ມິເດຍລາວແຂວງໄຊຍະບູລີ ຂ່າວ: ມະໄລວັນ ພິທີປາຖະກະຖາ ຫວນຄືນປະຫວັດສາດວັນແມ່ຍິງສາກົນ ຄົບຮອບ 111 ປີ (8 ມີນາ 1910 – 8 ມີນາ 2021) ໄດ້ຈັດຂຶ້ນໃນວັນທີ 4 ມີນາ 2021 ນີ້ຢູ່ທີ່ຫ້ອງປະຊຸມພະແນກສຶກສາທິການ ແລະ ກິລາແຂວງໄຊຍະບູລີ. ໃຫ້ກຽດປາຖະກະຖາໂດຍ ສະຫາຍ ນາງ ບົວຈັນ ພັນທະວົງ ກໍາມະການພັກແຂວງ ຫົວໜ້າພະແນກຖະແຫຼງຂ່າວ, ວັດທະນະທໍາ ແລະ ທ່ອງທ່ຽວແຂວງ, ມີປະທານຮາກຖານ, ຫົວໜ້າໜ່ວຍ, ຄະນະຮາກຖານ, ຄະນະໜ່ວຍ ແລະ ສະມາຊິກແມ່ຍິງຂົງເຂດວັດທະນະທໍາ-ສັງຄົມເຂົ້າຮ່ວມ.

ໃນພິທີ ສະຫາຍ ນາງ ບົວຈັນ ພັນທະວົງ ກໍ່ໄດ້ໃຫ້ກຽດປາຖະກະຖາ ເນື່ອງໃນໂອກາດສະເຫຼີມສະຫຼອງວັນແມ່ຍິງສາກົນ 8 ມີນາ 1910 ຫາ 8 ມີນາ 2021 ຄົບຮອບ 111 ປີ ເຊິ່ງບາງຕອນກ່າວວ່າ: ວັນແມ່ຍິງສາກົນໄດ້ກຳເນີດຂື້ນໃນທາມກາງສະພາບສດຖະກິດຂອງພວກສັກດີນາ ແລະ ນາຍທຶນຂະຫຍາຍຕົວ ເມື່ອໂຮງຈັກ, ໂຮງງານອຸດສາຫະກຳຂອງນາຍທຶນຂະຫາຍຕົວ ມັນສ້າງໄດ້ຄວາມຮັ່ງມີໃຫ້ແກ່ພວກນາຍທຶນ ແຕ່ຊ້ຳພັດເພີ່ມຄວາມທຸກຍາກລຳບາກໃຫ້ແກ່ຊາວຜູ້ອອກແຮງງານ ໂດຍສະເພາະແມ່ນກຳມະກອນແມ່ຍິງ ຢູ່ພາຍໃຕ້ລະບອບສັກດີນາ, ນາຍທຶນ, ແມ່ຍິງຖືພາຖືກກົດຂີ່ຂູດຮີດຢ່າງໜັກໜ່ວງ, ເຮັດວຽກຫຼາຍຊົ່ວໂມງ ແຕ່ໄດ້ຮັບຄ່າຈ້າງແຮງງານດ້ວຍລາຄາຖືກເຮັດວຽກບໍ່ມີການຮັບປະກັນ, ບໍ່ມີລະບອບປົກປັກຮັກສາສຸຂະພາບຂອງແມ່ຍິງ ແລະ ເດັກນ້ອຍ. ສະພາບຄວາມຫຍຸ້ງຍາກ ແລະ ຖືກກົດຂີ່ຂູດຮີດ ໃນວັນທີ 8 ມີນາ 1908 ແມ່ຍິງ ຈຳນວນ 15,000 ຄົນ (ໜື່ງໝື່ນຫ້າພັນຄົນ) ໄດ້ເດີນຂະບວນຢູ່ເມືອງນີວຍອກ ເພື່ອປະທ້ວງໃຫ້ນາຍທຶນຫຼຸດຜ່ອນຊົ່ວໂມງເຮັດວຽກ, ຢຸດເຊົາການຂູດຮີດແຮງງານເດັກ ແລະ ທວງໃຫ້ແມ່ຍິງ ມີສິດໃນການອອກສຽງເລືອກຕັ້ງ ແລະ ຮັບການສະໝັກເລືອກຕັ້ງ ການເດີນຂະບວນຄັງນີ້ແມ່ນພາຍໃຕ້ຄຳຂວັນ: “ເຂົ້າຈີ່ ແລະ ດອກກຸຫຼາບ ”; ເຂົ້າຈີ່ ໝາຍເຖິງເສດຖະກິດທີ່ດີຂື້ນ, ດອກກຸຫຼາບໝາຍເຖິງຄຸນນະພາບຊີວິດທີດີຂື້ນ. ມາເຖິງປີ 1910 ຂະບວນການຕໍ່ສູ້ຂອງແມ່ຍິງ ໄດ້ແຜ່ຂະຫຍາຍກວ້າງອອກໄປສູ່ປະເທດນາຍທຶນຢູ່ທະວີບເອີລົບ ແລະ ໃນປີນີ້ເອງ ກອງປະຊຸມສາກົນກ່ຽວກັບບັນຫາແມ່ຍິງຄັ້ງທຳອິດໄດ້ຈັດຂື້ນຢູ່ທີໂກເປນຮາກ ນະຄອນຫຼວງຂອງປະເທດ ເດນມາກ, ມີຜູ້ແທນ 100 ກວ່າຄົນ ຈາກ 17 ປະເທດເຂົາຮ່ວມ ກອງປະຊຸມດັ່ງກ່າວໄດ້ຮັບຮອງ ແລະ ຕົກລົງເອົາວັນທີ 8 ມີນາ ຂອງທຸກປີເປັນວັນແມ່ຍິງສາກົນ.