ມີເດຍລາວແຂວງຫຼວງນ້ຳທາ ວັນທີ 30 ມິຖຸນາ 2021 ຢູ່ທີ່ ກອງບັນຊາການທະຫານແຂວງຫຼວງນໍ້າທາ ສະມາຊິກຊາວໝຸ່ມທົ່ວກອງບັນຊາການທະຫານແຂວງ ຮ່ວມໃຈກັນບໍລິຈາກເລືອດ ເພື່ອຊ່ວຍເຫຼືອສັງຄົມ ແລະ ເພື່ອນມະນຸດດ້ວຍກັັນ ເຂົ້າຮ່ວມຂອງທ່ານ ສາຍທະລາທອງ ສາຍຫຍ້າທອງ ຮອງເລຂາຄະນະບໍລິຫານງານຊາວໝຸ່ມແຂວງ, ທ່ານ ນ ພັດຊະນະ ບາສີ ຮອງຫົວຫນ້າອົງການກາແດງແຂວງຫລວງນ້ຳທາ , ມີສະມາຊິກຊາວໝຸ່ມໃນທົ່ວກອງບັນຊາການທະຫານແຂວງ ພ້ອມດ້ວຍພະນັກງານວິຊາການອົງການກາແດງແຂວງ ເຂົ້າຮ່ວມທັງໝົດ 60 ຄົນ.

ການຈັດກິດຈະກຳບໍລິຈາກເລືອດໃນຄັ້ງນີ້ ກໍ່ເພື່ອເປັນການປຸກຈິດສຳນຶກໃຫ້ແກ່ໝ່ວຍຊາວໝຸ່ມ ແລະ ສະມາຊິກຊາວໝຸ່ມໃນຂອບເຂດທົ່ວແຂວງ ໄດ້ບໍລິຈາກເລືອດດ້ວຍຄວາມສະໝັກໃຈ ໂດຍບໍ່ຫວັງຜົນຕອບແທນ ທັງເປັນການປະກອບສ່ວນຊ່ວຍເຫລືອສັງຄົມ ແລະ ເພື່ອນມະນຸດທີ່ກຳລັງນອນປີ່ນປົວ ແລະ ຕ້ອງການເລືອດ ເພື່ອຕໍ່ລົມຫາຍໃຈໃຫ້ເຂົາເຈົ້າກັບມາດຳລົງຊີວິດຮ່ວມກັບສັງຄົມຕະຫລອດໄປ ເວົ້າລວມເວົ້າສະເພາະ ກໍ່ເພື່ອຕອບສະໜອງໃຫ້ກັບມວນຊົນພາຍໃນແຂວງຫລວງນ້ຳທາໃຫ້ພຽງພໍ ເຊີ່ງການບໍລິຈາກເລືອດຄັ້ງນີ້ມີຜູ້ຮັບສະໝັກ ບໍລິຈາກທັງໝົດ 34 ຄົນ ໄດ້ເລືອດຕົວຈິງ 27 ຖົງ ຫລືເທົ່າກັບ 10 ພັນ 800 cc.

ໂອກາດດຽວກັນນີ້ ທ່ານ ນ ພັດຊະນະ ບາສີ ຮອງຫົວຫນ້າອົງ ການກາແດງແຂວງຫລວງນ້ຳທາໄດ້ໃຫ້ຮູ້ກ່ຽວກັບຈຸດປະສົງເປົ້າໝາຍຂອງການບໍລິຈາກເລືອດເພື່ອໃຫ້ຊາວໜຸ່ມບໍລິຈາກເລືອດຊ່ວຍເຫຼືອສັງຄົມ ແລະ ມີສ່ວນຮ່ວມໃນຂະບວນການບໍລິຈາກເລືອດເພາະວ່າຊ່ວງລະບາດຂອງພະຍາດໂຄວິດ – 19 ເຮັດໃຫ້ການບໍລິຈາກເລືອດຫຼຸດນ້ອຍຖ້ອຍລົງບໍ່ພຽງພໍກັບຄົນເຈັບທີ່ຂາດເລືອດ. ພ້ອມທັງຮຽກຮ້ອງໃຫ້ກັບສະມາຊິກຊາວໝຸ່ມ ຈົ່ງຮ່ວມແຮງຮ່ວມໃຈກັນມາບໍລິຈາກເລືອດແບບສະໝັກໃຈ ໂດຍບໍ່ຫວັງຜົນຕອບແທນ ເພື່ອຊ່ວຍເຫລືອເພື່ອນມະນຸດດ້ວຍກັນກໍ່ຄືຄົນທີ່ຂາດເລືອດເພື່ອຕໍ່ລົມຫາຍໃຈ ແລະ ໃຫ້ກັບມາມີຊີວິດໃໝ່. ຂ່າວ: ສົມພອນ ຂຸນດາວົ