ຄະນະສະເພາະກິດ ກໍຄືກະຊວງສາທາລະນະສຸກ ແລະ ພາກສ່ວນກ່ຽວຂ້ອງ ໄດ້ດຳເນີນການຕິດຕາມກວດກາ ແລະ ກວດສອບຄືນຢ່າງໃກ້ຊິດ ກໍລະນີຄົນໄທ ແລະ ຄະນະລວມ 5 ຄົນ ທີ່ຕິດເຊື້ອພະຍາດອັກເສບປອດ ຈາກເຊື້ອຈຸລະໂລກສາຍພັນໃໝ່ ຫລື ໂຄວິດ-19 ແລ້ວຂ້າມມາທ່ຽວເມືອງທ່າແຂກ ແຂວງຄຳມ່ວນ ຕາມແຈ້ງການຂອງ ສະຖານກົງສູນໃຫຍ່ ແຫ່ງ ຣາຊາອາຈັກໄທ ປະຈຳແຂວງສະຫວັນນະເຂດ ເລກທີ 29301/83 ນັ້ນ ຊຶ່ງປັດຈຸບັນ ພົບວ່າມີມູນຄວາມຈິງພຽງບາງຢ່າງ ເນື່ອງຈາກວ່າຍັງມີຂໍ້ມູນ ຫລາຍຢ່າງທີ່ບໍ່ກົງກັບຕົວຈິງ.

ທ່ານ ດຣ. ຣັດຕະນະໄຊ ເພັດສຸວັນ ຫົວໜ້າກົມຄວບຄຸມພະຍາດຕິດຕໍ່ ກະຊວງສາທາລະນະສຸກ ໃຫ້ສຳພາດ ໃນວັນທີ 17 ມີນາ 2020 ນີ້ວ່າ: ພາຍຫລັງພວກເຮົາ ກໍໄດ້ຮັບແຈ້ງ ການສະບັບດັ່ງກ່າວນັ້ນ ໂດຍມີເນື້ອໃນລະບຸວ່າ: ເມື່ອວັນທີ 12 ມີນາ 2020 ເວລາ 9:30 ໂມງ ມີຜູ້ຕິດເຊື້ອໂຄວິດ-19 ຊຶ່ງເປັນຄົນໄທ ແລະ ຄະນະລວມ 5 ຄົນ ເດີນທາງຂ້າມຂົວມິດຕະພາບ ແຫ່ງທີ 3 ຈາກແຂວງນະຄອນພະນົມ ປະເທດໄທ ໄປແຂວງຄໍາມ່ວນ ຊຶ່ງຄະນະດັ່ງກ່າວໄດ້ຮັບປະທານອາຫານ ທີ່ຮ້ານຈຳນວນໜຶ່ງ ກ່ອນເດີນທາງ ກັບປະເທດໃນວັນດຽວກັນ. ຕໍ່ກໍລະນີດັ່ງກ່າວ ກະຊວງສາທາລະນະສຸກ ແລະ ພາກສ່ວນທີ່ກ່ຽວຂ້ອງຂອງແຂວງ ກໍໄດ້ລົງໄປກວດສອບ ຊຶ່ງເຫັນວ່າຍັງ ມີຫລາຍຢ່າງ ທີ່ບໍ່ກົງກັບແຈ້ງການດັ່ງກ່າວ ເຊັ່ນວ່າ: ຈໍານວນຄົນທີ່ແຈ້ງມາບໍ່ກົງກັນ ແລະ ຈຳນວນຊື່ທີ່ແຈ້ງມາບໍ່ກົງກັບຕົວຈິງ.

ເຖິງຢ່າງໃດກໍຕາມ, ທາງຄະນະສະເພາະກິດ ກໍຄືກະຊວງສາທາລະນະສຸກ ກໍໄດ້ຕິດຕໍ່ປະສານງານ ກັບພະແນກສາທາລະນະສຸກ ແຂວງຄຳມ່ວນ ລວມທັງອຳນາດ ການປົກຄອງແຂວງ ແລະ ພາກ ສ່ວນອື່ນໆທີ່ກ່ຽວຂ້ອງ ຊຶ່ງໄດ້ມີການປະຊຸມກັນຢ່າງຮີບດ່ວນ ແລະ ໄດ້ມີການລົງໄປຕິດຕາມ, ສອບສວນ ກ່ຽວກັບກໍລະນີດັ່ງກ່າວ ເຫັນວ່າ ມີມູນຄວາມຈິງບາງຢ່າງ ເພາະວ່າຕົວຈິງມີພຽງແຕ່ 2 ຄົນ ບໍ່ແມ່ນ 5 ຄົນຄືກັບແຈ້ງການລະບຸໄວ້; ສະນັ້ນ ຈຶ່ງໄດ້ສອບຖາມກົງສູນໄທຄືນ ແລະ ຮ່ວມກັນໄປກວດສອບຄືນ ຍັງບໍ່ທັນສາມາດ ໃຫ້ຄຳຕອບທີ່ຄືບໜ້າຕື່ມອີກ.

ທ່ານ ດຣ. ຣັດຕະນະໄຊ ເພັດສຸວັນ ກ່າວຕື່ມວ່າ: ຈາກລົງໄປກວດສອບຕົວຈິງ ເຫັນວ່າມີເຮືອນພັກສອງແຫ່ງ ທີ່ສອງຄົນດັ່ງກ່າວໄປພັກຜ່ອນ ແລະ ພວກເຮົາ ກໍໄດ້ໄປພົບກັບເຈົ້າ ຂອງກິດຈະການທັງສອງ ຊຶ່ງມີພະນັກງານຮັບຕ້ອນທັງໝົດ 10 ຄົນ, ມາຮອດປັດຈຸບັນ ເຫັນວ່າທຸກຄົນບໍ່ມີອາການ ຜິດປົກກະຕິ ແຕ່ກໍໄດ້ໃຫ້ ເຂົາເຈົ້າສືບຕໍ່ ຕິດຕາມອາການຕົວເອງ ຈົນຄົບ 14 ວັນ. ພ້ອມດຽວກັນນັ້ນ ກໍໄດ້ເກັບຕົວຢ່າງບຸກຄົນທີ່ໃກ້ຊິດ 2 ຄົນມາກວດສອບ ປັດຈຸບັນ ກຳລັງດຳເນີນການກວດ ແລະ ຈະໄດ້ປະກາດຜົນ ໃຫ້ຮູ້ພາຍຫລັງທີ່ໄດ້ຜົນກວດ.

Medialaos MMD