ມີເດຍລາວແຂວງສາລະວັນ ໂດຍ: ວິໄລວອນ ສິດທິໄຊ ກອງທຶນຊ່ວຍເຫຼືອເຊີ່ງກັນ ແລະ ກັນ ຂອງສະຫະພັນກຳມະບານແຂວງ ໄດ້ເລີ່ມຈັດຕັ້ງປະຕິບັດມາແຕ່ປີ 1994 ຈົນເຖີງປັດຈຸບັນ ເປັນເວລາ 27 ປີ. ຜ່ານການຈັດຕັ້ງປະຕິບັດໃນແຕ່ລະໄລຍະ ມາຮອດປີ 2020 ສາມາດທ້ອນໂຮມເງິນກອງທຶນໄດ້ທັງໝົດ 241 ລ້ານກວ່າກີບ, ໃນນັ້ນຍອດຍົກມາແຕ່ປີ 2019 ຈຳນວນ 146 ລ້ານກວ່າກີບ ແລະ ເກັບໄດ້ໃນປີ 2020 ເກືອບ 100 ລ້ານກີບ. ທົ່ວແຂວງສາລະວັນ ມີສະມາຊິກກອງທຶນດັ່ງກ່າວທັງໝົດ 1.900 ກວ່າຄົນ ທຽບໃສ່ສະມາຊິກກຳມະບານທົ່ວແຂວງ 9.000 ກວ່າຄົນ ປະຕິບັດໄດ້ພຽງ 20%.

ທ່ານ ຈິດຕະກອນ ສາຍສະໝຸດ ຮອງປະທານຄະນະບໍລິຫານງານສະຫະພັນກຳມະບານແຂວງ ໄດ້ຜ່ານບົດສະຫຼຸບການຈັດຕັ້ງປະຕິບັດວຽກງານກອງທຶນຊ່ວຍເຫຼືອເຊີ່ງກັນ ແລະ ກັນ ປະຈຳປີ 2020, ພ້ອມທັງຕີລາຄາດ້ານດີ, ດ້ານອ່ອນ, ຂໍ້ຄົງຄ້າງ ແລະ ບົດຮຽນທີ່ຖອດຖອນໄດ້. ປັດຈຸບັນ ທົ່ວແຂວງສາລະວັນ ເຂົ້າເປັນສະມາຊິກກອງທຶນດັ່ງກ່າວມີ ສະຫະພັນກຳມະບານ 5 ເມືອງ ຄື: ເມືອງວາປີ, ຄົງເຊໂດນ, ເລົ່າງາມ, ລະຄອນເພັງ ແລະ ເມືອງສະໝ້ວຍ, 3 ສະຫະພັນກຳມະບານພະແນກການ ແລະ 20 ຮາກຖານອ້ອມຂ້າງແຂວງ ສາມາດທ້ອນໂຮມເງິນກອງທຶນໄດ້ທັງໝົົດ 241 ລ້ານກວ່າກີບ, ໃນນັ້ນຍອດຍົກມາແຕ່ປີ 2019 ຈຳນວນ 146 ລ້ານກວ່າກີບ ແລະ ເກັບໄດ້ໃນປີ 2020 ຈຳນວນ 95 ລ້ານກວ່າກີບ.

ນອກນັ້ນ, ປະຕິບັດລາຍຈ່າຍໄດ້ 47 ລ້ານກວ່າກີບ ໂດຍໄດ້ຈ່າຍການປະຕິບັດນະໂຍບາຍສະມາຊິກກອງທຶນ ເປັນຕົ້ນ: ເກີດລູກ, ລຸລູກ, ຜ່າຕັດກາງ-ໃຫຍ່, ນອນໂຮງໝໍ, ສະມາຊິກຮັບເງິນຄືນ ແລະ ນະໂຍບາຍສະມາຊິກເສຍຊີວິດ. ປັດຈຸບັນ ມີຍອດເງິນກອງທຶນຕົວຈິງ 194 ລ້ານກວ່າກີບ. ທົ່ວແຂວງສາລະວັນ ມີສະມາຊິກກຳມະການທັງໝົດ 9.628 ຄົນ, ເຂົ້າເປັນສະມາຊິກກອງທຶນຊ່ວຍເຫຼືອເຊີ່ງກັນ ແລະ ກັນ ມີທັງໝົດ 1.900 ກວ່າຄົນ ປະຕິບັດໄດ້ພຽງ 20%. ຈາກນັ້ນ, ຜູ້ເຂົ້າຮ່ວມກອງປະຊຸມ ກໍ່ໄດ້ປະກອບຄຳຄິດເຫັນ ຕໍ່ກັບຮ່າງກົດລະບຽບກອງທຶນ ເພື່ອປັບປຸງບາງເນື້ອໃນ ໃຫ້ຮັດກຸມ ແລະ ແທດເໝາະ ຂຶ້ນຕື່ມ.

ກອງປະຊຸມສະຫຼຸບວຽກງານກອງທຶນຊ່ວຍເຫຼືອເຊີ່ງກັນ ແລະ ກັນຂອງສະຫະພັນກຳມະບານແຂວງ ຈັດຂຶ້ນໃນວັນທີ 15 ມິຖຸນາ 2021, ຢູ່ສະໂມສອນແຂວງ, ໂດຍການເຂົ້າຮ່ວມຂອງ ທ່ານ ຄຳຕາ ໂຮ່ຊົງເຣືອງ ຄະນະປະຈຳພັກແຂວງ ປະທານແນວລາວສ້າງຊາດແຂວງ ຜູ້ຊີ້ນຳວຽກງານອົງການຈັດຕັ້ງມະຫາຊົນ, ມີ ທ່ານ ບຸນທະວີ ພິມມະສານ ປະທານສະຫະພັນກຳມະບານແຂວງ, ພ້ອມດ້ວຍບັນດາທ່ານຄະນະບໍລິຫານງານສະຫະພັນກຳມະບານແຂວງ, ສະຫະພັນກຳມະບານ 8 ຕົວເມືອງ ແລະ ຮາກຖານອ້ອມຂ້າງແຂວງ ເຂົ້າຮ່ວມ.