ມີເດຍລາວແຂວງຄຳມ່ວນ ໃນວັນທີ 20 ເມສາ 2021 ຢູ່ທີ່ຫ້ອງວ່າການແຂວງຄໍາມ່ວນສະມາຄົມມິດຕະພາບລາວ – ຫວຽດນາມຂັ້ນສູນກາງໄດ້ເຄື່ອນໄຫວເຮັດວຽກກັບສະມາຄົມມິດຕະພາບລາວ – ຫວຽດນາມປະຈໍາແຂວງຄໍາມ່ວນໂດຍມີທ່ານ ສົມໃຈ ເພັດສີນວນ ປະທານສະພາປະຊາຊົນແຂວງຄໍາມ່ວນ ທັງເປັນປະທານສະມາຄົມມິດຕະພາບລາວ-ຫວຽດນາມໃຫ້ການຕ້ອນຮັບ ທ່ານ ຮ.ສ.ຈ . ປອ. ສາຍຂອງ ສາຍນາສິນ ຮອງປະທານສະມາຄົມມິດຕະພາບລາວ-ຫວຽດນາມຂັ້ນສູນກາງພ້ອມຄະນະໂດຍມີຄະນະພະແນກການຕ່າງປະເທດເຂົ້າຮ່ວມ.

ເຊິ່ງຈຸດປະສົງໃນການລົງມາເຄື່ອນໄຫວເຮັດວຽກຂອງສະມາຄົມໃນຄັ້ງນີ້ກໍ່ເພື່ອເຜີຍແຜ່ເອກະສານຂໍ້ຕົກລົງວ່າດ້ວຍການຈັດຕັ້ງການເຄື່ອນໄຫວຂອງສະມາຄົມມິດຕະພາບລາວກັບຕ່າງປະເທດ , ແຜນການເຄື່ອນໄຫວຂອງສະ ມາຄົມລາວ – ຫວຽດນາມແຕ່ 2021 – 2025 , ປຶກສາຫາລືກ່ຽວກັບການປັບປຸງບຸກຄະລາກອນພາຍໃນກົງຈັກຂອງສະມາຄົມມິດຕະພາບລາວ – ຫວຽດນາມຂອງແຂວງຄໍາມ່ວນ , ປຶກສາຫາລືໃນການກະກຽມຄວາມພ້ອມຈັດກອງປະຊຸມຂອງສະມາຄົມບັນດາແຂວງທີ່ມີຊາຍແດນຕິດກັບ ສ.ສ ຫວຽດນາມໂດຍອີງໃສ່ທິດຊີ້ນໍາຂອງປະທານສະມາຄົມຂັ້ນສູນກາງເພື່ອສົ່ງເສີມ ແລະ ຮັດແໜ້ນຄວາມສາມັກຄີລະຫວ່າງສອງຊາດລາວ – ຫວຽດນາມໃນເຂດຊາຍແດນໃຫ້ປະຊາຊົນສອງຊາດເຂົ້າໃຈເລິກເຊິ່ງເຖິງສາຍພົວພັນ ແລະ ມິດຕະພາບອັນຍິ່ງໃຫຍ່ , ຄວາມສາມັກຄີແບບພິເສດ ແລະ ການຮ່ວມມືຮອບດ້ານລະຫວ່າງລາວ – ຫວຽດນາມ , ໃຫ້ຜັດປ່ຽນກັນເປັນເຈົ້າພາບແລກປ່ຽນບົດຮຽນ 02 – 03 ປີຕໍ່ຄັ້ງອີງຕາມສະພາບການ.