ມີເດຍລາວແຂວງເຊກອງ ພາບ-ຂ່າວ: ພຸດທະສອນ ວັນທີ 25 ມິຖຸນາ 2021 ທີ່ຫ້ອງປະຊຸມສານປະຊາຊົນແຂວງ ໄດ້ມີພິທີມອບ-ຮັບໃບຢັ້ງຢືນໜ່ວຍພັກປອດໃສ, ເຂັ້ມແຂງ, ໜັກແໜ້ນ ຄັ້ງທີ III ປະຈໍາປີ 2020 ໃຫ້ໜ່ວຍພັກຮາກຖານສານປະຊາຊົນແຂວງເຊກອງ, ໃຫ້ກຽດເຂົ້າຮ່ວມມີສະຫາຍ ບຸນຫຼາຍ ບຸດທິ ກໍາມະການປະຈໍາພັກແຂວງ, ຫົວໜ້າຄະນະຈັດຕັ້ງແຂວງ; ມີສະຫາຍ ສົມຈິດ ວໍລະວົງ ກຳມະການພັກແຂວງ, ເລຂາໜ່ວຍພັກ, ປະທານສານປະຊາຊົນແຂວງ, ມີຄະນະໜ່ວຍພັກ, ແຂກຖືກເຊີນ ແລະສະມາຊິກພັກໃນໜ່ວຍເຂົ້າຮ່ວມ.

ໃນພິທີ ສະຫາຍ ນາງ ສີວິໄລ ຜາວິໄລ ຮອງເລຂາໜ່ວຍພັກ, ຮອງປະທານສານປະຊາຊົນແຂວງໄດ້ລາຍງານວ່າ: ໜ່ວຍພັກສານປະຊາຊົນແຂວງ ເປັນໜ່ວຍພັກເອກະລາດ ຂຶ້ນກັບຄະນະບໍລິຫານງານພັກແຂວງ, ມີຄະນະໜ່ວຍພັກ 3 ສະຫາຍ, ຍິງ 1 ສະຫາຍ ແລະມີສະມາຊິກພັກທັງໝົດ 45 ສະຫາຍ, ຍິງ 14 ສະຫາຍ, ໃນນີ້ສໍາຮອງ 5 ສະຫາຍ, ໃນປີ 2020 ຜ່ານມາ ຄະນະໜ່ວຍພັກໄດ້ນໍາພາ-ຊີ້ນໍາສະມາຊິກພັກ-ພະນັກງານສານປະຊາຊົນແຂວງ ແລະສານປະຊາຊົນເຂດ ໃຫ້ເຂົ້າຮ່ວມໃນການຈັດຕັ້ງແນວທາງນະໂຍບາຍຂອງພັກ, ກົດໝາຍຂອງ ຕິດພັນກັບການປະຕິບັດແຜນການກໍ່ສ້າງໜ່ວຍພັກປອດໃສ ເຂັ້ມແຂງ ໜັກແໜ້ນຢ່າງເປັນເຈົ້າການ ໂດຍຖືເອົາການສຶກສາອົບຮົມການເມືອງນໍາພາແນວຄິດໃຫ້ສະມາຊິກພັກ-ພະນັກງານ, ພ້ອມທັງປະຕິບັດພາລະບົດບາດໃນການພິຈາລະນາຕັດສິນຄະດີຕ່າງໆ ໃຫ້ມີຄວາມຖືກຕ້ອງ, ສອດຄ່ອງກັບເຫດການຕົວຈິງຂອງຄະດີ ແລະຮັບປະກັນຄວາມຍຸຕິທໍາໃຫ້ແກ່ສັງຄົມ, ຊຶ່ງໃນໄລຍະ 9 ເດືອນຜ່ານມາ ມີຄະດີເຂົ້າສານປະຊາຊົນແຂວງ 63 ເລຶ່ອງ, ແກ້ໄຂແລ້ວ 39 ເລື່ອງ, ຍັງຄ້າງ 24 ເລື່ອງ, ສານປະຊາຊົນເຂດ ມີ 31 ເລື່ອງ, ແກ້ໄຂ 15 ເລື່ອງ, ຍັງຄ້າງ 16 ເລື່ອງ; ໄດ້ເອົາໃຈໃສ່ ແລະປັບປຸງກໍ່ສ້າງພັກຕາມ 5 ຫຼັກການ ແລະ 3 ທິດນໍາ ກໍ່ສ້າງພັກໃຫ້ເຂັ້ມແຂງທາງດ້ານການເມືອງ, ແນວຄິດ ແລະການຈັດຕັ້ງ ໃນການສໍາຫຼວດກວດກາຮ່ວມຊີວິດການເມືອງໃນແຕ່ລະເດືອນ ເພື່ອຕໍານິສົ່ງຂ່າວຄະນະພັກ, ສະມາຊິກພັກເປັນປະຈໍາ; ພ້ອມດຽວກັນນີ້ ກໍໄດ້ຜ່ານແຜນການກໍ່ສ້າງໜ່ວຍພັກປອດໃສ ເຂັ້ມແຂງ ໜັກແໜ້ນ ປະຈໍາປີ 2021 ຕື່ມອີກ.

