ວັນທີ 12 ຕຸລາ 2021 ທ່ານ ສະເຫລີມໄຊ ກົມມະສິດ ລັດຖະມົນຕີກະຊວງການຕ່າງປະເທດ ໄດ້ສົ່ງສານອວຍພອນໄຊອັນປະເສີດ ມາຍັງບັນດານັກການທູດອາວຸໂສ, ພະນັກງານບໍານານ ກໍ່ຄືພະນັກງານລັດຖະກອນທັງໝົດ ຂອງຂະແໜງການຕ່າງປະເທດ ຕະຫລອດຮອດພະນັກງານທຸກຄົນ ທີ່ເຮັດວຽກການຕ່າງປະເທດນັບແຕ່ສູນກາງລົງຮອດທ້ອງຖິ່ນ ເນື່ອງໃນໂອກາດວັນການທູດລາວ ຄົບຮອບ 76 ປີ.
ເນື່ອງໃນໂອກາດວັນການທູດລາວ ທີ່ໄດ້ໝູນວຽນມາບັນຈົບຄົບຮອບ 76 ປີ (12 ຕຸລາ 1945-12 ຕຸລາ 2021), ຂ້າພະເຈົ້າຂໍສົ່ງຄວາມຢື້ຢາມຖາມຂ່າວອັນອົບອຸ່ນ ແລະ ຄຳອວຍພອນໄຊອັນປະເສີດ ມາຍັງບັນດານັກການທູດອາວຸໂສ, ພະນັກງານບໍານານ ກໍຄືພະນັກງານລັດຖະກອນທັງໝົດ ຂອງຂະແໜງການຕ່າງປະເທດ ຕະຫລອດຮອດພະນັກງານທຸກຄົນ ທີ່ເຮັດວຽກການຕ່າງປະເທດ ນັບແຕ່ສູນກາງລົງຮອດທ້ອງຖິ່ນ.
ຕະຫລອດໄລຍະເວລາ 76 ປີຜ່ານມາ, ຂະແໜງການຕ່າງປະເທດໄດ້ມີການປະກອບ ສ່ວນຢ່າງສຳຄັນ ເຂົ້າໃນພາລະກິດຕໍ່່ສູ້ປົດປ່ອຍຊາດ ກໍຄື ການປະຕິບັດສອງໜ້າທີ່ຍຸດທະສາດ ເພື່ອປົກປັກຮັກສາ ແລະ ສ້າງສາພັດທະນາປະເທດຊາດ, ເຮັດໃຫ້ຊື່ສຽງ, ຖານະບົດບາດຂອງ ສປປ ລາວ ໄດ້ຮັບການເຊີດຊູສູງເດັ່ນຂຶ້ນໃນເວທີພາກພື້ນ ແລະ ສາກົນ. ຕາງໜ້າໃຫ້ພະນັກງານ ແລະ ນັກການທູດຮຸ່ນປະຈຸບັນ, ຂ້າພະເຈົ້າຂໍສະແດງຄວາມຮູ້ບຸນຄຸນຢ່າງເລິກເຊິ່ງ ຕໍ່ບັນດາພະນັກງານນັກການທູດທຸກຮຸ້ນ ທີ່ມີຄວາມຈົງຮັກພັກດີຕໍ່ພັກ, ໄດ້ເສຍສະຫລະ ແລະ ປະກອບສ່ວນຢ່າງບໍ່ຮູ້ອິດຮູ້ເມື່ອຍ ເພື່ອປະເທດຊາດ ເພື່ອປະຊາຊົນ ແລະ ໄດ້ວາງຮາກຖານທີ່ໜັກແໜ້ນ ໃຫ້ແກ່ຂະແໜງການຕ່າງປະເທດຂອງພວກເຮົາໃນປັດຈຸບັນ.
ສະພາບການພາກພື້ນ ແລະ ສາກົນໃນປັດຈຸບັນ ແລະ ຕໍ່ໜ້າຍັງຈະສືບຕໍ່ຜັນແປໄປຢ່າງໄວວາ, ສັບສົນ ແລະ ຄາດຄະເນໄດ້ຍາກ. ປະເທດຊາດຂອງພວກເຮົາພວມກ້າວເຂົ້າສູ່ໄລຍະໃໝ່ແຫ່ງການພັດທະນາ ເຊິ່ງມີທັງກາລະໂອກາດອັນໃຫຍ່ຫລວງ, ແຕ່ພ້ອມກັນນັ້ນກໍພວມປະເຊີນໜ້າກັບຄວາມຫຍຸ້ງຍາກ ແລະ ສິ່ງທ້າຍຢ່າງບໍ່ເຄີຍມີມາກ່ອນ ໂດຍສະເພາະແມ່ນຜົນກະທົບໜັກໜ່ວງຈາກ ການລະບາດຂອງພະຍາດໂຄວິດ-19 ທີ່ຍັງແກ່ຍາວ. ສະ ນັ້ນ, ນັກການທູດພວກເຮົາຈະຕ້ອງໄດ້ອອກແຮງ ເຄື່ອນໄຫວຫລາຍຂຶ້ນກວ່າເກົ່າຢູ່ໃນເວທີພາກພື້ນ ແລະ ສາກົນ. ເຖິງຢ່າງໃດກໍຕາມ, ດ້ວຍມູນເຊື້ອອັນສະຫງ່າອົງອາດຂອງຂະ ແໜງການຕ່າງປະເທດຕະຫລອດໄລຍະ 76 ປີ ຜ່ານມາ, ຂ້າພະເຈົ້າມີຄວາມເຊື່ອໝັ້ນຢ່າງເຕັມປ່ຽມວ່າ ບັນດາສະຫາຍຈະສືບຕໍ່ຮັກສາ ແລະ ເສີມຂະຫຍາຍມູນເຊື້ອ ຂອງຂະແໜງ ການຕ່າງປະເທດ, ສືບຕໍ່ເຊີດຊູ, ນໍ້າໃນຮັກຊາດອັນດູດດື່ມ, ຄວາມສາມັກຄີເປັນປຶກແຜ່ນ, ຮັກສາທາດແທ້ຄຸນສົມບັດສິນທໍາປະຕິວັດ, ອອກແຮງຝຶກຝົນຫລໍ່ຫລອມຕົນເອງ ເພື່ອຍົກລະດັບຄວາມຮູ້ຄວາມສາມາດ ດ້ານວິຊາສະເພາະຢ່າງບໍ່ຢຸດຢັ້ງ, ເພີ່ມທະວີຄວາມເປັນເຈົ້າການ, ຄວາມສະດຸ້ງໄວ ແລະ ຫົວຄິດປະດິດສ້າງໃນການຈັດຕັ້ງປະຕິບັດແນວທາງການຕ່າງປະເທດ ທີ່ກອງປະຊຸມໃຫຍ່ຄັ້ງທີ XI ຂອງພັກ ໄດ້ວາງອອກ ຢ່າງມີໄຊ, ເຮັດສຳເລັດທຸກໜ້າທີ່ ທີ່ພັກ ແລະ ລັດໄດ້ມອບໝາຍໃຫ້.
ໃນໂອກາດອັນສະຫງ່າລາສີນີ້, ອີກເທື່ອໜຶ່ງຂ້າພະເຈົ້າຂໍອວຍໄຊໃຫ້ພອນແດ່ບັນດາສະຫາຍທັງໝົດ ພ້ອມດ້ວຍຄອບຄົວຈົ່ງມີສຸຂະພາບເຂັ້ມແຂງ, ມີຄວາມຜາສຸກ ແລະ ປະສົບຜົນສຳເລັດທຸກປະການ.