄດ້​ສຸມ​ໃສ່​ຄົ້ນຄວ້າ​ພິຈາລະນາຮັບຮອງເອົາ​ບັນ ຫາ​ສຳຄັນ​ພື້ນຖານ​ຂອງ ນວ ເປັນຕົ້ນ:

  • ພິ​ຈາລະ​ນາ ແລະ ຮັບຮອງ​ເອົາ​ບົດ​ລາຍ​ງານ​ຂອງ​ທ່ານ​ເຈົ້າຄອງ ນວ ກ່ຽວ​ກັບ​ຜົນ​ຂອງ​ ການຈັດຕັ້ງ​ປະຕິບັດ​ແຜນ​ພັດທະນາ​ເສດ​ຖະ​ກິດ​-​ສັງຄົມ, ແຜນ​ງົບປະມານ​ປະຈຳ​ປີ 2019 ແລະ ທິດ​ທາງ​ແຜນການ​ປະຈຳ​ປີ 2020 ຂອງ ນະຄອນຫຼວງ;
  • ພິຈາລະນາ ແລະ ຮັບຮອງ ເອົາ​ບົດ​ລາຍ​ງານ​ການເຄື່ອນໄຫວ​ວຽກ​ງານ​ປີ 2019 ແລະ ທິດ​ທາງ​ປີ 2020 ຂອງ​ອົງການ ກວດ​ສອບ​ປະຈຳ​ພາກ​ກາງ, ບົດ​ລາຍ​ງານ​ຜົນ​ການ​ກວດ​ສອບ​ບົດ​ສະຫຼຸບ​ຂາດ​ຕົວ​ແຜນ​ງົບປະມານ​ປີ 2018 ຂອງ ນວ;
  • ພິຈາລະນາ ແລະ ຮັບຮອງ​ເອົາ​ບົດ​ລາຍ​ງານ​ຂອງ​ການຈັດຕັ້ງ​ປະຕິບັດ ແຜນການເຄື່ອນໄຫວ ປະຈຳ​ປີ 2019 ແລະ ທິດ​ທາງ​ການເຄື່ອນໄຫວ​ວຽກ​ງານ​ປະຈຳ​ປີ 2020 ຂອງ​ອົງການ​ໄອ​ຍະ​ການ​ປະຊາຊົນ ແລະ ສານ​ປະຊາຊົນ ນວ;
  • ພິຈາລະນາ​ປະ​ເມີນ​ຜົນ ການ​ປະຕິບັດ​ໜ້າທີ່​ຂອງ​ບຸກ​ຄະລາ​ກອນ​ດຳລົງ​ຕຳແໜ່ງ​ທີ່​ສະພາ​ປະຊາຊົນ ນວ ເລືອກ​ຕັ້ງ ແລະ ຮັບຮອງ​ເອົາ​ການ​ແຕ່ງຕັ້ງ;
  • ພິຈາລະນາ ແລະ ຮັບຮອງ​ເອົາ ບົດ​ລາຍ​ງານ​ການຈັດຕັ້ງ​ປະຕິບັດ​ແຜນການເຄື່ອນໄຫວ​ວຽກ​ງານ​ປະຈຳ​ປີ 2019 ແລະ ທິດ​ທາງ​ແຜນການເຄື່ອນ​ໄຫວ​ວຽກ​ງານ​ປະຈຳ​ປີ 2020 ຂອງ​ສະພາ​ປະຊາຊົນ ນວ;
  • ຮັບ​ຟັງ​ການ​ປະກອບ​ຄຳ​ເຫັນ​ຂອງ ອົງການ​ແນວ​ລາວ​ສ້າງ​ຊາດ ນວ ຕໍ່​ບົດ​ລາຍ​ງານ​ປະຈຳ​ປີ 2019 ແລະ ທິດ​ທາງ​ແຜນການ​ວຽກ​ງານ 2020 ຂອງ​ສະພາ​ປະຊາຊົນ ນວ; ພິຈາລະນາ ແລະ ຮັບຮອງ​ເອົາ​ຂໍ້​ຕົກລົງ​ຂອງ​ທ່ານ​ເຈົ້າ​ຄອງ ນວ ຈຳນວນ 4 ສະບັບ​ຄື: ຮ່າງ​ຂໍ້​ຕົກລົງ ວ່າ​ດ້ວຍ​ການ​ປະ​ເມີນ​ຫົວໜ່ວຍ​ລາຄາ​ທີ່​ດິນ​ທົ່ວ ນວ;  ຮ່າງ​ຂໍ້​ຕົກລົງ ວ່າ​ດ້ວຍ​ການ​ພັດທະນາ ນວ ໃຫ້​ເປັນ​ຕົວ​ເມືອງ​ສີຂຽວ (ສ ສີຂຽວ); ຮ່າງ​ຂໍ້​ຕົກລົງ ວ່າ​ດ້ວຍ​ໂຄງການ​ສ້າງ ນວ ສະຫວ່າງ (ສ ສະຫວ່າງ);  ຮ່າງ​ຂໍ້​ຕົກລົງ​ວ່າ​ດ້ວຍ​ການ​ຄວບ​ຄຸມ​ສຽງ​ເນືອງ​ນັນ​ຢູ່ ນວ.
  • ກອງ​ປະຊຸມ​ຍັງ​ໄດ້ ພິຈາລະນາ ແລະ ຮັບຮອງ​ເອົາ​ການ​ສະເໜີ​ແຕ່ງຕັ້ງ​ສະມາຊິກ​ອົງການ​ປົກຄອງ​ນະຄອນຫຼວງ​ວຽງ​ຈັນ​ບາງ​ຕຳ​ແໜ່ງ,
  • ນອກຈາກ​ນັ້ນ ຍັງ​ຈະ​ໄດ້​ຮັບ​ຟັງ ການ​ອະທິບາຍ​ຊີ້​ແຈງ​ບາງ​ບັນຫາ​ທີ່​ພົ້ນ​ເດັ່ນ ແລະ ສຳຄັນ​ຈຳນວນ​ໜຶ່ງ​ຂອງ ນວ ຕື່ມ​ອີກ.

Medialaos