ຈາກນັ້ນ ສະຫາຍ ກາວິນ ແກ້ວຈັນທະວົງ ຫົວໜ້າຂະແໜງກໍ່ສ້າງພັກ ຄະນະຈັດຕັ້ງແຂວງ ກໍໄດ້ຂຶ້ນຜ່ານມະຕິຕົກລົງຂອງຄະນະປະຈໍາພັກແຂວງ ສະບັບເລກທີ 54/ຄຈພຂ, ລົງວັນທີ 17 ກຸມພາ 2021 ວ່າດ້ວຍຮັບຮອງໜ່ວຍພັກຮາກຖານສານປະຊາຊົນແຂວງເຊກອງ ເປັນໜ່ວຍພັກປອດໃສ, ເຂັ້ມແຂງ, ໜັກແໜ້ນປະຈໍາປີ 2020 ແລະຮັບຮອງແຜນການກໍ່ສ້າງໜ່ວຍພັກປອດໃສ ເຂັ້ມແຂງ ໜັກແໜ້ນ ປະຈໍາປີ 2021. ເຊິ່ງໃຫ້ກຽດຂຶ້ນມອບໃບຢັ້ງຢືນໂດຍສະຫາຍ ບຸນຫຼາຍ ບຸດທິ ແລະກ່າວຮັບແມ່ນສະຫາຍ ສົມຈິດ ວໍລະວົງ.
ສະຫາຍ ບຸນຫຼາຍ ບຸດທິ ໄດ້ຮຽກຮ້ອງໃຫ້ຄະນະໜ່ວຍພັກສານປະຊາຊົນແຂວງ ຖືເອົາການສຶກສາອົບຮົມການເມືອງແນວຄິດເປັນກົກ, ພ້ອມກັນສືບຕໍ່ຮັກສາມູນເຊື້ອໜ່ວຍພັກ ປອດໃສ ເຂັ້ມແຂງ ໜັກແໜ້ນ; ພ້ອມກັນນັ້ນ ສະມາຊິກພັກທຸກສະຫາຍກໍ່ຕ້ອງເອົາໃຈໃສ່ໃນການປະຕິບັດກົດລະບຽບຂອງພັກວາງອອກຢ່າງເຂັ້ມງວດ, ຕັ້ງໜ້າປະຕິບັດສິດ ແລະໜ້າທີ່ຂອງຕົນໃນການປະຕິບັດໜ້າທີ່ວິຊາສະເພາະໃນການປົກປ້ອງລັດ, ປົກປ້ອງສັງຄົມ ດ້ວຍຄວາມສື່ສັດ, ໂປ່ງໃສ, ຍຸຕິທໍາ ແລະປະຕິບັດໜ້າທີ່ອື່ນໆ ທີ່ຂັ້ນເທິງມອບໝາຍໃຫ້ມີຄວາມສໍາເລັດເປັນຢ່າງດີ.