ໃນວັນທີ 25 ກຸມພາ 2021 ສາທາລະນະສຸກ ເມືອງທ່າແຕງ ແຂວງເຊກອງ ໄດ້ຮັບຢາປິ່ນປົວພະຍາດ ຈາກແນວລາວສ້າງຊາດ ເມືອງທ່າແຕງ ຈໍານວນ 4 ລາຍການໃນນັ້ນມີ: ເຄື່ອງແຕັດນໍ້າປັດສະວະ ຈໍານວນ 1 ແກັດ,ຢາບໍາລຸງສາຍຕາ 1 ແກັດ, ຢາຕ້ານເຊື້ອໃຊ້ກັບເດັກຈໍານວນ 1 ແກັດ ແລະ ຢາບໍາລຸງສະໝອງເພື່ອຟື້ນຟູຄວາມຈໍາ-ຈໍານວນ 1 ແກັດ.
ທ່ານ ລົດແກ້ວ ເພັງພູນສະຫວັດ ຮອງເລຂາພັກເມືອງ ປະທານແນວລາວສ້າງຊາດເມືອງທ່າແຕງ ໄດ້ກ່າວວ່າ: ຢາຈໍານວນດັ່ງກ່າວ ແມ່ນໄດ້ຈາກມູນນິທິ (ຊ່ວຍເຫຼືອລ້າ) ຂອງສາທາລະນະລັດເກົາຫຼີ ມອບຜ່ານໃຫ້ສູນກາງແນວລາວສ້າງຊາດ,ຈາກນັ້ນສູນກາງແນວລາວສ້າງຊາດ ໄດ້ມອບຕໍ່ໃຫ້ ກັບແນວລາວສ້າງຊາດແຂວງເຊກອງ ແລະ ນໍາມາມອບຕໍ່ໃຫ້ ແນວລາວສ້າງຊາດເມືອງ ເພື່ອໃຫ້ຮອດໃຫ້ເຖິງມືຂອງພາກສ່ວນກ່ຽວຂ້ອງ ກໍຄື ຫ້ອງການສາທາລະນະສຸກ ເມືອງທ່າແຕງ.

ໂອກາດດັ່ງກ່າວ ທ່ານ ສຸກສະຫວັນ ຈັນທະວິຈິດ ຮອງຫົວໜ້າຫ້ອງການສາທາລະນະສຸກເມືອງ ກໍໄດ້ກ່າວຮັບເອົາຢາຈໍານວນ 4 ລາຍການດັ່ງກ່າວ ເພື່ອນໍາໃຊ້ເຂົ້າໃນວຽກງານການປິ່ນປົວຄົນເຈັບຂອງປະຊາຊົນທິມາບໍລິການຢູ່ໂຮງໝໍເມືອງທ່າແຕງໃຫ້ມີສຸຂະພາບແຂງແຮງຂຶ້ນ.
ເປັນກຽດມອບຢາໃນຄັ້ງນີ້ ຂອງ ທ່ານ ລົດແກ້ວ ເພັງພູນສະຫວັດ ຮອງເລຂາພັກເມືອງ ປະທານແນວລາວສ້າງຊາດເມືອງທ່າແຕງ ແລະ ເປັນກຽດຮັບໂດຍທ່ານ ສຸກສະຫວັນ ຈັນທະວິຈິດ ຮອງຫົວໜ້າຫ້ອງການສາທາລະນະສຸກເມືອງ ໂດຍຊ້ອງໜ້າພະນັກງານກ່ຽວຂ້ອງເຂົ້າຮ່ວມເປັນສັກຂີພະຍານ. ຂ່າວ: ລັດຕະນາພອນ ກອງໄຊສະຫວັດ